Ezera 3 - La Bible en Otetela (Bible K'Ekila) 1991

Eulwelu kʼOtemwelo

¹ Lamʼakatatela ngondo kʼesambeli, asi Isariyele waki lʼusumba wakasangana kame uku untu otoi la Jerusalema.

² Ku Jeshua, onʼa Jozadaka la anangu elombedi, Zerubabele, onʼa Shealatiyele, la anangu wakunela, wakatshi ediakelu ka Unyashungu wa Isariyele dia nambula elambu wa lutshumba loko uku wufundami lu elembe wa Mose, umvutshi wa Unyashungu.

³ Vo wakakitsha ediakelu lu dihuli diato, ne dia vo wakuki wedja waki lu kete ku woma. Vo wakalambula elambu wa lutshumba le Latuyalaka ladiku diato, elambu wa lutshumba wa pindju ndu wa dikolo.

⁴ Vo wakalemia lushi la wuki tusamvu uku akafundama, wakalambula elambu wa lutshumba la lushi la lushi uku yediko yakawadjanga dia ntsha la lushi la lushi

⁵ Lʼokongo diku, vo wakalambula ulambu wa lutshumba wa nshi tshe, elambu wa lutshumba wa talelu ta ngondo ndu wʼalambu tshe wakawakidia le Latuyalaka, ndu wa untu tshe lakalambula elambu wa lulangu le Latuyalaka.

⁶ Vo wakatatela nambula elambu wa lutshumba le Latuyalaka umaka lushi la ntundu la ngondo kʼesambeli. Laso ku etshina ka luudu la Latuyalaka katahikama.

⁷ Vo wakakimo falanga le ambatshi wʼave la le etshudi wʼabaya. Vo wakakimo diango dia nde, dinono, la iso le asi Sidona la asi Tura, dia vo memba etamba wʼesasi wa la Lebanona uya lu ashi a waki wa Mediteraneya la mbaela lu ashi ako edja ndu la Jopa, uku wulu wakawose le Kuro, khumʼekanga ka Peresiya.

Wambutatela Mpika Etemwelo Ntu

⁸ Lʼeleku ka hendi ka eyelu kawo uya lu luudu la Unyashungu la Jerusalema lu ngondo ka hendi kakatatela Zerubabele, onʼa Shalatiyele, Jeshua, onʼa Jozadaka, ulimu kame la anengewo elombedi lʼasi Lewi wakatshikala ndu wane tshe wakakalula uma lu fumbi uya la Jerusalema. Vo wakasha asi Lewi waki la deku akumi ahendi kana ladiku okende wa namaka ulimu wa luudu la Latuyalaka.

⁹ Ku Jeshua, ndi la anʼandi la anangu Kademiyele, ndi la anʼandi, asika Juda, asika Henadada, vo la anʼawo lʼanengewo asi Lewi, wakunela vo tshe kame dia nama wane wakatshaka ulimu lu luudu la Unyashungu.

¹⁰ Lamʼakahikaka ambiki etshina ka luudu la Latuyalaka, vo wakakitsha elombedi wolotshi eloto kame la amama, la asi Lewi, asika Asafu kame la ekokoloko dia nambulaka Latuyalaka uku akadjanga Davidi, khumʼekanga kʼIsariyele

¹¹ Vo waketshanyaka lu esambu dia mandula la mbuka Latuyalaka lusaka, vati: Ndi eli ololo la ngandji kandi ka mamba katuyalaka pundju le Isariyele! Ku wudja tshe wakadjaka waelu wʼongenongeno wandula Latuyalaka ne dia etshina ka luudu la Latuyalaka kambuhikama.

¹² Elombedi efula, asi Lewi, ete wa khumbu yawashewo, dikumanyi diakenyi luudu la ntundu wakaleli tukuku ta wulu lamʼakawahikaka etshina ka luudu lako. Antu efula wakadji waelu lʼongenongeno,

¹³ wuhu wakiwo kumbeya ntshikitanya waelu wʼongenongeno la tukuku tʼalelu, ne dia antu wakadji lufungusu la wulu lakukema etali.