Ezekiyele 21 - La Bible en Otetela (Bible K'Ekila) 1991

Yombo ya Diesa ya Latuyalaka

¹ Diui dia Latuyalaka diakayi le mi ati:

² Onʼa untu, ediya elundji kaye utsha la Jerusalema, edia diui utsha lu mvudu yʼetemwelo, uti akambu wahatayi lu dikambu dia kete ya Isariyele.

³ Uteli wudja wa Isariyele wati: Latuyalaka kata ali: Nyendi, dimi lutsha ndo la nyu. Dimi layosomola yombo yami, layudiaka antu anyu wʼololo ndu wa kolo.

⁴ Dimi layudiaka antu anyu wʼololo ndu wa kolo, dimi layosomola yombo yami uma lu dihusu dia ndo lʼantu tshe, uma la diku dia kushi pulu ndu la ngelʼa kushi.

⁵ Antu tshe wayeya vati: Dimi Latuyalaka kambosomola yombo yami uma lu dihusu; yo hayukalula loko ntu.

⁶ Okone we onʼa untu ukhumi akhumu; uyali la okei, ukhumi akhumi la lunyangu la wulu la ntundu kawo.

⁷ Lamʼayuwukumbula vati: Ukundi akhumaye akhumu? Kuwakaluya diui wati: Ne dia lukumu la mamba luyayi, etema wʼantu tshe wayuyala ashi atu, anya tshe wayuyala wodu, nyumu yʼantu yayuheko, la adui wʼantu wayolelo, wayuyala uku ashi. Nyulungi, lo loso layayi, lo layutshama, mbata Khumadiondjo Latuyalaka.

⁸ Diui dia Latuyalaka diakayi le mi ati:

⁹ Onʼa untu, uti akambu wahatayi wati: Latuyalaka kata ati: Yombo! yombo! yo yaya diesa ndu ngaingai.

¹⁰ Wambuyiketemola dia yo mbeya ndjaka antu. Yo ngadimoka uku dingadimu dia ndjadi! Ukundi weyasu ngenangena? We ntunaka ohehela, onʼami, ndu engo tshe kambutshama lʼutamba.

¹¹ Vo wambedia yombo dia yo ntsha ulimu; wambuyiketemola, wambuyedia dia mbisha undjakanyi.

¹² We onʼa untu, uleli, udi tu kuku, ne dia yombo yambukuma le wudja ami ndu le ewandji wa Isariyele tshe. Vo wambukimwama utsha le yombo, vo la wudja ami, okone nyuyakomole lu pelohelo la okei.

¹³ Edikelu huyala — ku ukundi ayuyala dikambu ne, naka we atutunaka ohehela? mbata Khumadiondjo Latuyalaka.

¹⁴ We onʼa untu, uti akambu wahatayi, uhumi myuki. Uhuluya yombo tena pendi, tena satu, yombo ya ndjaka waku wahumba ndjakema. Yo yeli yombo yʼediakelu ka wuki, yamboto lu mvudu yawo tshe.

¹⁵ Dimi lakakitsha yombo ya ngaingai dia ndo la asuku awo tshe, dia etema awo ndjala ashi atu, la dia vo ntakana efula. Yombo sho yeli uku ndjadi; yo yeko la diesa dia ndjaka antu.

¹⁶ Usikiso utsha lu lunya la pami, uyalonge lu ta; ukadimo utsha lu lunya la lomoso, utsha lu ahuli tshe welela sodi kaye.

¹⁷ Dimi layuhuma myuki, layunduya ududu ami; dimi Latuyalaka kambuta.

¹⁸ Ku diui dia Latuyalaka diakayi le mi ntu ati:

¹⁹ We onʼa untu, osonole mbuka hyendi ya yombo ya khumʼekanga ka Babilona ndja. Mbuka yako hyendi yayutumba uma lu wudja otoi. Utshi djimbitelu, uyikitsha lʼote a mbuka lʼusumba.

²⁰ Osonole mbuka ka yombo mbeta la Raba kʼasi Amona uya la Juda la Jerusalema, usumba wudingami lukumbu.

²¹ Khumʼekanga ka Babilona akemala lu sanga dia mbuka hyendi dia mendja diwulu. Akasutshasutsha pitu, akendja lu nyembo, akendi uvo.

²² Lu lunya landi la pami kaki endelu ka Jerusalema, dia nshikike etamba a waki wa nyukula lukumbu, dia mbufula unyo dia ndela, dia mbedia diui dia luhangu, dia nshikike etamba a waki wanyukula lukumbu, dia ntshima ngeli ndu dia ntsha kumbu ya wulu.

²³ Dikambu so diayuyala endelu ka kashi lu ashu awo. Vo wakatshibi tshibelu diawo. Keli ndi atuhoka kolo kawo, dia vo mundama lu fumbi.

²⁴ Uma lu dikambu diako, mbata Khumadiondjo Latuyalaka ati: Ne dia nyu nyambumbuhula kolo kanyu lamʼambunyushula uhedia anyu, dia kolo yanyu menama lu etsha anyu tshe, ne dia nyu nyambumbuhulawo, mbayunyundama loko.

²⁵ We uwandji wa Isariyele, we untu a kolo lambuhumo wulu, lushi lambukuka la etena ka kolo kaye nkume.

²⁶ Khumadiondjo Latuyalaka kata ati: Unya dihondo dia lʼote aye, unya dembo dia kusu; dio hadiuyala osoku ntu. Olemia kene kaha la nemo, ukitshakitsha kene keli la nemo.

²⁷ Elanyelu! elanyelu! dimi layulanya tshe! Keli dikambu diako hadiuyala edja ndu kanga diulelu ambuya, ku dimi layuwushadio.

Elumbwelu le Asi Amona

²⁸ We onʼa untu, uti akambu wahatayi wati: Khumadiondjo latuyalaka kata okone lu dikambu diʼasi Amona ndu dia sonyi kawo ati: Yombo! yombo yambosomwama dia ndjaka antu. Wambuyiketemola dia yo ngadimo uku dingadimu dia ndjadi, dia yo nshila antu.

²⁹ Vo wakanyutela waenelo wa kashi, wakanyusakwela waenelo wa kashi, wa-kanyendjiya awulu wʼanyanya, dia nyu nsuya antu wa kolo wambuhumo wulu ndu wambukuma lʼetena kawo kʼelumbwelu.

³⁰ Ukaluya yombo lu dihusu. Dimi layunyulumbuya lu dihuli diakanyatongo, lu kete yakanyuto.

³¹ Dimi layunyutshulwela ududu ami, layunyufufa dja ya kele kami. Dimi layunyukimo lʼanya wʼakanga a ngala, weya nshila antu ushiki.

³² Nyu nyayuyala uku kunyi lu dja; dikila dianyu diayokela lu kete. Antu hawunyuho ntu, ne dia dimi Latuyalaka lambuta.