Ezekiyele 11 - La Bible en Otetela (Bible K'Ekila) 1991

Ambuhangwela Ewandji wa Kolo

¹ Nyuma ka Unyashungu akamunyia, akambela uya lu suku dia lu leke lʼehutwelu ka unya dia luudu la Latuyalaka, ntani ku apami akumi ahendi la atanu ane wemadi la suku. Jazaniya, onʼa Azura, la Pelatiya, onʼa Benaya, ewandji wa wedja waki lʼatei awo.

² Ku Nyuma akamvutela ati: Onʼa untu, antu ane watusanguyaka ntsha kolo, watulakaka asi usumba alaku wa kolo;

³ wakati vati: Etena kene kema etena ka mpika mvudu, usumba one weli puki ka wuki, la shu teko unatshi.

⁴ Okone we onʼa untu, uti akambu wahatayi lu dikambu diawo, uti akambu wahatayi!

⁵ Nyuma ka Latuyalaka akambahema. Ndi akamvutela ati: Uti wati: Latuyalaka kata ati: Nyu khumbu ka Isariyele, okone la okone mbakananyu, ne dia dimi mbeyaka tukanyi tanyu.

⁶ Nyu nyakatamanya ndjala antu lʼusumba one, nyakaludia esese la edu wʼantu wakanyadiaki.

⁷ Diako mbata Khumadiondjo Latuyalaka ati: Antu wakanyadiaki lʼatei wʼusumba weli unatshi, la usumba one weli puki ka wuki. Keli dimi layunyutundja uma loko.

⁸ Nyu nyakuki yombo woma, okone dimi layunyela yombo, mbata Khumadiondjo Latuyalaka.

⁹ Dimi layunyutundja uma lʼatei wʼusumba, layunyukimo lu anya wʼasi wedja, layunyulumbuya.

¹⁰ Nyu nyayudiakema la yombo. Dimi layutunyulumbuya lʼulelu wa Isariyele. Ku nyu nyayeya nyati: Dimi keli Latuyalaka.

¹¹ Usumba one huyala puki kanyu ka wuki, la nyu hanyuyala unatshi loko. Dimi layutunyulumbuya lʼulelu wa Isariyele.

¹² Ku nyu nyayeya nyati: Dimi keli Latuyalaka. Nyu kundjela elembe ami kuyanga lama adjangu ami, keli nyu nyakatshaka uku weli adjangu wa wedja weli lʼutshimba anyu.

¹³ Kamʼakamataka akambu wahatayi, Pelatiya, onʼa Benaya, akavu. Ku dimi lakako ekhukhumadi la kete, lakadi tukuku ta wulu nti: Hai, Khumadiondjo Latuyalaka! Undi, we ayushila atshikadi wa Isariyele ushiki?

Daka Dia Ekalweyu la Eluwanyelu

¹⁴ Ku diui dia Latuyalaka diakayi le mi ati:

¹⁵ Onʼa untu, waku weli ananyo, asikaye weli kame la ye lu lohombo, khumbu tshe ka Isariyele, mbeli waku wakatela asi Isariyele vati: Nyumo etali uma le Latuyalaka, ne dia kete yanyu yakakimwama le su uku etenyi kʼukito.

¹⁶ Okone uti wati: Khumadiondjo Latuyalaka kata ati: Kuyanga dimi lakawanganya etali lʼatei a wedja, kuyanga lakahandjula lʼatei a waulelu, dimi lakatukuyala etemwelo le wo nshi motshi lʼatei a kete yambuwukuma.

¹⁷ Okone uti wati: Khumadiondjo Latuyalaka kata ati: Dimi layunyusanganya uma lʼatei a wedja, layunyukaluya uma lʼatei a waulelu wakamanyuhandjula, ku layunyusha kete ya Isariyele.

¹⁸ Vo wayutsho utsha leko, ku wayutunya dikishi tshe la diango tshe dia wononyi leko.

¹⁹ Ku dimi layuwasha utema otoi, layudja nyuma kʼuyuyu lʼatei awo. Dimi layunya etema wʼave uma lʼalimba awo, layuwasha etema wʼemunyi,

²⁰ dia vo mbeya ndjela elembe ami la nama adjangu ami la mbatsha. Ku vo wayuyala wudja ami, la dimi layuyala Unyashungu awo.

²¹ Keli lu dikambu dia waku watuyelaka dikishi diawo la diango dia wononyi, dimi layakaluya etsha awo lu ete awo, mbata Khumadiondjo Latuyalaka.

²² Ku akeruba wakasimbula ahafu awo, etshimbi waki lasuki la wo. Lutumbu la Unyashungu wa Isariyele laki ladiku diawo.

²³ Lutumbu la Latuyalaka lakambela uma lʼatei wʼusumba, lakatahema ladiku diʼukungu weli lu leke lʼehutwelu ka unya lʼusumba.

²⁴ Nyuma ka Unyashungu akamunyia, akamembe lu enelo utsha la Kaladiya le afumbi, ku enelo kakamenyi kakamo uma le mi.

²⁵ Ku dimi lakatela afumbi akambu tshe wakamenya Latuyalaka.