Ezekiyele 18 - La Bible en Otetela (Bible K'Ekila) 1991

Utema Watutshaka Kolo, Wayuvo

¹ Diui dia Latuyalaka diakayi le mi ntu ati:

² Okoko wana watunyu-taka yukedi nye lu dikambu dia kete ya Isariyele nyati: Washi wakali elua wʼepudi, mbambuyala wanyu wa anʼawo okeke?

³ Khumadiondjo Latuyalaka kata ati: Uku wemi la lumu! nyu hanyuka yukedi nye ntu lu Isariyele.

⁴ Etema wʼantu tshe, wami mbewo. Dimi Kukanga utema wʼumbutshi, ndu dimi kukanga utema wʼona. Utema watutshaka kolo, mbayuvo.

⁵ Naka untu eko ololo, ndu ndi atutshaka akambu wʼololo ndu wʼusimbwi;

⁶ naka ndi konde ma ladiku diʼekungu, kumbedia ashu utsha le dikishi dia khumbu ka Isariyele, kunsuwula wadi a unyandi, kunsukana le umuntu lu nshi yandi ya dikila;

⁷ naka ndi kuntshela untu ukina kolo, naka ndi akasombola engo kakandasombe, naka ndi kompotola engo lohotola, naka ndi akasha akanga a ndjala mbu ya nde, akalotsha wane waki etakataka ahondo;

⁸ naka ndi konsondja dia nkundja osombelo, naka ndi kombosa waho; aka ndi akashimbi lunya landi uma lu kolo, akasambula esambwelu ka mete lʼasa untu lʼuntu,

⁹ ndu akayeli elembe ami, la akalami adjangu ami dia ntsha akambu wa mete, ndi eko uluwanyi mete; ndi ayulumba, mbata Khumadiondjo Latuyalaka.

¹⁰ Naka ndi ambuta ona pami leli opotodi, utundjishi a dikila,

¹¹ lahatutshaka akambu aso, keli ndi atolekaka ma ladiku diʼekungu, atusuwulaka wadi a unyandi,

¹² atusuyaka amenyi fono la ehumbi, atahotolaka diango lohotola, hatukaluyaka kene kakandose okole, atedi-yaka ashu andi utsha le dikishi, atutshaka akambu wa wononyi,

¹³ atosondjaka dia nkundja osombelo, ndu ndi atukundjaka waho; undi, ndi ayulumba? Ndi hulumba. Ndi ambutsha akambu aso tshe wa wononyi. Mete, ndi ayuvo; dikila diandi diayuyala lʼote andi.

¹⁴ Kakiane nyuki, naka ndi ambuta ona pami, latenaka kolo tshe yakatshaka shi, ku ndi ambuka woma, aha ntsha wuhu ako;

¹⁵ naka ndi hali ma ladiku diʼekungu, hedia ashu andi utsha le dikishi dia khumbu ka Isariyele, hasuwula wadi a unyandi;

¹⁶ naka ndi hatshela untu kolo, halungula osombelo, hahotola diango lohotola; naka ndi ayusha wane weli la ndjala ma, ayolotsha wane weli etakataka;

¹⁷ naka ndi ayushimba lunya landi uma lu nsuya asi wula, naka ndi halungula osombelo kuyanga waho, naka ndi ayuyelaka elembe ami ndu ayulamaka adjangu ami, ndi huvo, ne dia kolo kaki shi; mete ndi ayulumba.

¹⁸ Nyendi, shi ayuvo lu kolo kakandatshi, ne dia ndi akengiyaka antu, akahotolaka anangu diango, ndu akatshaka akambu waki kundjala ololo lʼatei a wudja andi.

¹⁹ Keli nyu mumbwanaka nyati: Dikambu kuna diahatembaka ona kolo ka shi? Lamʼatutshaka ona akambu wʼololo ndu wʼusimbwi, ndu lamʼatundulamaka elembe ami dia mbetsha, mete ndi ayulumba.

²⁰ Utema watutshaka kolo mbayuvo: ona hembe wutshu wa kolo ka shi, ndu shi hembe wutshu wa kolo ka onʼandi. Ololo wa kanga ololo, wayuyalaka le ndi; ndu kolo ka kanga kolo, kayuyala le ndi.

Mbuka Ka Unyashungu Keko Usimboki

²¹ Naka untu a kolo ayukadimo uma lu kolo yandi yakandatshaka, ndu ayulamaka elembe ami, la ayutshaka kene keli ololo ndu usimbwi, mete ndi ayulumba; ndi liuvo.

²² Ehedia andi tshe wakandatshaka, wayuhamela lu ololo andi watundutshaka, mbayundulumba.

²³ Khumadiondjo Latuyalaka kambula ati: Undi, dimi layongenangena lu nyoi kʼuntu a kolo? Dimi haleki nanga ndi nkalula uma lu mbuka kandi ka kolo, la ndi numba uka?

²⁴ Keli naka untu ololo ayukadimo uma lu ololo andi, naka ndi ayutsha kolo, ndu ayutsha akambu tshe wa wononyi watutshaka untu a kolo, ndi ayulumba uka? Akambu andi tshe wʼololo wakandatshaka wayuhamela. Lu uhedia wakandatshi ndu lu kolo kaka-ndatshi, kayunduvo.

²⁵ Keli nyu mvutanelaka nyati: Mbuka ka Khumadiondjo kema usimboki. Nyu khumbu ka Isariyele, nyulungi: Mbuka kami keli kema usimboki uka? Aha mbuka yanyu mbeli kema esimboki?

²⁶ Lamʼatukadimoka untu ololo uma lu ololo andi, ku ndi ambutsha kolo, ndi atuvokaka loko; lu kolo kandi kambundutsha, kayunduvo.

²⁷ Ntu lamʼayukadimo untu a kolo uma lu kolo yakandatshaka, ku ndi ayutsha akambu wʼololo ndu wʼusimbwi, ndi ayushimbela utema andi dia vo numba,

²⁸ ne dia ndi akakani yimba, akakadimo uma lu ehedia tshe wakandatshaka. Mete ndi ayulumba, ndi huvo.

²⁹ Keli khumbu ka Isariyele mvutanelaka vati: Mbuka ka Khumadiondjo kema usimboki. Nyu khumbu ka Isariyele, mbuka kami keli kema usimboki uka? Aha mbuka yanyu mbeli kema esimboki?

³⁰ Okone dimi layunyulumbuya, nyu khumbu ka Isariyele, untu lʼuntu uku etsha andi. Nyukaluli uma lu ehedia anyu tshe, diaha vo ndjala elanyelu kanyu, mbata Khumadiondjo Latuyalaka.

³¹ Nyunya ehedia anyu tshe wakanyatshaka, nyuyali la etema wʼeyuyu la lumu lʼuyuyu. Nyu khumbu ka Isariyele, ukundi ayunyuvo?

³² Khumadiondjo Latuyalaka kata ati: Dimi halongenangena lu nyoi kʼuntu. Okone nyukadimo, ku nyu nyayulumba.