Ezera 4 - La Bible en Otetela (Bible K'Ekila) 1991

Atunyi Wambushimba Ulimu

¹ Lamʼakuki atunyi wa Juda la Bendjamina lukumu vati: Asi wudja waki lu fumbi wambuhikela Latuyalaka, Unyashungu wa Isariyele, etemwelo,

² vo wakayi le Zerubabele, ndu le ete wa khumbu ya washewo, wakayuwatela vati: Tuhiki kame la nyu, ne dia ndu shu mbatotemolaka Unyashungu anyu uku nyu, mbatulambulaka elambu umaka etena kakatela Esare-Hadona, khumʼekanga kʼAsuriya lindu.

³ Keli Zerubabele, Jeshua, la ete ekina wa khumbu ya Isariyele wakakaluya diui vati: Nyu kema la dikambu dia nkamba kame la su dia mpikela Unyashungu asu luudu, shu shame mbayuhikela Latuyalaka, Unyashungu wa Isariyele, luudu uku akatudjangela khumʼekanga Kuro, khumʼekanga ka Peresiya.

⁴ Antu wakadjashi lu kete yako wakahekuya asi Juda, wakawautsha woma dia mbashimba mpika luudu.

⁵ Vo wakafutaka andaki dia nfutanya esangweyu kawo nshi ya lumu tshe ya Kuro, khumʼekanga ka Peresiya edja ndu lu diulelu dia Dariyo, khumʼekanga ka Peresiya.

⁶ Lu nshi yʼetatelu ka diulelu dia Ahasuera, vo wakafundi mukanda wa nsongwela asi Juda la Jerusalema.

⁷ Lu nshi ya Aratashasta, Bishilame, Mitiredate, Tabele, la anyawo akina wakafundela Aratashasta, khumʼekanga ka Peresiya mukanda. Mukanda akafundama lu oteketa wʼasi Arama, ku vo waka-kadimwama uma lʼoteketa wʼasi Arama.

⁸ Rehume, umbuledi wʼalimbi, la Shimishai, ufundji, wakafundela khumʼekanga Aratashasta mukanda lu dikambu dia Jerusalema okone —

⁹ ku umbuledi wʼalimbi Rehume, ufundji Shimishai la anyawo akina, embadi, embuledi wa beke, asi mbalasa, asi Peresiya, asi Ereke, asi Babilona, asi Susa, wetawo vati: Asi Elame, wakafundi mukanda,

¹⁰ vo la wedja ekina, wakawatole untu a wuki ndu la lukumu Osnapara dia ndi ntudjase lʼusumba wa Samariya ndu lu ahuli akina wa leke la la Wedi a Ndjali.

¹¹ Onʼeli aui wʼuma lu mukanda ako wakatumela khumʼekanga Aratashasta vati: Shu ekambi aye well lu leke lone la Wedi a Ndjali, tambukutumela moyo.

¹² We khumʼekanga, eyi wati: Asi Juda aku wakayi uma le ye, wambukuma le su la Jerusalema, wuhika usumba one wʼuhedia la wa kolo, wambushidiya peli dia lukumbu lawo, wambuhika tshina diawo.

¹³ We khumʼekanga, eyi wati: Naka vo wayuhika usumba one ndu wayushidiya peli dia lukumbu lawo, vo hawukulambulaka diango, hawufutaka ulambu ndu hawukukambelaka ulimu ntu, ku ekundjelu ka diulelu kayukitakita.

¹⁴ Ne dia shu tatolekaka leho lʼuma lu luudu la khumʼekanga, okone hasungana dia shu mena eonywelo ka khumʼekanga, diako mbambutukutumela, we khumʼekanga, akambu ane.

¹⁵ Wayangi lʼatei wa buku diʼEkondo wa washo, ku we ayutana ndu ayena lu buku diako ati: Usumba one weli usumba wʼuhedia efula wakasuya khumi ya dikanga ndu wedja, wambutate ntomboko uku nshi ya ntundu. Uma lu dikambu so mbakalanyema usumba one.

¹⁶ Shu tambukutumela diui dia mete, we khumʼekanga, shati: Naka wayuhika usumba one, naka wayushidiya peli dia lukumbu lawo, we huyala la kete ntu lu leke lone la Wedi a Ndjali.

¹⁷ Ku khumʼekanga akakaluya umbuledi wʼalimbi Rehume, ufundji Shimishai la anyawo akina wakadjashi la Samariya ndu lu beke dikina dia la Wedi a Ndjali ati: Moyo, nyu la wulu?

¹⁸ Wakali mukanda wakanyatutumela la ntundu kami.

¹⁹ Dimi lakadji didjangu dia vo nyanga, ku wakati vati: Usumba uku akahindwela khumi ya dikanga lu nshi yʼedjedja, ndu wakayalaka la uhedia, wakatombokwelaka khumi ya dikanga.

²⁰ Khumi ya dikanga ya wulu yakiko la Jerusalema, vo wakulelaka kete tshe ya lu leke luku la Wedi a Ndjali. Ku antu wakalambulaka diango, wakafutaka ulambu, ndu wakakambelaka ulimu.

²¹ Kakiane, nyudji olembe diʼantu nkimo ulimu ako, diaha vo mpika usumba uku, tshikima dime lambuwasha wulu.

²² Tanyutewalaki lu dikambu ne, ne dia kolo atu-kufula dia nanya khumi ya dikanga.

²³ Lamʼakawali mukanda wa khumʼekanga Aratashasta la ntundu ka Rehume, ufundji Shimishai la anyawo, vo wakatshu esadi utsha le asi Juda la Jerusalema, wakatuwanya la ngala la wulu uma lʼulimu.

²⁴ Ku ulimu wa luudu la Unyashungu la la Jerusalema wakashimbama, wakakimwama edja ndu eleku ka hendi ka diulelu dia Dariyo, khumʼekanga ka Peresiya.