Ezekiyele 45 - La Bible en Otetela (Bible K'Ekila) 1991

¹ Lamʼayunyukahanya kete ya sangu lu eukelu kʼuwali, kanyukimo etenyi ka kete le Latuyalaka yediko yeli lʼutali wa kubita nunu akumi ahendi la tanu lʼutali, la nunu dikumi lu wekeki; yo tshe yayuyala ekila.

² Kose dihuli dia kubita kama tshanu lʼutali, la kubita kama tshanu lu wekeki, beke diedimi uma lʼetshi kako; ndu kubita akumi atanu ne dia seke dia lʼutshimba tshe.

³ Kediki dihuli lu etenyi kako ka kete, yediko ya kubita nunu akumi ahendi la tanu lʼutali, kubita nunu dikumi lu wekeki; dia etemwelo ndjala loko, lu dihuli diuleki ekila.

⁴ To keli etshi kʼekila lu kete; to kayuyala kʼelombedi watutshaka ulimu lʼetemwelo, watusukanaka dia ntshela Latuyalaka ulimu. Leko kayuyala mvudu yawo ndu kayuyala dihuli diʼekila ne dia etemwelo.

⁵ Etshi kekina keli lʼutali wa kubita nunu akumi ahendi la tanu, wekeki kubita nunu dikumi, kayuyala lʼasi Lewi, wane watutshaka ulimu lu etemwelo, uku etenyi kawo ka sangu, dia vo mpika esumta wa mbidjase loko.

⁶ Kanyediki etshi ka kubita nunu tanu lu wekeki, la kubita nunu akumi ahendi la tanu lʼutali, uku kete ya sangu yʼusumba. To kayusimbo la etshi kʼekila too; to kayuyala dikambu dia utundu wa khumbu ka Isariyele.

⁷ Etenyi kʼuwandji, kayuyala lu emamu ehendi wʼetshi kʼekila, la etshi ka kete yʼusumba. To kayusimbo lʼokongo wʼetshi kʼekila ndu lʼokongo wʼetshi ka kete yʼusumba, lu wedi wʼusumba. Utali ato ayuyala uku utali wa etshi kemotshi kakawedia umaka ulelu wa lu leke lʼedjelu edja ndu lʼulelu wa lu leke lʼehutwelu.

⁸ Oso ayuyala kete yandi, etenyi kandi ka sangu lu Isariyele. Okone ewandji ami hawengiya wudja ami ntu, keli vo wayukimwela khumbu ka Isariyele kete uku wedja awo.

⁹ Khumadiondjo Latuyalaka kata ati: Ambukuka! nyu ewandji wa Isariyele, nyunya akambu wa ngala la etshelu ka mpotola diango: nyutshaki akambu wʼusimbwi ndu wʼololo. Nyukimo etshelu ka nkambia antu ulimu la khudu, mbata Khumadiondjo Latuyalaka.

¹⁰ Nyuyali la tediko ta shikaa ta mbedika diango: kilo ka shikaa efa ya shikaa, la bata ya shikaa.

¹¹ Efa la bata kawuyali yediko otoi: bata kotoki etenyi otoi ka dikumi ka homera pupu. Yediko yawo kayosami uma lu homera.

¹² Shekele yanyu kayuyali shikaa, ngera akumi ahendi. Toshekele tutanu, katuyali toshekele tutanu; la toshekele dikumi, katuyali toshekele dikumi. Mina kaye, kayali toshekcle akumi atanu.

¹³ Onʼeli yediko yʼulambu yayunyukimoka: etenyi otoi ka samalu ka efa lu homera otoi kʼepunga wa menge la etenyi otoi ka samalu ka efa lu homera otoi kʼepunga wa yelela.

¹⁴ Lu dikambu dia iso, etenyi ka dikumi ka bata ka iso lu kora otoi (kora otoi mbotoka bata dikumi uku homera).

¹⁵ Kawukimoki okoko otoi uma lu ekoko kama hyendi wale adiyu wʼashashi lu Isariyele ne dia ulambu wa shima, ulambu wa lutshumba, la ulambu wa ki, dia vo ndjala ekesanelu, mbata Khumadiondjo Latuyalaka.

¹⁶ Kawushaki uwandji wa Isariyele ulambu one.

¹⁷ Uwandji ayuyala la okende wa nkimo ulambu wa lutshumba, elambu wa shima, la elambu wa dinono lu nshi ya waki lu talelu ta ngondo, lu nshi ya mumuya, la lu nshi ya waki tshe yakawashikike lu khumbu ka Isariyele. Ndi kalambulaki elambu wa kolo, elambu wa shima, elambu wa lutshumba, la elambu wa ki, dia ntungela khumbu ka Isariyele ekesanelu.

¹⁸ Khumadiondjo Latuyalaka kata ati: Lu lushi la ntundu la ngondo ka ntundu, kose osongo a ngombe waha la ekomo dia mbedia etemwelo.

¹⁹ Olombedi kose dikila diʼulambu wa kolo, kadimonge lu dikoho dia lu suku diʼetemwelo, lu atshuku anei wa ekingo wʼediakelu, ndu lu dikoho dia suku dia seke dia lʼetei.

²⁰ Kutshelaki wane watutshaka kolo ya-hawatungi lutunga, kana uma lu dinginya diawo, wuhu ako lu lushi lʼesambeli la ngondo. Osoku mbayunyedia etemwelo.

²¹ Kanyuyalaki la lushi la wuki lʼelekanelu lu lushi la dikumi la anei lu ngondo ka ntundu. Dambu kadiuyalaki nshi esambeli; kawolekaki ma diaha la edya lu nshi yako.

²² Lushi lako, uwandji kakimo osongo a ngombe, ulambu wa kolo lu dikambu diandi la dikambu diʼantu tshe wa lu wedja.

²³ Kalambulaki esongo wa ngombe esambeli, la ekoko a waumi esambeli waha la ekomo la lushi la lushi, lʼatei a nshi esambeli yako ulambu wi lutshumba le Latuyalaka; la mbudi kʼumi la lushi la lushi ne dia ulambu wa kolo.

²⁴ Ndi kalambuli ulambu wa shima, yediko ya efa otoi lu osongo lʼosongo a ngombe, efa otoi lu okoko lʼokoko wʼumi, la hina otoi ka iso lu efa la efa.

²⁵ Lushi la dikumi lʼatanu la ngondo kʼesambeli, ndi kalambulaki wuhu ako wʼelambu wa kolo, wʼelambu wa lutshumba, ndu wʼelambu wa shima kame la iso yediko ya nshi esambeli.