Ezekiyele 33 - La Bible en Otetela (Bible K'Ekila) 1991

Ulimu wʼUlami

¹ Diui dia Latuyalaka diakayi le mi ati:

² Onʼa untu, uteli antu wa wudja aye wati: Lamʼayumutuma yombo lu kete, ku naka wudja wayosonola untu omotshi dia mbukitsha ulami;

³ naka untu ako ayena yombo yayayi, ndi kadi dimama dia mbewula wudja.

⁴ Ku naka untu tshe layuka lundju la dimama heya mbewo yombo ya ta lamʼayuyuya dia ndjudiaka, dikila diandi diayahema lʼote andi.

⁵ Ndi akuki lundju la dimama, keli ndi kumbewo, dikila diandi diayuyala lʼote andi. Utunduyala ndi akewo, ndi utuhandja lumu landi.

⁶ Keli naka ulami ayena yombo yayayi, ku ndi hadi dimama; naka wudja kumbewoma, ku yombo yambudiaka untu omotshi lʼatei awo, untu ako ayuvo ne dia kolo kʼulami. Ku dimi layolomba dikila diandi uma lu lunya la ulami.

⁷ We onʼa untu, dimi lakakutshiki ulami le khumbu ka Isariyele. Dieli la ye dia mpukama aui wʼuma lʼunyo ami, la mbewula wa lu leke lami.

⁸ Lamʼayumutela untu a kolo nti: We ayuvo lu kolo, ku we hati diui dia mbukaluya uma lu mbuka kandi, untu ako ayuvo lu kolo kandi. Ku dimi layukolomba dikila diandi.

⁹ Keli naka we ayewula untu a kolo dia mbukaluya uma lu mbuka kandi, ku ndi hakalula, ndi ayuvo lu kolo kandi. Ku we ayushimbela lumu laye.

Mbuka ka Latuyalaka Keko Usimboki

¹⁰ We onʼa untu, uteli khumbu ka Isariyele wati: Nyu mvutaka nyati: Ehedia asu la kolo yasu yeko le su, shu tambusuwa efula lu dikambu diayo. Ku ukundi ayutuyala la lumu?

¹¹ Uwateli wati: Khumadiondjo Latuyalaka kata ati: Uku wemi la lumu! Dimi hangenangena nyoi kʼuntu a kolo! Dimi nangaka ndi nkalula uma lu kolo kandi, la ndi ndjaja la lumu. Nyukaluli, nyukaluli uma lu mbuka yanyu ya kolo. Khumbu ka Isariyele, ukundi alanganyu mvo?

¹² We onʼa untu, uteli asi wudja aye wati. Ololo wʼuntu ololo huwahandja lu lushi lʼuhedia andi; la kolo kʼuntu a kolo huwalembia lu lushi lalangandi mumo uma lu kolo kandi; pupu ndu untu ololo heyi ntshikala la lumu lu ololo andi lu lushi lʼuhedia andi.

¹³ Kuyanga dimi lambutela untu ololo dia ndi numba, keli naka ndi ayekama ololo andi, ndu ambutsha kolo, etsha andi wʼololo tshe wayuhamamela. Ku ndi ayuvo lu kolo kakandatshi.

¹⁴ Ndu naka dimi lambutela untu a kolo nti: Mete, we ayuvo! Keli naka ndi ambukalula uma lu kolo kandi, ambutsha akambu wʼusimbwi la wʼololo,

¹⁵ naka ndi ambukaluya osombelo, ambukaluya kene kakandahotola lohotola, ndu ambuyela elembe wa lumu, hatshi dikambu dia kolo, ndi ayuyala la lumu, ndi huvo.

¹⁶ Kolo tshe yakandatshi, yayuhamamela. Ndi ayuyala la lumu ne dia ndi ambutsha akambu wʼusimbwi ndu wʼololo.

¹⁷ Keli wudja aye mvutaka vati: Mbuka ka Khumadiondjo kema ololo, lamʼeli mbuka yawo kema ololo.

¹⁸ Naka untu ololo ambukadimo uma lʼololo andi, ambutsha kolo, ndi ayuvo lu kolo kako.

¹⁹ Naka untu a kolo ayukadimo uma lu kolo kandi, ayutsha akambu wʼusimbwi ndu wʼololo, ndi ayulumba uma lʼololo ako.

²⁰ Keli nyu khumbu ka Isariyele, nyu mvutaka nyati: Mbuka ka Khumadiondjo kema ololo. Dimi layunyulu-mbuya untu lʼuntu uku eli etsha andi.

Lukumu lʼEkwelo ka Jerusalema

²¹ Lu eleku ka dikumi la ahendi, lu lushi la dikumi lʼatanu la ngondo ka dikumi, lu lohombo lasu, untu omotshi lakahandi uma la Jerusalema, akayi le mi; akamvutela ati: Usumba wambulanyema.

²² Lunya la Latuyalaka lakayala le mi la dikolo, la ntundu ka undawi atakumi. Latuyalaka akadihula unyo ami lasuki lʼetena kakukumi untu ako le mi la pindju. Unyo ami akadiho, ku dimi kundjala lumi ntu.

²³ Diui dia Latuyalaka diakayi le mi ati:

²⁴ Onʼa untu, waku wudjashi lu ahuli wʼelanyelu, lu kete ya Isariyele, mvutaka vati: Abarahama aki untu otoi, ku ndi akakiti kete nye. Keli shu teko ntu efula, wakatusha kete nye ukito.

²⁵ Okone uwateli wati: Khumadiondjo Latuyalaka kata ati: Nyu nyatolekaka ma kame la dikila, nyatediaka ashu utsha le dikishi dianyu, nyatutundjaka dikila. Nyu mbeyaka nkita kete uka?

²⁶ Nyu nyatekamaka tombo tanyu, nyatutshaka akambu wa wononyi. Nyu tshe untu lʼuntu atusuwulaka wadi a unyandi. Nyu mbeyaka nkita kete uka?

²⁷ Uwateli wati: Khumadiondjo Latuyalaka kata ati: Uku wemi la lumu! Waku wudjashi lu ahuli wakalanyema, wayudiakema la yombo; waku weli lʼusui, wayuyala mbu ya nde ya nyama; ndu wane weli lu ahuli a wulu la lu weuku, wayuvo la elandu.

²⁸ Dimi layete kete tongo la shenga tshu; utaku a wulu awo wayushila. Ekungu wa Isariyele wayutshikala anyanya: nduku untu layeta leko ntu.

²⁹ Ku vo wayuli-mbitela vati: Dimi keli Latuyalaka, lamʼayumete kete tongo la shenga tshu, ne dia akambu wa wononyi tshe wakawatshi.

³⁰ Keli we onʼa untu, asi wudja aye watutanelaka lu dikambu diaye lu peli ndu lu asuku a mvudu, watutanelaka, untu lʼuntu, vati: Tutshu, tutuki diui diatumba uma le Latujalaka.

³¹ Vo wayuya le ye uku atuyakaka wudja, ku wayudjase la ntundu kaye. Vo wayulunga aui aye, keli hawuwatsha, ne dia vo weko la ngandji ka lu elomo, ku etema awo weko lu waho awo.

³² Mete, we eko le wo uku untu latimbaka kimbu ya ngandji la diui dia dimena, ndu latuhumaka longombi dimena. Vo mpukamaka aui aye, keli hawutatshaka.

³³ Lamʼayuya akambu ane mete, vo wayuya! — ku vo wayulimbitela vati: Umvutshi omotshi aki lʼatei awo.