Ezekiyele 3 - La Bible en Otetela (Bible K'Ekila) 1991

¹ Ndi akamvutela ati: Onʼa untu, uli kene kambuyukundja, uli wombo uku wa buku, utshu, ototekete la khumbu ka Isariyele.

² Dimi lakafula unyo, ku ndi akandesha wombo.

³ Ndi akamvutela ati: Onʼa untu, ulutsha dikundju diaye, uludia esohi aye la wombo ako wamumunyusha. Dimi lakadile, ku dio diaki mpe uku usanga lu unyo ami.

⁴ Ku ndi akamvutela ati: Onʼa untu, uneli, utshu le khumʼekanga ka Isariyele, utuwateli aui ami.

⁵ Ne dia dimi hakutumi utsha le wudja wʼoteketa wa kana, kana wahayeyi, keli utsha le khumbu ka Isariyele —

⁶ aha le wedja efula wʼoteketa wa kana ndu wa wulu, wahayukaka aui awo. Utunduyala dimi nkutumi le wo, tshiki wutukukela.

⁷ Keli khumbu ka Isariyele hawukukela, ne dia vo hawumbukela. Khumbu ka Isariyele tshe weko la ete wulu ndu la etema wulu.

⁸ Ulungi, dimi lutsha mbete elundji kaye wulu utsha le dundji diawo, la ote aye wulu utsha le ete awo.

⁹ Dimi lutsha mbete elundji kaye wulu, uku dive dia wulu diuleki akina. Tuwaukaki woma, tateki asulu dikambu dia waendelu awo, kuyanga mbewo khumbu kʼatomboki.

¹⁰ Ndi akamvutela ati: Onʼa untu, udji aui ami tshe wayumukutela lʼutema aye, uhuke atui ololo.

¹¹ Uneli, utshu le waku weli lu lohombo, asi wudja aye, utotekete la wo. Kuyanga vo wayulunga kana hawulunga, kuwateli wati: Khumadiondjo kata okone ati:

¹² Nyuma ka Unyashungu akambedia, ku lamʼakunela lutumbu la Latuyalaka uma lu dihuli dialo, dimi lakuki lundju la wulu la kete yadidima lʼokongo ami.

¹³ Dimi lakuki luhelu lʼahafu wa difanelu dia nyama nye lamʼakawasakanaka, la luhelu la etshimbi laki lasuki ladio. Lo laki uku luhelu la kete mbadidima.

¹⁴ Ku Nyuma ka Unyashungu akambedia, akamembe. Dimi lakatshu la wutshu ndu la kele lʼutema. Lunya la Latuyalaka lakambahema wulu.

¹⁵ Dimi lakakumi la Tele-Abiba le afumbi wakadjashi lʼumamu wʼokedi wa Kebara. Dimi lakadjase lʼatei awo nshi esambeli laamba.

Ulami le Isariyele

¹⁶ Lamʼaketi nshi esambeli, diui dia Latuyalaka diakayi le mi ati:

¹⁷ Onʼa untu, dimi lambukudja undakanyi wa khumbu ka Isariyele. Okone ulungi aui wʼuma lʼunyo ami, uwaewuli la aui ami.

¹⁸ Naka dimi lambutela untu a kolo nti: Mete we ayuvo, ndu naka we hutedi untu a kolo kuyanga mbewula uma lu mbuka kandi ka kolo, ndu dia nshimbela lumu landi, untu ako a kolo ayuvo lu kolo kandi. Keli dm layukolomba dikila diandi.

¹⁹ Naka we ayewula untu a kolo, ku ndi hakadimo uma lu kolo kandi, kana uma lu mbuka kandi ka kolo, ndi ayuvo lu uhedia andi ku we ayushimbela lumu laye.

²⁰ Ntu, naka untu ololo ambetola uma lu ololo andi, ambutsha kolo, la dimi lambukitsha utamba a ntakanya la ntundu kandi, ndi ayuvo, ne dia we kumbewula. Ndi ayuvo lu kolo kandi, la akambu andi wʼololo wakandatshaka wayuhamela. Keli dimi layukolomba dikila diandi.

²¹ Keli naka we ambewula untu ololo diaha ndi ntsha kolo, ku ndi hatshi kolo, ndi ayulumba, ne dia ndi aketawo aui aye, ku we ayushimbela lumu laye.

Umvutshi Ambuyala Lumi

²² Lunya la Latuyalaka lakambahema ntu leko. Ndi akamvutela ati: Uneli, utshu utsha lʼusui, ku dimi layutoteketa la ye leko.

²³ Dimi lakunela, lakatshu utsha lʼusui. Enda, lutumbu la Latuyalaka laki leko, uku lutumbu lakamenyi lʼumamu a Kebara, ku dimi lakako ekhukhumadi la kete.

²⁴ Ku Nyuma ka Unyashungu akambahema, akambetula, akameme. Ndi akamvutela ati: Tshoka tuyadihi lu luudu laye.

²⁵ Keli we onʼa untu, uki, vo wayukukeleka ekodi, ku we heya mbeteta lʼatei wʼantu.

²⁶ Dimi layumamanya lulimi lu kumbʼa lulimi dia we ndjala kanga lumi. Ku we heya ndjala undakanyi awo, ne dia vo weli khumbu kʼatomboki.

²⁷ Keli lamʼayumoteketa la ye, dimi layufula unyo aye. Ku we ayuwatela wati: Khumadiondjo Latuyalaka kata ati: One leli la atui uki, la one laha la atui tukaki, ne dia vo weli khumbu kʼatomboki.