Ezekiyele 6 - La Bible en Otetela (Bible K'Ekila) 1991

Etelu kʼAkambu Wahatayi lu Dikambu dia Ekungu wa Isariyele

¹ Diui dia Latuyalaka diakayi le mi ati:

² Onʼa untu, ediya elundji kaye utsha lʼekungu wa Isariyele; uti akambu wahatayi lu dikambu diawo, wati:

³ Nyu ekungu wa Isariyele, nyulungi diui dia Khumadiondjo Latuyalaka. Khumadiondjo Latuyalaka kata lu dikambu diʼekungu la akuna, dia ekedi la ekidi ati: Enda, dimi lutsha mbela yombo dia ndo la nyu, layulanya alunga anyu.

⁴ Diakelu dianyu diayulanyema, la difanelu dianyu diayulanyema, la difanelu dia unya diayatshatshema. Dimi layukadja andjakemi anyu la ntundu ka dikishi dianyu.

⁵ Dimi layukitsha edu wʼasi Isariyele la ntundu ka dikishi diawo. Dimi layudianganya weka anyu lʼetshimba wa diakelu dianyu.

⁶ Lu ahuli tshe wudjashinyu, esumba anyu wayuyala atongo, la alunga anyu wayulanyema, dia diakelu dianyu mpandjwama, dia dikishi dianyu mbatshatshema la nanyema, la dia difanelu dianyu dia unya nyukwama, la dia elimu anyu nanyema pundju.

⁷ Antu wayudiakema, wayukalema kalakala lʼatei anyu. Ku nyu nyayeya nyati: Dimi keli Latuyalaka.

⁸ Keli dimi layutshika antu amotshi lʼatei anyu, wayutuhanda yombo lamʼayunyudianganyema lʼatei a waulelu.

⁹ Wane wayutshikala lʼatei anyu, wayutumbuho lʼatei a wedja wayuwotolama fumbi lamʼayumata etemʼawo wa kolo wakawanganyia uma le mi, ndu lamʼayumula ashu awo wakawaetoya dia vo ntemola dikishi. Vo wayutuyahetsha dia kolo yakawatshaka, ndu ne dia akambu awo tshe wa wononyi.

¹⁰ Ku vo wayeya vati: Dimi keli Latuyalaka. Dimi kumvuta diui dia mbatshela kolo kene utata.

¹¹ Khumadiondjo Latuyalaka kata ati: Nyuhumi shole, nyuhumeli lukulu. Nyuti nyati: Yee, lu akambu wa kolo wa wononyi wakatshaka khumbu ka Isariyele, ne dia vo wayudiakema la yombo, ndjala ka kasha la elandu!

¹² One leli etali, ayuvo lʼelandu; la one leli lasuki, ayudiakema la yombo; la one lambutshikala ndu lambuhanda, ayuvo la ndjala ka kasha. Osoku mbayumushidiya ududu ami le wo.

¹³ Lamʼayukalema edu wasi-kawo wambudiakema lʼatei a dikishi diawo, lʼetshimba wa diakelu diawo, lʼote wa dikuna tshe diʼutali, lʼete wʼekungu tshe, la tshina diʼutamba wʼuyuyu, ndu la tshina diʼuwamba wa mpukaa tshe, ndu lʼahuli wakawalambulaka dikishi diawo malashi, nyu nyayeya nyati: Dimi keli Latuyalaka.

¹⁴ Dimi layusimbula lunya lami dia ndo la wo, layete kete elanyelu, atongo atu lʼatei wʼadjaselu awo tshe uma lʼusui pulu ndu la Ribila. Ku vo wayeya vati: Dimi keli Latuyalaka.