Ezekiyele 12 - La Bible en Otetela (Bible K'Ekila) 1991

Ezekiyele Ambenya Djimbitelu yʼEtshwelu kʼUtsha lu Fumbi

¹ Diui dia Latuyalaka diakayi le mi ntu ati:

² Onʼa untu, we atudja-seka lʼatei a khumbu kʼatomboki. Vo la ashu wa mena, keli hawenyi; vo la atui wa mbuka, keli hawuki, ne dia khumbu kʼatomboki kewo.

³ Okone we onʼa untu, uyakelekeli tshumutshumu ya untu latatshu utsha lu fumbi. Umo uma lʼatei awo la yanyi, unela uma lu dihuli diaye utsha lu dihuli dikina lu ashu awo. Kuyanga mbewo khumbu kʼatomboki, vo wayukana yimba ntu.

⁴ Kutundja tshumutshumu yaye la yanyi lu ashu awo, uku tshumutshumu ya fumbi. Unela uma lʼatei awo uku atunelaka antu utsha lu fumbi.

⁵ Kutunduli ushu lʼeheli ka lukumbu la ntundu kawo, kutumbi loko.

⁶ Kahe tshumutshumu lu diheka, kutumbi la yo la hyutshihutshi, kukumbi elundji kaye, utukena kete, ne dia dimi lambukudja djimbitelu le khumbu ka Isariyele.

⁷ Ku dimi lakatshi uku akandamvutela. Dimi lakatundja tango tami la yanyi uku tshumutshumu ya fumbi. Ku la dikolo, dimi lakatundula ushu lʼeheli ka lukumbu la lunya lami. Dimi lakatumbi loko la hyutshihutshi, latayembe lu diheka la ntundu kawo.

⁸ La wedi a pindju, diui dia Latuyalaka diakayi le mi ati:

⁹ We onʼa untu, khumbu ka Isariyele, khumbu kʼatomboki, watakumbula vati: Atshaye na?

¹⁰ Uwateli wati: Khumadiondjo Latuyalaka kata okone ati: Djimbitelu nye yeko lu dikambu dia uwandji wa Jerusalema, ndu dia khumbu ka Isariyele tshe wudjashi lʼatei awo.

¹¹ Uti wati: Dimi leko djimbitelu le nyu. Uku akamatshi, mbayuwatshela. Vo wayutsho utsha lu fumbi, utsha lu lohombo.

¹² Uwandji awo ayali tshumutshumu lu diheka la hyutshihutshi, ayunela. Ndi ayutundula ushu lʼeheli dia ntumba la yo loko. Ndi ayukumba elundji kandi, ne dia ashu andi watukena kete.

¹³ Ndu dimi layuwamba otei, ku ndi ayundama lu djunga yami. Dimi layotola la Babilona lu kete yʼasi Kaladiya. Ndi hutena kete yako, kuyanga ndi ayuvo leko.

¹⁴ Dimi layuhandjula waku tshe weli lasuki la ndi watukima-nyiaka, la alimbi andi tshe. Ku dimi layuyelana la wo la yombo.

¹⁵ Ku vo wayeya vati: Dimi keli Latuyalaka lamʼayumuhandjula lʼatei a wedja, lamʼayumadianganya lʼatei a waulelu.

¹⁶ Keli dimi layuhandja atoi awo uma lu yombo, uma lu ndjala ka kasha, la uma lu elandu, dia vo ntusanya dia akambu awo tshe wa wononyi. Ku vo wayeya vati: Dimi keli Latuyalaka.

¹⁷ Diui dia Latuyalaka diakayi le mi ntu ati:

¹⁸ Onʼa untu, uli ma la lukumba; ono ashi adidima la woma.

¹⁹ Uteli asi wudja wati: Khumadiondjo Latuyalaka kata okone lu dikambu diʼasi Jerusalema, lu kete ya Isariyele, ati: Vo wayole ma la woma, wayono ashi wadidima lukumba. Kete yawo yayulanyema, yo la diango tshe dieli loko, ne dia akambu wa ngala wʼantu tshe wudjashi loko.

²⁰ Esumba wudjashi antu wayuyala atongo, la kete yayuyala elanyelu. Ku nyu nyayeya nyati: Dimi keli Latuyalaka.

²¹ Diui dia Latuyalaka diakayi le mi ntu ati:

²² Onʼa untu, na kitshimudi ka yukedi yatunyutaka lu kete ya Isariyele nyati: Nshi yambeta efula, la waenelo tshe wambuyala anyanya?

²³ Okone uwateli wati: Khumadiondjo Latuyalaka kata ati: Dimi layete yukedi nye anyanya. Vo hawuyitaka uku yukedi lu Isariyele ntu. Uwateli wati: Nshi yaya suki ya enelo kʼakambu wahatayi nshidiyama.

²⁴ Waenelo wa kashi la asakelu wʼawulu wʼanyanya hawenama ntu lʼatei a khumbu ka Isariyele.

²⁵ Dimi leli Latuyalaka, layoteketa, ku diui diayumuta, diayushidiyama. Dio hadiukungama ntu. Nyu khumbu kʼatomboki, dimi layuta diui, ku layudishidiya lu nshi yanyu, mbata Khumadiondjo Latuyalaka.

²⁶ Diui dia Latuyalaka diakayi le mi ntu ati:

²⁷ Onʼa untu, uki, khumbu ka Isariyele mvutaka vati: Enelo kenandi, keki nshi efula. Ndi atutaka akambu wahatayi weki edja.

²⁸ Okone uwateli wati: Khumadiondjo Latuyalaka kata ati: Nduku diui diatami diayutshimbatshi-mba ntu. Diui diatami diayushidiyama, mbata Khumadiondjo Latuyalaka.