Filipi 2 - La Bible en Otetela (Bible K'Ekila) 1991

Alaku Amotshi: Nyuyakitshakitsha; Nyuyali la Yimba ya Kristu

¹ Okone, naka ukikitshelu weko le Kristu, naka esambishelu ka ngandji keko, naka ekesanelu ka Nyuma keko, naka ketshi la memakana weko,

² nyufudia ongenongeno ami, dia nyu ndjala la yimba otoi, la ngandji otoi, lu ekesanelu kame, la utema otoi.

³ Tanyutshaki dikambu la utshanu kana la ndjatumbula, keli la ndjakitshakitsha ka yimba. Untu lʼuntu akani ati: Ukina kundeki ololo.

⁴ Nyu tshe, untu lʼuntu, tendaki akambu andi atu, keli untu lʼuntu endi ndu akambu wʼantu akina.

⁵ Nyuyali la yimba nye lʼatei anyu yaki ndu le Kristu Jesu.

⁶ Kuyanga ndi aki lu efanelu ka Unyashungu, ndi kunkana ati: Mbedima pupu la Unyashungu eko engo ka dimi munda.

⁷ Keli ndi akayanya uma lu lutumbu, akayala uku ukambi, akuto lu efanelu kʼantu.

⁸ Lamʼakandayala uku untu, ndi akayakitshakitsha, akayala la ukitanyia edja ndu lu nyoi, ee, nyoi ka futamba a mpeketanya.

⁹ Ndu uma lu dikambu so, Unyashungu akawumbiya otekoya, akawole lukumbu leli ladiku dia kumbu tshe;

¹⁰ dia adui tshe wakhusameli lukumbu la Jesu, wa lʼulungu, ndu wa wa ladiku dia kete, ndu wa wa la tshina dia kete;

¹¹ la dia nimi tshe yetawo vati: Jesu Kristu keli Khumadiondjo, ne dia lutumbu la Unyashungu Shi.

Dia Vo Ndjala la Wangasanu Waha la Unungu

¹² Okone, elangimi wa ngandji, uku akanyakitanyiaka diui tena tshe, aha paka lamʼatumuyalaka la nyu, keli kakiane nyu nyambuleka nkitanyia efula lamʼemi kema la nyu. Nyutshaki ulimu a panda kanyu la woma la lukumba,

¹³ ne dia Unyashungu katukambaka lʼetema anyu, dia nyu nanga la ntsha lulangu landi.

¹⁴ Nyutshi akambu tshe aha la engunungunu, ndu la tamu,

¹⁵ dia nyu ndjala nyaha la unungu, nyaha la lukesu, ana a Unyashungu wana la ekomo lʼatei alolonga la kolo ndu lahasimbwi, nyambenama lʼatei awo uku esasi wa kete.

¹⁶ Nyuwasha diui dia lumu, dia dimi ndjala la dikambu dia ndjatumbula lu lushi la Kristu, nti: Dimi kunsaka luwangu usakasaka, kuntsha ulimu utshatsha.

¹⁷ Ee, naka dimi layutshulwama uku ulambu wa lutela ladiku dia nyama kʼulambu wa mbetawo kanyu, dimi leko la ongenongeno, lambongenangena kame la nyu tshe.

¹⁸ Okone ndu nyu nyongenengene, nyongenengene kame la mi.

Paulu Ambatumela Timote la Epaforodito

¹⁹ Dimi lambulungamela le Khumadiondjo Jesu, dia nyutumela Timote lʼetenyi ka tshitshe, ne dia ndu dimi nkikitshama lamʼayumeya uku wenyu mete.

²⁰ Ne dia dimi kema la untu ukina lʼololo uku ndi, layunyukanela mete.

²¹ Ne dia vo tshe watuyangaka akambu awo, aha akambu wa Jesu Kristu.

²² Keli nyu nyame mbeyaka ekambelu kandi, uku akandakambaka kame la mi lu edianganyelu ka lukumu lʼololo uku ona la shi.

²³ Dimi lambulungamela mbutuma le nyu lamʼayumena okone ayuyala le mi.

²⁴ Keli dimi lambulungamela le Khumadiondjo nti: Dime layuya le nyu kemʼedja.

²⁵ Keli lakakani nti: Dieli la mi dia nyutumela Epaforodito, onalingu ndu ukambi la dimbi, kame la mi ndu dikendji dianyu la ukimanyidi wʼehumba ami,

²⁶ ne dia nyu nyakuki nyati: Ndi eko la hemo.

²⁷ Mete, ndi aki la hemo, aki lasuki la nyoi. Keli Unyashungu akawuki ketshi, aha ndame utu, keli ndi akambuki ketshi ndu dimi, ne dia ntukuyala la lunyangu ladiku dia lunyangu.

²⁸ Okone dimi lakaleki ndjala la saki ka mbutuma le nyu, ne dia nyu ndjala la ongenongeno lamʼayunyuwena ntu, la dia lunyangu lami lakitikiti.

²⁹ Okone nyulunguli le Khumadiondjo la ongenongeno tshe. Nyolemia antu wa wuhu uku,

³⁰ ne dia ndi akayala lasuki la nyoi dia ulimu wa Kristu. Ndi akayakimo lasʼeku la nyoi dia nkutsha kene kakahumbama lʼulimu anyu le mi.