Ezekiyele 8 - La Bible en Otetela (Bible K'Ekila) 1991

Enelo kʼAkambu wa Wononyi wa lu Jerusalema

¹ Lʼeleku ka samalu, lu lushi la tanu la ngondo ka samalu, lamʼakamadjashi lu luudu lami, dimi la dihangamendi dia Juda, lunya la Khumadiondjo Latuyalaka lakambahema.

² Dimi lakedia ashu, menyi ku efanelu kʼuntu kene. Uma lu dihuli diufanyi la lukindi utsha lʼesi, aki dja, la uma la lukindi landi utsha ladiku, aki efanelu ka ngaingai uku ohotela wa pudipudi.

³ Ku ndi akasimbula lunya, akankimela lu divu, ku Nyuma akambedia lʼasa kete la ulungu. Ndi akambela lu waenelo wa Unyashungu uya la Jerusalema, uya lu suku diʼeotwelo ka seke dia lʼatei diʼeledi utsha lu leke la ngelʼa kushi, lene aki efanelu ka kandjema kako katutungaka kandjema.

⁴ Enda lutumbu la Unyashungu wa Isariyele laki leko, uku akilo lu enelo kakamenyi lʼusui.

⁵ Ku ndi akamvutela ati: Onʼa untu, edia ashu aye kakiane utsha lu mbuka kʼutsha lu leke la ngelʼa kushi. Dimi lakedia ashu ami utsha lu mbuka kʼutsha lu leke la ngelʼa kushi, menyi ku efanelu ka kandjema kene lʼeotwelo, lu leke la ngelʼa kushi la suku diʼediakelu.

⁶ Ku ndi akamumbula ati: Onʼa untu, we henyi dikambu diatshawo diku? We henyi akambu wa wononyi a waki watutshaka khumbu ka Isariyele lane dia mbitshanyami uma lʼetemwelo kami? Keli we ayena akambu wa wononyi wuleki ane.

⁷ Ku ndi akambela uya lu suku dia seke. Lamʼakamedia ashu, menyi ku ushu one lu eheli ka lukumbu.

⁸ Ndi akamvutela ati: Onʼa untu, utshimi lu eheli. Lamʼakamatshimi lu eheli, menyi ku lukuki lone.

⁹ Ku ndi akamvutela ati: Oto, endi akambu wa kolo wa wononyi watshawo lane.

¹⁰ Dimi lakoto, ku lakenyi difanelu dia wehu wa diango tshe diayakutula, dia nyama ya wononyi, ndu dia dikishi tshe dia khumbu ka Isariyele, diusangwemi lu eheli lʼutshimba tshe.

¹¹ Apami akumi esambeli uma lʼatei a dihangamendi dia khumbu ka Isariyele wakemala la ntundu kadio. Kʼatei awo kakemadi Jazaniya, onʼa Shafana. Untu tshe akakimela lukinga landi la ntshumba malashi lu lunya, ku dinga dia malashi diakambela.

¹² Ku ndi akamumbula ati: Onʼa untu, we henyi akambu watsha dihangamendi dia khumbu ka Isariyele lu usheshe, uku eli untu lʼuntu la esatu lu luudu landi? Vo mvutaka vati: Latuyalaka hatenyi, Latuyalaka amboseka kete.

¹³ Ndi akamumvutela ati: We ayena ndu akambu akina wa wononyi a waki watuwutshaka.

¹⁴ Ndi akambela uya la suku diʼeotwelo dia luudu la Latuyalaka dia lu leke la ngelʼa kushi. Menyi ku amantu ane wudjashi, walelela Tamuza.

¹⁵ Ku ndi akamumbula ati: We onʼa untu, we henyi dikambu ne? We ayena ndu akambu wa wononyi wuleki ane.

¹⁶ Ku ndi akambela uya lu seke dia lʼatei dia luudu la Latuyalaka, menyi ku apami lasuki la akumi ahendi la atanu ane wemadi la suku dia luudu la Latuyalaka, lʼasa mbalasa lʼediakelu. Wuki ekongo awo utsha lʼetemwelo ka Latuyalaka, la dundji diawo dieledi utsha lʼehutwelu. Vo waki lu ntemola unya lu leke lako lʼehutwelu.

¹⁷ Ku ndi akamumbula ati: Onʼa untu, we henyi dikambu ne? Undi, dikambu dia tshitshe mbedio dia khumbu ka Juda ntsha akambu watuwutshaka lane, dia vo ndudia kete la akambu wa ngala, ndu nkalula lu etshelu ka akambu wa mbutshami kele? Vo wambuludia ehembe awo la sulu kawo.

¹⁸ Diako mbayumasuya la ududu ami. Ashu ami hawahandja; dimi haluwauka ketshi. Kuyanga vo wayulela lʼatui ami la delu dia wulu, dimi haluwaukela.