Ezera 7 - La Bible en Otetela (Bible K'Ekila) 1991

Eyelu ka Ezera la Asikandi la Jerusalema

¹ Lʼokongo wʼakambu aso, lu nshi ya diulelu dia Aratashasta, khumʼekanga ka Peresiya, Ezera, onʼa Seraya, onʼa Azariya, onʼa Hilikiya,

² onʼa Shaluma, onʼa Zadoka, onʼa Ahitube,

³ onʼa Amariya, onʼa Azariya, onʼa Merayota,

⁴ onʼa Zerahiya, onʼa Uzi, onʼa Buki,

⁵ onʼa Abishua, onʼa Finehasi, onʼa Eleazara, onʼa Arona, olombedi wa ladiku,

⁶ akayi uma la Babilona. Ndi aki ufundji wakaleki mbeya elembe wa Mose, wakadji Latuyalaka, Unyashungu wa Isariyele. Khumʼekanga akawusha kene tshe kakandalombe, ne dia lunya la Latuyalaka, Unyashungu andi, laki la ndi.

⁷ Lʼeleku kʼesambeli ka diulelu dia khumʼekanga Aratashasta, asi Isariyele amotshi, elombedi, asi Lewi, amembi wa diango la alami wa luudu la Unyashungu wakunela dia ndja uya la Jerusalema.

⁸ Ndi akayi la Jerusalema lu ngondo ka tanu lʼeleku kʼesambeli ka diulelu dia khumʼekanga.

⁹ Ndi akunela uma la Babilona lushi la ntundu la ngondo ka ntundu, ku akayukuma la Jerusalema lushi la ntundu la ngondo ka tanu, ne dia lunya lʼololo la Unyashungu andi laki la ndi.

¹⁰ Ezera akadji utema andi dia mbeka la ntsha elembe wa Latuyalaka, la mbetsha elembe ako la adjangu lʼatei wa Isariyele.

¹¹ One eli aui wʼuma lu mukanda wakasha khumʼekanga Aratashasta Ezera, olombedi la ufundji wʼelembe la adjangu wa Latuyalaka le Isariyele:

¹² Aratashasta, khumʼekanga ka khumi ya dikanga, le Ezera, olombedi la ufundji wʼelembe wa Unyashungu a lʼulungu. Kakiane,

¹³ dimi lambudjanga didjangu diʼasi Isariyele tshe, elombedi awo, ndu asi Lewi wa lu diulelu diami, weli la lulangu la ntsho la Jerusalema, watshu kame la ye.

¹⁴ Dimi khumʼekanga la andaki ami esambeli mbambukutuma dia ntukemba Juda la Jerusalema lu dikambu diʼelembe wa Unyashungu aye weli lʼanya aye.

¹⁵ Ndu dia ntola fesa la paunyi yambumukimo dimi khumʼekanga la andaki ami, eshasha wa lulangu le Unyashungu wa Isariyele, leli la edjaselu la Jerusalema,

¹⁶ ndu fesa tshe la paunyi tshe yayuyutana lu leke tshe la Babilona kame la eshasha wa lulangu wʼasi Isariyele la wʼelombedi wambuwukimo lʼutema otoi dikambu dia luudu la Unyashungu awo, leli la Jerusalema.

¹⁷ Kutusumbi esongo wa ngombe, ekoko a waumi, esongo wʼekoko kame la elambu awo wa shima la wa lutela la falanga nye dia ntelambula lʼediakelu lu luudu la Unyashungu anyu, leli la Jerusalema.

¹⁸ Kanyutshi la fesa la paunyi yayutshikala wuhu weli ololo lu ashu anyu we la ananyo, uku lulangu la Unyashungu anyu.

¹⁹ Kutukitsha diango diʼulimu tshe diambuwukusha dikambu dia luudu la Unyashungu aye, la ntundu ka Unyashungu wa Jerusalema.

²⁰ Kutosaki engo kekina tshe kayuyuhumbaka dia nkimo lʼehumba ekina wa luudu la Unyashungu aye ima lu luudu la waumbelu wa khumʼekanga.

²¹ Dimi khumʼekanga Aratashasta, lambudjangela alami tshe a waumbelu weli lu leke luku la Wedi a Ndjali didjangu dia vo nkimoka kene tshe kayuyolombaka, we Ezera, olombedi la ufundji wʼelembe wa Unyashungu a lʼulungu,

²² edja ndu yediko ya talata ya fesa lukama, tediko tʼepunga lukama, bata ya wanu lukama, bata ya iso lukama, la leho aha la yediko.

²³ Kene tshe kambudjanga Unyashungu a lʼulungu dikambu dia luudu landi, kambuhumba ntshama tshe, ne dia kele katukuyala lu diulelu diami, dimi khumʼekanga, la anʼami.

²⁴ Ndu shu tambunyulimbitshiya lu dikambu diʼelombedi, asi Lewi, emimbi, alami wʼasuku, alami wʼetemwelo la ekambi wa luudu luku la Unyashungu shati: Tanyalombaki nduku engo kuyanga mbafutsha ulambu, kana mbadja lʼulimu.

²⁵ We, Ezera, osonole elohe la embadi uku yimba ya Unyashungu aye yeli la ye, dia vo nsambulaka akambu wʼantu tshe weli lu leke la Wedi a Ndjali, wane tshe weya elembe wa Unyashungu aye. Ku kelimbitshiya wane wahatelimbitela.

²⁶ Untu tshe lahuyela elembe wa Unyashungu aye la elembe ami, dimi khumʼekanga kayali la unungu wa ndjakema, wa mbitshanyema uma lu wudja, wa nfuta diango kana mboto lu lukanu.

²⁷ Latuyalaka, Unyashungu a washesu, lakadji saki kene ka nduwanya luudu la Latuyalaka leli la Jerusalema lʼutema a khumʼekanga, atumbwami!

²⁸ Ndi ambomenya ngandji kandi ka mamba la ntundu ka khumʼekanga, andaki andi la ntundu kʼewandji tshe a wulu wa khumʼekanga. Latuyalaka, Unyashungu ami, kakankikitsha, la lunya landi laki ladiku diami, mbakamasanganya ewandji wa Isariyele dia ntsho la mi.