Ezekiyele 27 - La Bible en Otetela (Bible K'Ekila) 1991

¹ Diui dia Latuyalaka diakayi le mi ati:

² Onʼa untu, uleli lu dikambu dia Tura.

³ Uteli Tura, ludjashi lʼumamu wʼashi a waki, latutshaka ukanda lʼantu wʼuma lu asenga efula, wati: Khumadiondjo Latuyalaka kata ati: Tura, we akataka wati: Dimi leko tshe dimena.

⁴ Elelu aye weko lʼatei wʼashi a waki, Ambiki aye wakakete dimena tshe.

⁵ Vo wakati abaya aye tshe la weoto wʼuma la Senire, Wakose utamba wʼusasi wʼuma la Lebanona Dia nkuhanela ekulu ka koi.

⁶ Vo wakakosele kahi lʼelungu wʼuma la Bashana, Wakakutshela ekala la ewanga wumamatanyi Lʼabaya wʼukudi wʼuma lu asenga wa Kupiro.

⁷ Vo wakakutshela dipema dia mashua La linene lʼololo leli la asangu asangu wʼuma lʼEdjibitu, Dia dio ndjala dembela diaye. Apema waki la dangi diʼudima la diʼengengi Uma lʼemamu wa Elisha, waki ukumbo aye.

⁸ Asi Sidona la asi Aravada waki aduki aye, Antu wakaleki tumba wa la Zemere waki lʼatei aye, we Tura. Vo waki akendjikendji aye wa mashua.

⁹ Dihangamendi la asi yimba uma la Ngebala Wakadjaka elungu lu mashua. Mashua tshe waki lʼatei wʼashi a wuki kame. Antu waki loko, wakayakaka le ye Dia ndjutsha la ye ukanda.

¹⁰ Asi Peresiya, asi Luda la asi Puta, waki lʼatei wʼalimbi aye, ahuka a wulu. Vo wakahaneka dingawu la fule ya ta lʼatei aye; vo wakakete dimena otekoya.

¹¹ Asi Aravada la Heleke wakahemaka ladiku dia peli lʼutshimba aye tshe. Asi Ngamada waki lu tangelu diaye. Vo wakahaneka dingawu diawo lu peli diaye tshe; vo wakakete dimena otekoya.

¹² Asi Tarashishi wakatshaka la ye ukanda, ne dia efula ka weuhu tshe wʼongonyi aye. Vo wakengonya la ye udjulu lu diango diaye.

¹³ Asi Javana, asi Tubala, la asi Mesheke, wakatshaka la ye ukanda. Vo wakengonya antu la mashua wʼohotela lu diango diaye.

¹⁴ Bete-Tongarama wakengonya la ye falasa, falasa ya ta la punda lu diango diaye.

¹⁵ Asi Rodese wakatshaka la ye ukanda. Kete yʼasenga efula yaki ahuli aye hita wa ntshaka ukanda. Vo wakakulambula ewanga la utamba wʼupindji.

¹⁶ Edome akatshaka la ye ukanda ne dia efula ka diango diaye. Vo wakengonyaka la ye mboko yʼeleselese, ahondo wʼengengi, ahondo wʼasangu asangu, linene lʼololo, keli, la mboko ya tilili yʼawadi awadi.

¹⁷ Wudja wa Juda la kete ya Isariyele wakatshaka la ye ukanda. Vo wakengonya la ye epunga, mbeli la fingu yatelaka esadi, usanga, iso la lodia.

¹⁸ Damaseke akatshaka la ye ukanda ne dia efula ka diango diaye, ndu ne dia wehu wʼengonyi aye. Vo wakengonya la ye wanu wʼuma la Helebona la diosa dia wema diʼekoko.

¹⁹ Vo wakengonya la ye wanu wʼuma la Uzala lu tuka diaye, wakengonya la ye luwulu la lutshula, ma-mbu ya dieku la ediu wʼenyi la diango diaye.

²⁰ Dedana wakatshaka la ye ukanda la ahondo wa mbidjase ladiku dia falasa.

²¹ Asi Arabiya la ewandji tshe wa la Kedara wakatshaka la ye ukanda la ana wʼekoko, ekoko a waumi, la mbudi.

²² Asi ukanda wa la Sheba la wa la Rama wakatshaka la ye ukanda. Vo wakengonya la ye diango diʼupumu diuleki amena, wehu tshe wʼushinga a wulu la paunyi.

²³ Harana, Kane la Edena, Ashura la Kilimade wakatshaka la ye ukanda.

²⁴ Waso wakatshaka la ye ukanda la eloto wuleki amena, wʼedima, wʼasangu asangu; la eshete wakatshama lʼabaya wʼusasi wakakelekami lʼekodi, wakaludi too la ahondo wʼushinga a wulu.

²⁵ Mashua wʼuma la Tarashishi wakakembelaka diango diaye diʼukanda. Okone we akaluli too lʼongonyi la lutumbu Lʼatei wʼashi a wuki.

²⁶ Anduki aye wakakukumia lʼatei wʼasukhu a wulu; Lopepe lʼuma lu leke lʼehutwelu ka unya Lakakuhandjula vwa lʼatei wʼashi a wuki.

²⁷ Engonyi aye, ekundji aye, diango diaye diʼukanda, Ekambi aye wa lu mashua, Akendjikendji aye wa lu mashua, Ekambi aye watukitaka elungu, Ambetshetshi aye wʼukanda, Andoshi aye tshe wa ta La ului tshe wʼantu weli lasuki la ye, Wayudita lʼatei wʼashi a waki Lu lushi laye lʼelanyelu.

²⁸ Lamʼayuda akendjikendji aye wa mashua tukuku tʼalelu, Kete ya lʼumamu wʼashi yayudidima.

²⁹ Aduki tshe, ekambi wa lu mashua, Akendjikendji wa mashua wayutumba uma lu mashua awo, Wayemala lʼokenge wʼashi.

³⁰ Vo wayedia aui awo lu dikambu diaye, Wayuda tukuku ta wulu, Wayuyatela ditshu lʼete, wayungito lʼukutu.

³¹ Vo wayunya avu lu dikambu diaye, Wayolota akutu, Wayukulela lʼokedi lʼetema awo, Kame la lunyangu la wulu.

³² Lu lunyangu lawo kayuwukutshimela djuwa, Kayuwukulela vati: Akona akalanyema uku Tura lʼatei wʼashi a wuki?

³³ Lamʼakatumbaka diango diaye uma lʼashi a wuki, We akakutshaka ehumba wa wedja efula. Uma lu efula kʼongonyi aye. La diango diaye diʼukanda, Mbakayangonya khumi ya dikanga ya la kete.

³⁴ Lamʼakakuhandjula asukhu wʼashi a waki. Diango diaye diʼukanda la antu aye tshe wakaditi kame la ye.

³⁵ Antu tshe wa lu asenga wakakashimo dikambu diaye, Khumi ya dikanga yawo wakate asulu; Dundji diawo diakayala lʼulingulingu.

³⁶ Ambetshetshi wʼukanda lʼatei aye Watukohongwelaka soi; We ambuyala anyanya, We huyala ntu pundju.