Ezekiyele 13 - La Bible en Otetela (Bible K'Ekila) 1991

Amvutshi wa Kashi Wambanyema

¹ Diui dia Latuyalaka diakayi le mi ati:

² Onʼa untu, uti akambu wahatayi lu dikambu diʼamvutshi wa Isariyele; utaki akambu wahatayi, uteli waku watutaka akambu wahatayi paka uma lu tumba tawo wati: Nyulungi, diui dia Latuyalaka.

³ Khumadiondjo Latuyalaka kata ati: Mananu kayali le amvutshi wa dinginya, watuyelaka tukanyi tawo, ndu wahatenyi nduku enelo.

⁴ Isariyele li, amvutshi aye weli uku mbulu lu ahuli wʼanyanya!

⁵ Nyu amvutshi kuntsho utsha lu lukumbu, lu ahuli wakanyuko. Nyu kumpikela khumbu ka Isariyele eheli ka lukumbu dia to nshikikala lʼatei ata lu lushi la Latuyalaka.

⁶ Nyu nyakenyi waenelo wa lukesu, nyakasaki awulu wa kashi nyata nyati: Latuyalaka kakati, keli Latuyalaka kunyutuma. Nyu nyakasha antu elungamelu kʼaui anyu nshidiyama.

⁷ Aha enelo ka lukesu kakanyenyi? Aha usakasaka mbakanyasaki awulu? Nyu nyakati nyati: Latuyalaka kata, lamʼakimi kumvuta.

⁸ Okone Khumadiondjo Latuyalaka kata ati: Nyu nyakataka akambu wa lukesu. Nyakenaka waenelo wa kashi, diako mbayangami ndo la nyu, mbata Khumadiondjo Latuyalaka.

⁹ Lunya lami layolo la amvutshi watenaka waenelo wa lukesu, ndu watusakaka awulu usakasaka. Vo hawuyala lʼatei wa wudja ami. Kumbu yawo hayufundama lu buku dia khumbu ka Isariyele, ndu vo hawoto lu kete ya Isariyele. Ku nyu nyayeya nyati: Dimi keli Khumadiondjo Latuyalaka.

¹⁰ Vo wakanganyia wudja ami, wata vati: Ki keko, lamʼaki ki kema. Lamʼatuhikaka antu eheli, amvutshi ako watumbaka eheli kako la kete ya wodu.

¹¹ Uteli waku watukiumbaka la kete ya wodu wati: To kayunyuko, mvula ka wulu kayolo, la lopepe layukilanya.

¹² Lamʼayunyuko eheli, wayunyumbula vati: Kete yakanyumbi eyo?

¹³ Diako mbata Khumadiondjo Latuyalaka ati: Dimi layukihandjula la ngimbi la ududu ami. Mvula ka wuki kayolo lu kele kami, la mboko ya waki yayukihandjula la ududu ami.

¹⁴ Osoku mbayumuhandjula eheli kakanyumbi la kete ya wodu. Dimi layukiha-ndjula pulu ndu lu kete, ku aishina ato wayenama lʼandja. Lamʼayuyuko eheli kako, nyu nyayushila ushiki la tshina diato. Ku nyu nyayeya nyati: Dimi keli Latuyalak

¹⁵ Osoku mbayumushidiya kele kami lu eheli, ndu le waku wakakiumbi la kete ya wodu. Dimi layunyutela nti: Eheli kema ntu, ndu waku wakakiumbi kema.

¹⁶ Vo weli amvutshi wa Isariyele watutaka akambu wahatayi lu dikambu dia Jerusalema, ndu watenaka waenelo wa ki lu dikambu diawo, lamʼeli ki kema, mbata Khumadiondjo Latuyalaka.

¹⁷ We onʼa untu, edia elundji kaye dia ndo la ana amantu wa wudja aye, watutaka akambu wahatayi uma lu tumba tawo. Uti akambu wahatayi lu dikambu diawo wati:

¹⁸ Khumadiondjo Latuyalaka kata ati: Mananu kayali le amantu watutshaka ehanga wa mbidja lu anya, watutshaka alembo wa nembe lʼete wʼantu wa wehu wehu, dia nkutula etema wʼantu. Undi, nyu nyayuyanga etema wa wudja ami la nshimbela antu akina dia nyu nyame nkundja waho?

¹⁹ Nyu nyakamonyola lʼatei a wudja ami dia nkundja awambu wʼepunga la etenyi ka ma, dia ndjala antu wahahumbi mvo la nshimbamela antu wahahumbi numba, uma lu aui watunyutelaka wudja ami, watulungaka aui wa kashi.

²⁰ Okone Khumadiondjo Latuyalaka kata ati: Nyulungi, dimi lutsha ndo la ehanga anyu watunyuyangaka etema wʼantu. Dimi layehatula uma lu anya anyu; dimi layutshungula etema watunyuyangaka, layafumbula uku fudu.

²¹ Dimi layuhatula ndu alembo wa lʼete anyu; layutshungula wudja ami uma lu anya anyu, diaha vo mpenyahenya ntu lu anya anyu. Ku nyu nyayeya nyati: Dimi keli Latuyalaka.

²² Nyu nyakanyangia etema wʼantu wʼololo la kashi, wakimi kunyangia. Nyu nyakakikitsha anya wʼantu wa kolo, ne dia vo watukukalula uma lu mbuka yawo ya kolo la numba.

²³ Diako mbahanyena waenelo wa kashi ntu, kuyanga nsaka awulu. Dimi layushimbela wudja ami uma lu anya anyu. Ku nyu nyayeya nyati: Dimi keli Latuyalaka.