Ezera 8 - La Bible en Otetela (Bible K'Ekila) 1991

¹ Ete wa khumbu ya washewo la ekondo wʼeutwelu a waku wakayi la mi uma la Babilona, lu nshi ya diulelu dia khumʼekanga Aratashasta, ene.

² Uma lʼatei wʼasika Finehasi, Ngereshome; uma lʼatei wʼasika Itamara, Danyele; uma lʼatei wʼasika Davidi, Hatushe,

³ ukana a Shekaniya; uma lʼatei wʼasika Paroshe, Zekariya, ndi la wane wakalema kame la ndi lu okondo wʼeutwelu, waki apami lukama la akumi atanu;

⁴ uma lʼatei wʼasika Pahata-Moaba, Eliyehoenai, onʼa Zerahiya, ndi la apami kama hyendi;

⁵ uma lʼatei wʼasika Zatu, Shekaniya, onʼa Jahaziyele, ndi la apami kama shatu;

⁶ uma lʼatei wʼasika Adina, Ebede, onʼa Jonatana, ndi la apami akumi atanu;

⁷ uma lʼatei wʼasika Elame, Jeshaya, onʼa Ataliya, ndi la apami akumi esambeli;

⁸ uma lʼatei wʼasika Shefatiya, Zebadiya, onʼa Mikaele, ndi la apami akumi enanei;

⁹ uma lʼatei wʼasika Joaba, Obadiya, onʼa Jehiyele, ndi la apami kama hyendi dikumi la enanei;

¹⁰ uma lʼatei wʼasika Bani, Shelomita, onʼa Josifiya, ndi la apami lukama la akumi asamalu;

¹¹ uma lʼatei wʼasika Bebai, Zekariya, onʼa Bebai, ndi la apami akumi ahendi la enanei;

¹² uma lʼatei wʼasika Azingade, Johanana, onʼa Hakatana, ndi la apami lukama la dikumi;

¹³ uma lʼatei wʼasika Adonikame, wane wakayuya lʼokongo, kumbu yawo nye: Elifelete, Jeuele la Shemaya, vo la apami akumi asamalu;

¹⁴ uma lʼatei wʼasika Bingivai: Utai, la Zakura, vo la apami akumi esambeli.

¹⁵ Dimi lakasanganya kame lasuki lʼokedi watulambulaka Ahava. Shu takahangi leko nshi shatu, dimi lakashishima wudja la elombedi, ku dimi kuntana nduku usi Lewi.

¹⁶ Dimi lakatumi diui dia ntela ewandji: Eliyezere, Ariyele, Shemaya, Elenatana, Jariba, Elenatana, Natana, Zekariya la Meshulama, la embetsha Joyariba la Elenatana.

¹⁷ Lakatumi diui le uwandji Ido lakadjashi la Kasifiya, lakawatela kene kakawahumbi ntutela Ido ndi la anangu, alami wʼetemwelo, waki la Kasifiya, dia vo ntela ekambi wa luudu la Unyashungu asu.

¹⁸ Uku aki lunya lʼololo la Unyashungu asu le su, vo wakatela Sherebiya, pami ka yimba uma lʼatei wʼasika Mali, onʼa Lewi, onʼa Isariyele ndi la anʼandi la anangu, antu dikumi la enanei;

¹⁹ la Hashabiya, ndi la Jeshaya uma lʼatei wʼasika Merari, kame la anangu la anʼawo, antu akumi ahendi;

²⁰ uma lʼatei wʼalami wʼetemwelo, wakatadji Davidi la ewandji lʼulimu wʼasi Lewi, alami wʼetemwelo kama hyendi la akumi ahendi. Vo tshe wakafundama kumbu.

²¹ Dimi lakati dia shu nkila mbu ya nde leko lʼumamu wa ndjali kʼAhava, dia shu ndjakitshakitsha la ntundu ka Unyashungu asu, la mbolomba lokendo lʼololo lu dikambu diʼana asu la diango diasu.

²² Lakuki sonyi dia nomba khumʼekanga ului wʼalimbi la ambahemi wa falasa dia ntatulamaka lu mbuka uma le utunyi, ne dia shu takatelaka khumʼekanga shati: Lunya la Unyashungu asu leko le wane watuyangaka dia ntsha ololo. Keli wulu andi la kele kandi katuyalaka le waku tshe watosekaka.

²³ Diako mbakatakili mbu ya nde, mbakatalombaka Unyashungu asu lu dikambu diako, ku ndi akatukela.

²⁴ Dimi lakasonola ewandji dikumi la ehendi wʼelombedi, Sherebiya, Hashabiya, vo la anengewo dikumi.

²⁵ Dimi lakawaedikela fesa, paunyi, diango diʼulimu, eshasha wakakimo khumʼekanga, andaki andi, ewandji andi, la asi Isariyele tshe waki leko dikambu dia luudu la Unyashungu asu.

²⁶ Dimi lakawasha talata ya fesa kama shamalu la akumi atanu, diango diʼulimu yediko ya talata ya fesa lukama, ndu ya talata ya paunyi lukama,

²⁷ alonga wa paunyi wʼafuku akumi ahendi waki la wutshu wa darika kinunu, ndu diango pendi diʼulimu diʼohotela wa pudipudi uku paunyi.

²⁸ Dimi lakawatela nti: Nyu nyeli ekila le Latuyalaka, ndu diango diʼulimu ne dieli ekila, fesa la paunyi nye yeli eshasha wa lulangu le Latuyalaka, Unyashungu washenyu.

²⁹ Nyumbi diango ne ololo, nyudilamaki edja ndu nyambutudiedika la ntundu kʼewandji wʼelombedi la asi Lewi, ndu la ntundu kʼewandji wa khumbu yʼasi Isariyele la Jerusalema, lu mvudu ya lʼetei a luudu la Latuyalaka.

³⁰ Okone elombedi la asi Lewi wakalungula wetshu ene wa paunyi la wa fesa ndu diango diʼulimu dia diela uya la Jerusalema lu luudu la Unyashungu asu.

³¹ Shu takunela uma lu ndjali kʼAhava lu lushi la dikumi lʼahendi la ngondo ka ntundu dia ndja uya la Jerusalema. Lunya la Unyashungu asu laki la su. Ndi akatushimbela uma lʼanya wʼutunyi ndu uma lu lalu tshe laki lu mbuka.

³² Shu takakumi la Jerusalema, takumuya nshi shatu.

³³ Lushi la nei, shu takedika fesa la paunyi la diango diʼulimu lu luudu la Unyashungu asu, takadikimo le Meremote, onʼa olombedi Uriya, ndi la Eleazara, onʼa Finehasi, waki kame lʼasi Lewi; Jozabada, onʼa Jeshua, la Noadiya, onʼa Binui.

³⁴ Takali diango tshe, takadiedika, ku takafundi wetshu adio tshe.

³⁵ Asi wudja waki lu fumbi wakakalula uma lu lohombo, wakayulambula esongo wa ngombe dikumi la ehendi dikambu dia Isariyele tshe, ekoko a waumi akumi divwa la esamalu, esongo wʼekoko akumi esambeli la esambeli, elambu wa lutshumba le Unyashungu a Isariyele, ndu weumbi wa mbudi dikumi la ehendi ne dia ulambu wa kolo. Waso tshe waki ulambu wa lutshumba le Latuyalaka.

³⁶ Vo wakayukimo adjangu wa khumʼekanga le elohe andi, ndu le embuledi wa lu leke lone la Wedi a Ndjali. Ku vo wakakimanyiaka wudja ndu lu luudu la Unyashungu.