Ezekiyele 47 - La Bible en Otetela (Bible K'Ekila) 1991

Ashi wʼEkonwelo Uma lʼEtemwelo

¹ Ndi akankaluya la suku diʼetemwelo, menyi ku ashi ane waya-tumbi uma la tshina diʼukingo wʼetemwelo wa lu leke lʼehutwelu (ne dia etemwelo kakeledi utsha lu leke lʼehutwelu); ashi wakahulo lʼesi eheli kʼetemwelo ka lunya la pami, waketi lu leke la diku dia kushi lʼediakelu.

² Ndi aketi la mi lu mbuka ka la suku ka lu leke la ngelʼa kushi, akatshimbi la mi uma lʼandia edja ndu lu suku dia lʼandja dia lu leke lʼehutwelu. Menyi ku ashi ane wayakele lu leke la lunya la pami.

³ Lamʼakatatshokaka untu omotshi utsha lʼehutwelu, ndi aki lʼokodi lu lunya, ndi akedika kubita kinunu. Ndi akatumbetsha lu ashi, ku ashi wakakumi pulu lu tokolongonyo.

⁴ Ndi akedika kubita kinunu ntu, akatumbetsha lu ashi, ku ashi wakakumi pulu ndu lʼadui. Ndi akedika kubita kinunu ntu; ndi akatumbetsha lu ashi, ku ashi wakakumi pulu ndu lu lukindi.

⁵ Lʼokongo diku ndi akedika kubita kinunu ntu; vo waki okedi waki kunkuka ntenanya, ne dia ashi waki dingunda, wakakuki ntsho usali; vo waki okedi wahakuki untu ntenyanya lʼekulu.

⁶ Ku ndi akamumumbula ati: Onʼa untu, we akenyi dikambu diku? Ku ndi akakalula la mi lʼumamu wʼokedi.

⁷ Lamʼakamakalula, dimi lakenyi etamba efula lʼumamu wʼokedi lu wedi la wedi.

⁸ Ndi akamvutela ati: Ashi ane watokelaka utsha lu leke lʼehutwelu, ku watuhuloka utsha lu Araba. Ku lamʼatotoka ashi wahakele wʼashi wa wuki loko, ashi ako watuyalaka tshitshi.

⁹ Lu ahuli tshe watokelaka okedi, diango tshe dia-katungama dieli la lumu, mbeyaka ntshikala la lumu. Nsi efula yayuyala loko, ne dia ashi wambuyala tshitshi. Engotshe kayuyala la lumu lu ahuli watokelaka okedi ako.

¹⁰ Amundji wa nsi wayemalaka lʼumamu wʼashi a waki. Vo wayaneka etei awo uma la Ene-Ngedi pulu ndu la Ene-Engalayima. Nsi yawo yayuyala efula wehu la wehu, uku nsi yeli lu Ashi a Mediteraneya.

¹¹ Keli lu ahuli wa loteke ndu wa nyanda, vo hawuyala tshitshi, vo wayutshikala leho lutu.

¹² Wehu tshe wʼetamba wʼelua wa lu wedi ehendi wʼokedi, akatshi awo hawolengela, la elua awo hawololololoka. Vo wayotoka elua la ngondo la ngondo, ne dia ashi watutumbaka uma lʼotemwelo. Elua awo wayuyala dimena dia nde, la akatshi awo wayuyala ukanga wa nkonoya antu.

Elelu la Ekahanyelu ka Kete

¹³ Khumadiondjo Latuyalaka kata ati: Onʼeli elelu wayuwukahanya kete yʼukito le wedja dikumi la ehendi wa Isariyele: Josefu ayukundja tenyi pindi.

¹⁴ Nyu nyayuyikahanya pupu, ne dia dimi lakatshimbi dia ndjisha washenyu. Kete nye yayuyala uku etenyi kanyu kʼukito.

¹⁵ Onʼeli elelu wa kete: lu leke la ngelʼa kushi, uma lʼashi wa Mediteraneya; uma lu mbuka ka Hetelona pulu ndu lʼeotwelo ka Zedade,

¹⁶ Berota, Sibarayima (weli lʼulelu lʼasa Damaseke la Hamata), pulu ndu la Elazere-Hatikona weli lʼulelu wa Haurana.

¹⁷ Okone ulelu ayuyala uma lu Ashi a Mediteraneya pulu ndu la Hazara-Enana, weli lʼulelu wa Damaseke. Ku Hamata eko lu leke la ngelʼa kushi lʼulelu ako. Oso eli ulelu wa lu leke la ngelʼa kushi.

¹⁸ Uma lu leke lʼehutwelu, ulelu wayeta uma la Hazara-Enana, lʼasa Haurana la Damaseke; vo wayeta lʼetei wa Jorodana, lʼasa Ngiliyade la kete ya Isariyele, utsha lʼuduwa wa lu leke lʼehutwelu pulu ndu la Tamara. Osoku mbayuyala ulelu wa lu leke lʼehutwelu.

¹⁹ Lu leke la diku dia kushi, ulelu wayeta uma la Tamara pulu lu ashi wa Meribate-Kadeshe. Ku uma leko, vo wayeta lu Kyoko ya Edjibitu, utsha lʼAshi a Mediteraneya. Osoku mbayuyala ulelu wa lu leke la diku dia kushi.

²⁰ Ulelu wa lu leke lʼedjelu wayuyala lu Ashi a Mediteraneya uma lʼulelu wa lu leke la diku dia kushi, edja ndu lʼeotwelo ka la Hamata. Osoku mbayuyala ulelu wa lu leke lʼedjelu.

²¹ Nyukahanya kete nye lʼatei anyu uku eli wedja wa Isariyele.

²² Kanyuyikahanya lʼatei anyu uku etenyi kanyu kʼukito lu eukelu kʼuwali, ndu le angendangenda wudjashi lʼatei anyu wayutaka ana lʼatei anyu. Vo wayuyala le nyu uku ana wa luta lʼatei wʼana wa Isariyele. Vo wayukundja etenyi kʼukito kame la nyu lʼatei wa wedja wa Isariyele.

²³ Kanyusha ongendangenda etenyi kandi kʼukito lu wudja wudjashindi, mbata Khumadiondjo Latuyalaka.