Ezekiyele 2 - La Bible en Otetela (Bible K'Ekila) 1991

Leta la Ezekiyete

¹ Ndi akamvutela ati: Onʼa untu, emala lʼekulu aye keli ntekete la ye.

² Kamʼakandateketaka la mi, Nyuma ka Unyashungu akambahema, akamemadia. Ku dimi lakuki aui wa one lakateketaka la mi.

³ Ndi akamvutela ati: Onʼa untu, dimi luyanga nkutuma le asi Isariyele, le wudja wʼakanga wʼuhedia wakantombokwela; vo la washewo watumpediaka edja ndu elo kene.

⁴ Antu ako weli atenganyi, ndu akanga wʼetema a wulu. Dimi luyanga nkutuma le wo; kutuwateli wati: Okone mbata Khumadiondjo Latuyalaka.

⁵ Kuyanga vo wayulunga kana hawulunga (ne dia khumbu kʼakanga wʼuhedia kewo), vo wayeya vati: Umvutshi aki lʼatei awo.

⁶ We onʼa untu, tuwaukaki woma, tukaki aui awo woma, kuyanga adungu la atende weko lasuki la ye, kuyanga lʼatei a kutu kudjashiye. Tukaki aui awo woma, tusakaki lukumba, ne dia waendelu awo, ne dia khumbu kʼatomboki kewo.

⁷ Kutuwateli aui ami, kuyanga vo hawulunga kana wayulunga, ne dia atomboki a wulu mbewo.

⁸ Keli we onʼa untu, ulungi aui wakutelami, tontombokwelaki uku atutshaka khumbu kene kʼakanga wʼuhedia. Ase unyo, uli kene kalangami nkusha.

⁹ Lamʼakamendaka, menyi ku lunya lone layasimbo uya le mi, lukimedi wombo wa buku.

¹⁰ Ndi akawombola la ntundu kami; ku vo wakafundama wedi la wedi; alelu, tukuku, la mananu wakafundama loko.