Filemona 1 - La Bible en Otetela (Bible K'Ekila) 1991

Wambutumela Moyo

¹ Paulu, usi lukanu la Kristu Jesu, la Timote unyasu. Le Filemona, unyasu ukambi a ngandji,

² ndu le Apiya kadiyesu, ndu le Arakipo, unyasu dimbi dia Jesu, ndu le ekelizia wa lakaye:

³ Ngandji ka mamba kayali la nyu, ndu ki kʼuma le Unyashungu Shesu la uma le Khumadiondjo Jesu Kristu!

Paulu Ambuka Lusaka Dia Ngandji la Ekesanelu ka Filemona

⁴ Dimi latukaka Unyashungu ami lusaka. Latukuhoka lu dombelo diami,

⁵ ne dia lakuki lukumu la ngandji kaye la mbetawo kaye le Khumadiondjo Jesu, la le ekilami tshe,

⁶ mbalangami ekesanelu ka mbetawo kaye atombosha ewu kʼakambu wʼololo tshe weli lʼutema aye le Kristu.

⁷ Unyasu, dimi lakangenangena efula, lakakikitshama dia ngandji kaye, ne dia etema wʼekilami wambusangana dia dikambu diaye.

Onesimo Tayalaki Uku Fumbi Ntu

⁸ Okone, kuyanga dimi la dihunga efula le Kristu dia nkosengola dia we ntsha dikambu diusunganyi,

⁹ keli layukosengasenga ne dia ngandji kakukami — dimi Paulu, dikendji ndu usi lukanu la Kristu Jesu —

¹⁰ Dimi lambukosengasengela onʼami Onesimo, lakamuti lu kanu yami.

¹¹ (Ntundu ndi kunkutshela ololo, keli kakiane ndi mbeyaka ntutshela ndu we ndu dimi, ololo.)

¹² Dimi lambukutumelandi; ndi eko utema ami.

¹³ Dimi lakalangi ndi ndjala la mi, ne dia ndi nkimanyiami dia dikambu diaye lamʼemi lu kanu ya lukumu lʼololo.

¹⁴ Keli dimi halangi ntsha nduku dikambu tshikima la wulu uma le ye. Dimi halangi ololo aye ndjala uku la khudu, keli paka uku lulangu laye.

¹⁵ Dia dikambu ne, mbakandangana uma le ye etenyi undu, ne dia we ndjala la ndi pundju.

¹⁶ Aha uku fumbi ntu, keli luleki fumbi, uku unyasu la ngandji, le mi dime, keli djekaleka le ye, ndu lu dimba diandi ndu le Khumadiondjo.

¹⁷ Okone, naka we ambumbetawo uku umbekesanedi, kulunguli uku dime.

¹⁸ Keli naka ndi akakutshela kolo, kana ndi la ye dibasa, ukitsha dikambu diako Vote ami.

¹⁹ Dimi, Paulu, kambufunda la lunya lami, layongela diango diako — keli hakutela nti: We keli la mi dibasa dia utundu aye weme.

²⁰ Mete, unyasu, ongenyangenya le Khumadiondjo, usalanganya utenia ami le Kristu.

²¹ Ne dia dimi la elungamelu kʼukitanyia aye, mbamumukufundela okone. Dimi mbeyaka nti: We ayutsha akambu wuleki wakutelami.

²² Keli onongoswele pangu, ne dia lambulungamela nti: Uma lu alombelo anyu, mbayumukimoma le nyu.

²³ Epafara, unyami usi lukanu le Kristu Jesu, ambukutumela moyo.

²⁴ Ndu Mako, la Aristarako, Demasi, la Luka, any ami ekambi, wambukutumela moyo.

Diui DiʼEtshokwelo

²⁵ Ngandji ka mamba ka Khumesu Jesu Kristu kayali lʼetema anyu! Ayali osoku!