Ezera 1 - La Bible en Otetela (Bible K'Ekila) 1991

Didjangu dia Kuro

¹ Lʼeleku ka ntundu ka diulelu dia Kuro, khumʼekanga ka Peresiya, Latuyalaka akahashahasha yimba ya Kuro, dia diui dia Latuyalaka diakandati lʼunyo wʼumvutshi Jeremiya nshidiyama. Okone Kuro akadianganya didjangu lu diulelu diandi tshe lʼunyo ndu lu mukanda ati:

² Kuro, khumʼekanga ka Peresiya, kata ati: Latuyalaka, Unyashungu wa lʼulungu, akambisha waulelu tshe wa la kete. Ndi kakambisha okende wa dimi ntuhikela luudu la Jerusalema ya la Juda.

³ Untu tshe lʼatei anyu leli usi wudja wa Latuyalaka, Unyashungu andi, ayali la ndi! Ndi atshu la Jerusalema ya la Juda, dia ntuhika luudu la Latuyalaka, Unyashungu wa Isariyele — ndi keli Unyashungu leli la Jerusalema.

⁴ Lu dihuli tshe diudjashi atshikadi a wudja wa Latuyalaka, antu wa lu dihuli diku kawuwasha fesa, paunyi, ahondo, la dungalunga kame la eshasha wa lulangu ne dia luudu la Unyashungu leli la Jerusalema.

Ekalwelu Uya la Jerusalema

⁵ Ete wa khumbu ya Juda la ya Bendjamina wakunela vo lʼelombedi, asi Lewi, antu tshe wakahashahasha Unyashungu tumba tawo, dia ntuhika luudu la Latuyalaka la Jerusalema.

⁶ Wane tshe waki lasuki la wo wakawasha diango dia fesa, dia paunyi, ahondo, dungalunga, la diango diʼushinga a wulu ladiku dia eshasha tshe wa lulangu.

⁷ Khumʼekanga Kuro akatundja diango diʼulimu dia luudu la Latuyalaka diakose Nebukadineza uma la Jerusalema dia ntudja luudu la ditemolatemola diandi.

⁸ Kuro, khumʼekanga ka Peresiya, akati dia Mitiredate, umumbi wa diango dia nde ditundja, la disha Sheshibazara, uwandji wa Juda.

⁹ Lanʼeli efula ka dio: alonga wa paunyi akumi asatu, alonga wa fesa kinunu, kuwa akumi ahendi la divwa,

¹⁰ alonga wa paunyi wʼafuku akumi asatu, alonga wa fesa wʼafuku wa wuhu ukina kama nyei la dikumi, la diango dikina diʼulimu kinunu.

¹¹ Diango tshe diʼulimu dia paunyi la dia fesa diaki nunu tanu la kama nyei akumi asamalu la divwa. Sheshibazara akela diango so tshe uya la Jerusalema lamʼakawatumbi uma lu fumbi la Babilona.