Ezekiyele 32 - La Bible en Otetela (Bible K'Ekila) 1991

¹ Lʼeleku ka dikumi, lu lushi la ntundu la ngondo ka dikumi lʼahe-ndi, diui dia Latuyalaka diakayi le mi ntu ati:

² Onʼa untu, uleli lu dikambu dia Farayo, khumʼekanga ka Edjibitu; uwuteli wati: We akayafanya lʼosongo a tambwe lʼatei a wedja; We aki uku shimiamba lʼashi a waki. We akahami lu ndjali yaye, akafungushaka ashi lʼekulu aye; We akalanyaka ekedi awo.

³ Khumadiondjo Latuyalaka kata ati: Dimi layukamba otei ami la ului a wuki wʼantu, Ku dimi layukunda lu otei ako.

⁴ Dimi layukutshika la kete, layukukadja lʼusui, Layutuma fudu tshe ya lʼulungu dia yo mbahema ladiku diaye, Ndu layulutsha nyama tshe ya la kete lʼemunyi aye.

⁵ Dimi layuhane emunyi aye lʼete wʼekungu, Layuludia ekedi la betshi dia emunyi aye.

⁶ Dimi layutshulula dikila diaye lu kete yakayatelaka ashi pulu ndu lu ete wʼekungu. Ekedi wayuludiama la ye.

⁷ Lamʼayumukushisha, layukumba ulungu, layete toto udjima. Dimi layukumba unya dingi, Ndu ngondo hukashiya.

⁸ Dimi layete esasi wa lʼulungu udjima lu dikambu diaye, Ndu layutuma udjima lu kete yaye, Mbata Khumadiondjo Latuyalaka.

⁹ Dimi layunyangia etema a wedja efula lamʼayumukotola lu fumbi lʼatei a wedja, ndu lu kete yahayeyi.

¹⁰ Dimi layukhumia antu efula akhumu lu dikambu diaye, ndu khumi ya dikanga yawo yayuleka nkuka woma lamʼayumutundja yombo ya ta la ntundu kawo. Vo wayudidimaka tena tshe untu lʼuntu lu lumu landi, lushi lʼekwelo kaye.

¹¹ Khumadiondjo Latuyalaka kata ati: Yombo ya khumʼekanga ka Babilona yayudiaka.

¹² Dimi layudiaka antu aye efula la tombo tʼapami a wulu, wane wuleki ngala tshe lʼatei a wedja. Vo wayushisha utaku wʼasi Edjibitu, Ului awo tshe wayulanyema.

¹³ Dimi layushisha nyama yawo tshe Yeli lʼemamu wʼashi efula. Ekulu wʼantu la sanga ya nyama hawuwahashahasha ntu.

¹⁴ Dimi layolembohaya ashi awo, Layokedia ndjali yawo uku iso, Mbata Khumadiondjo Latuyalaka.

¹⁵ Lamʼayumete kete ya Edjibitu tongo, Lamʼayumbama diango tshe dieli loko, Lamʼayumudiaka antu tshe wudjashi loko, Ku vo wayeya vati: Dimi keli Latuyalaka.

¹⁶ Oso eli delu diayuwulela, ana amantu wa lu wedja wayulelaka delu diako. Vo wayulelaka lu dikambu dia Edjibitu ndu lu dikambu dia antu awo tshe, mbata Khumadiondjo Latuyalaka.

¹⁷ Lu eleku ka dikumi lʼahendi, lu lushi la dikumi lʼatanu la ngondo ka ntundu, diui dia Latuyalaka diakayi le mi ati:

¹⁸ Onʼa untu, uleli lu dikambu diʼului wʼasi Edjibitu, uwadji vo la ana amantu wa wedja a wulu lʼesi a kete, kame la waku watahulo utsha lu Difuku:

¹⁹ Akona ukuleki dimena? Utshu, utetami kame La waku waki kumbahema uhekeli.

²⁰ Vo wakako lʼatei a waku wakadiakema la yombo. Edjibitu ayetama kame la elui andi wʼantu.

²¹ Ewandji andi wa wulu wayoteketa dikambu diawo, kame la ekimanyidi awo uma lʼatei wʼUdimu a Pengandu. Vo wakahulo, weko leko pundju; wane waki kumbahema uhekeli, wakadiakema la yombo.

²² A si Asuriya weko leko la antu awo tshe, ndu waumbu awo weko lʼutshimba andi; waku tshe wakavu, wakadiakema la yombo.

²³ Waumbu awo weko lu ehongo wa Difuku, ndu antu awo weko lʼutshimba wa waumbu awo. Wane tshe wakavu, wakadiakema la yombo. Vo wakutsha wudja a wasena woma wa mamba.

²⁴ Asi Elame weko leko la antu awo tshe, la waumbu awo lʼutshimba. Wane tshe wakavu, wakadiakema la yombo. Vo wakahulo, kumbahema uhekeli, utsha lʼesi a kete. Vo wakutsha wudja a wasena woma wa mamba, wakutshama sonyi utsha le wane watahulo utsha lu Difuku.

²⁵ Vo wakatshi mbetu kawo lʼatei wʼedu, kame la antu awo tshe; ndu waumbu awo weko lʼutshimba awo. Wane waki kumbahema uhekeli tshe, wakadiakema la yombo, ne dia vo wakutsha wudja a wasena woma wa mamba, ndu vo wakutshama sonyi utsha le wane watahulo utsha lu Difuku. Vo wakakitshama lʼatei a wane wakadiakema.

²⁶ Mesheke, Tubala la antu awo tshe weko leko, waumbu awo weko lʼutshimba awo. Wane tshe waki kumbahema uhekeli, wakadiakema la yombo, ne dia vo wakutsha wudja a wasena woma wa mamba.

²⁷ Vo hawetami kame la ahuka a wulu wa lu nshi yʼedjedja wakadiakema, wane wakahulo kame la dihumo diawo dia ta utsha lʼUdimu a Pengandu. Vo wakakitsha ete awo ladiku dia tombo tawo, la dingawu diawo ladiku dia weka awo, ne dia vo wakutsha ahuka a wudja a wasena woma wa mamba.

²⁸ Ndu we ayulanyema lʼatei a wane waki kumbahema uhekeli. We ayetama kame la wane wakadiakema la yombo.

²⁹ Asi Edome, khumi ya dikanga yawo la ewandji awo, waku wakadiakema la yombo weki la dihunga, weko leko. Vo wakakhundema kame la wane waki kumbahema uhekeli kame la wane wakahulo utsha lu Difuku.

³⁰ Ewandji tshe wa la ngelʼa kushi la asi Sidona tshe weko leko, wakahulo lu sonyi la andjakemi, ne dia woma wa mamba wakawutsha antu uma lu wulu awo. Vo wambetama la wane waki kumbahema uhekeli kame la wane wakadiakema la yombo, ndu vo wakutshama sonyi kame la wane watahulo utsha lu Difuku.

³¹ Lamʼayuwena Farayo, ndi ayusambama lu dikambu diʼului wʼantu andi tshe, wane wakavu la yombo ndu elimbi andi tshe, mbata Khumadiondjo Latuyalaka.

³² Ne dia ndi akatshulula ududu wa kele kandi lu kete ya wasena, vo wayetama lʼatei a wane waki kumbahema uhekeli, kame la wane wakadiakema la yombo, Farayo la antu andi tshe, mbata Khumadiondjo Latuyalaka.