Ezera 5 - La Bible en Otetela (Bible K'Ekila) 1991

Wambuhika Etemwelo Ntu

¹ Umvutshi Hangai, la umvutshi Zekariya, onʼa Ido, wakatelaka asi Juda la asi Jerusalema akambu wahatayi lu lukumbu la Unyashungu wa Isariyele laki ladiku diawo.

² Ku Zerubabele onʼa Shalatiyele, la Jeshua, oiʼa Jozadaka, wakunela, wakatatela mpika luudu la Unyashungu la Jerusalema. Amvutshi wa Unyashungu waki kame la wo, wakakimanyia.

³ Etena keso, Tatenai, umbuledi a leke lone la Wedi a Ndjali, Shetara-Bozenai, la anyawo wakayi, wakayuwambula vati: Akona akanyusha wulu wa mpika luudu lone ndu wa mpika peli ne?

⁴ Vo waka-wambula ntu vati: Na kumbu yʼapami wahika luudu lone?

⁵ Keli su dia Unyashungu diakalamaka dihangamendi diʼasi Juda. Vo kumbashimba nkamba ulimu lamʼakawatumi diui le Dariyo vati: Edja ndu lamʼayutulungula mukanda lu dikambu ne.

⁶ Tatenai, umbuledi a leke lone la Wedi a Ndjali, Shetara-Bozenai la asikandi ambuledi waki lu leke la Wedi a Ndjali wakafundela khumʼekanga Dariyo mukanda.

⁷ Aui waki lu mukanda ako ane: Khumʼekanga Dariyo, Moyo.

⁸ Khumʼekanga, shu takatshu lu leke la Juda utsha la luudu la Unyashungu a wuki, lahikawo lʼave a waki ndu lambuwahe esimbi ladiku dia peli. Vo weko lu ntsha ulimu oso esadi esadi ndu wambuluwanya.

⁹ Shu takateketa la dihangamendi, takawambula shati: Akona akanyusha wulu wa mpika luudu lone ndu wa mpika peli ne?

¹⁰ Shu takawambula ndu kumbu yawo dia shu mbeya nkufundela kumbu yʼelombodi awo.

¹¹ Ku vo wakatukaluya diui vati: Shu teli ekambi wa Unyashungu a lʼulungu ndu wa la kete, shu taya lu mpika luudu lakahikama edjedja. Khumʼekanga ka wuki akataluhiki, akalushidiya.

¹² Keli lʼokongo diku lamʼakukia washesu Unyashungu a lʼulungu kele, ndi akakimo lʼanya wa Nebukadineza, khumʼekanga ka Babilona, usi Kaladiya, lakayulanya luudu lone ndu lakatole wudja one fumbi utsha la Babilona.

¹³ Lʼeleku ka ntundu ka diulelu dia Kuro, khumʼekanga ka Babilona, Kuro akadji olembe dia luudu lone la Unyashungu mpikama ntu.

¹⁴ Diango diʼulimu dia paunyi la fesa diʼuma lu luudu la Unyashungu la Jerusalema diakatoshi Nebukadineza dia ntudja lʼetemwelo ka Babilona, diango diako mbakatundja khumʼekanga Kuro uma lʼetemwelo ka la Babilona. Ndi akadikimo le Sheshibazara, lakandadji umbuledi.

¹⁵ Ndi akawutela ad: Ose diango diʼulimu ne, utshu, utudikitsha lʼetemwelo keli la Jerusalema. Luudu la Unyashungu lahikami ntu lu dihuli diaki lo.

¹⁶ Okone Sheshibazara akayi, akayuhika etshina ka luudu la Unyashungu leli la Jerusalema uma lʼetena kako, edja ndu kakiane lo leko lu mpikama, keli latashili.

¹⁷ Kakiane, we khumʼekanga, naka we alanga, antu wayangi lu luudu lʼaumbelu wa knumʼekanga wa la Babilona, dia mena kana khumʼekanga Kuro akatadji olembe wa mpika luudu la Unyashungu la Jerusalema. Ku we khumʼekanga, kututumi diui dialangaye lu dikambu ne.