Ezera 6 - La Bible en Otetela (Bible K'Ekila) 1991

¹ Khumʼekanga Dariyo akadjanga dia nyanga lu luudu lʼakondodi wʼekondo, lene akawakitshaka aumbelu la Babilona.

² Vo wakatani wombo wʼakatshi wakafundami aui ane la Ekibatana, usumba a wuki wa lu leke la Mediya, ati:

³ Lʼeleku ka ntundu ka khumʼekanga Kuro, khumʼekanga Kuro akadji olembe one lu dikambu dia luudu la Unyashungu la la Jerusalema ati: Luudu lahikami, dia lo ndjala lu dihuli diʼantu nambulaka elambu ndu layali lʼetshina ka wulu. Lo kaluyali kubita akumi asamalu lu wemema, kubita akumi asamalu lu wuki,

⁴ enongo esatu wʼave a waki, la onongo otoi wʼetamba wʼeyuyu. Ulimu oso tshe kawufutami uma lu luudu la khumʼekanga.

⁵ Kawukaluya diango diʼulimu dia paunyi ndu dia fesa diakatoshi Nebukadineza uma lu luudu la Unyashungu leli la Jerusalema, diakandela la Babilona. Kawutukitsha engo lʼengo lu dihuli diaki to lu luudu la Unyashungu.

⁶ Kakiane we Tatenai, umbuledi a leke luku la Wedi a Ndjali, Shetara-Bozenai, la anyanyu ambuledi weli la Wedi a Ndjali, nyumo uma lu dihuli diku.

⁷ Nyakimo dia vo ntsha ulimu wa luudu luku la Unyashungu. Umbuledi wʼasi Juda la dihangamendi dia Juda waluhiki lu dihuli diaki lo.

⁸ Didjangu ne mbamumunyudjangela dia nyu ntsha lu dikambu dia dihangamendi dia Juda ne, ne dia mpika luudu luku la Unyashungu. Uma lu diango dia khumʼekanga diatulambulaka antu lu leke luku la Wedi a Ndjali, mbayunyufutaka apami ako watsha ulimu, ne dia ulimu watukutshila.

⁹ Kawuwashaki diango diahumbawo la lushi la lushi, esongo wa ngombe, ekoko a waumi, esongo wʼekoko, ne dia elambu wa lutshumba le Unyashungu leli lʼulungu, ndu epunga, leho, wanu la iso uku ayolombaka elombedi wa la Jerusalema,

¹⁰ dia vo nambulaka elambu weli la upumu vʼololo le Unyashungu leli lʼulungu, la dia vo nombelakami, dimi khumʼekanga, la anʼami Unyashungu.

¹¹ Dimi lambudjanga ntu nti: Naka untu ayu-kadimula diui ne, kawunya usimbi uma lu luudu landi, kawuhane loko. Luudu landi kaluyali ului wa diango dia nyetete.

¹² Unyashungu lakashikike lukumbu landi leko, alembia khumʼekanga tshe la wudja tshe wayuhindula diui diami kana nsimbula anya dia nanya luudu luku la Unyashungu leli la Jerusalema. Dimi Dariyo kambudjanga didjangu ne. Dieli la dio dia ntshama tshe.

¹³ Tatenai, umbuledi wa lu leke luku la Wedi a Ndjali, Shetara-Bozenai la anyawo tshe, wakatshi tshe uku didjangu diakawadjangela khumʼekanga Dariyo.

¹⁴ Dihangamendi diʼasi Juda diakatetemala mpika luudu lako. Vo wakahumo lukulu lʼolo uku akati umvutshi Hangai, la Zekariya, onʼa Ido. Vo wakashidiya luudu uku didjangu diakadjanga Unyashungu wa Isariyele, ndu uku didjangu diakadjanga Kuro, Dariyo la Aratashasta, khumʼekanga ka Peresiya.

¹⁵ Luudu lako lakashili lu lushi la satu la ngo-ndo ka Adara, lʼeleku ka samalu ka diulelu dia khumʼekanga Dariyo.

¹⁶ Asi Isariyele, elombedi, asi Lewi la asi wudja akina waki lu lohombo, wakatshi ekidielu ka luudu lone la Unyashungu lʼongenongeno.

¹⁷ Vo wakalambula esongo wa ngombe lukama, ekoko a waumi kama hyendi, esongo wʼekoko kama nyei, ne dia nkidia luudu lako la Unyashungu; la weumbi wa mbudi dikumi la ehendi, uku efula ka wedja wa Isariyele, dia ntungela Isariyele tshe ekesanelu.

¹⁸ Vo wakakitsh? elombedi lu elui awo, lʼasi Lewi lu elui awo, dia nkambela Unyashungu leli la Jerusalema ulimu, uku wufundami lu buku dia Mose.

¹⁹ Ku antu waki uma lu fumbi wakatshi dambu diʼelekanelu lu lushi la dikumi la anei lu ngondo ka ntundu

²⁰ Laso ku elombedi la asi Lewi wakashili ndjaedia vo tshe kame. Vo tshe wakayala pudupudi, wakadiaki osongo wʼokoko wa dambu diʼelekanelu dikambu diʼantu tshe wʼuma lu fumbi, ne dia anengewo elombedi, ndu dikambu diawo vame.

²¹ Asi Isariyele tshe wakakalula uma lu lohombo ndu waku tshe wakayatula uma lu mindu ya wedja wa lu kete ku dia nyanga Latuyalaka, Unyashungu wa Isariyele, wakali.

²² Vo wakalemia lushi la wuki la ma diaha la edya yediko ya nshi esambeli, ne dia Latuyalaka akangenyangenya, akakadimula utema wa khumʼekanga kʼAsuriya uya le wo dia mbasukela lʼulimu wa luudu la Unyashungu, Unyashungu wa Isariyele.