Euhwelu kʼElembe 4 - La Bible en Otetela (Bible K'Ekila) 1991

Mose Ambosengasenga Isariyele dia Vo Ndjala la Ukitanyia

¹ Kakiane, Isariyele li! nyuki elembe la adjangu wayangami nyetsha Nyetshaki, mbayunyuyala la lulumbi, mbayunyukuma lu kete ya sangu, yambunyusha Latuyalaka, Unyashungu a washenyu.

² Tanyaheki nduku diui ladiku diʼaui wamumunyutela, ndu tanyunyaki nduku diui uma loko. Keli nyulamaki elembe wa Latuyalaka, Unyashungu anyu, uku amumunyutelawo.

³ Ashu anyu wakenyi uku akatshi Latuyalaka lu dikambu dia Bala-Peore. Latuyalaka, Unyashungu anyu, akadiaki wane tshe wakayeli Bala-Peore uma lʼatei anyu.

⁴ Keli nyu, wane wakamamema Latuyalaka, Unyashungu anyu, nyu tshe nyeko la lumu elo.

⁵ Enda, dimi lakanyetsha elembe la adjangu, uku akambidjangela Latuyalaka, Unyashungu ami, dia nyu mbatshaka lu kete yatanyatshu dia ntukita.

⁶ Kanyalamaki ndu kanyakitanyiaki, ne dia vo mbayuyala yimba yanyu, la ewu kanyu lu ashu a wedja lamʼayuwuka elembe ene tshe. Vo wayuta vati: Wudja one a wuki weli wudja wʼakanga a tumba la ewu mete, mete.

⁷ Wudja a wuki akona weli la etemolatemola lasuki uku eli Latuyalaka, Unyashungu asu, lasuki la su tena tshe diatutuwetaka?

⁸ Ndu wudja a wuki weli la elembe la adjangu wʼusimbwi uku elembe ene tshe wamumukitsha la ntundu kanyu.

Isariyele la Horeba

⁹ Dikambu otoi, uyalami, umbi utema aye ololo nshi tshe ya lumu laye, ne dia utukuyuhela akambu wakayenyi lʼashu, ndu watukutumba uma lʼutema aye. Kuwaetshaki anʼaye la ekana aye —

¹⁰ uku lushi lakayemala la ntundu ka Latuyalaka, Unyashungu aye la Horeba, lamʼakamvutela Latuyalaka ati: Unsanganyia wudja, keli mbaukia aui ami, dia vo mbeka lama mbukami woma etena tshe kayuwuyalaka la lumu la kete, ndu dia vo mbetsha anʼawo.

¹¹ Nyu nyakasukana, nyakayemala la tshina diʼukungu. Ukungu ako waki lu mpeta dja; nyumbi yakambela pulu ndu lʼulungu. Udjima, angi, la luhutshihutshi wakayala.

¹² Ku Latuyalaka akateketa la nyu uma lʼatei wa dja. Nyu nyakuki aui, keli nyu komena wuhu wendi, nyakuki paka diui ntu.

¹³ Ndi akanyutela daka diandi diakandanyutela dia nyu nama, diako dieli elembe dikumi. Ndi akefundi lu pasi pendi diʼave.

¹⁴ Lʼetena keso, Latuyalaka akambidjangela dia dimi nyetsha elembe la adjangu, dia nyu ntetsha lu kete yatanyatshu dia ntukita.

Wambewula Isariyele Diaha Vo Ntemola Ditemolatemola

¹⁵ Okone nyuyalami ololo. Ne dia nyu komena wuhu weli Latuyalaka lushi lakandateketaka la nyu la Horeba lʼatei wa dja,

¹⁶ nyewo, ne dia nyutukutsha akambu wa ndjalanya, dia nyu ndjatshela efanelu kemotshi ka losela lu wuhu omotshi wʼelundji, efanelu ka pami kana ka umuntu,

¹⁷ efanelu ka nyama keli la kete, efanelu ka fudu katufumboka lʼulungu,

¹⁸ efanelu ka nyama katuyakutulaka la kete, efanelu ka lusi latuyalaka lʼashi wa la kete.

¹⁹ Ewo, ne dia lamʼediaye ashu utsha lʼulungu, ndu lamʼenaye unya, ngondo la toto, ului tshe wa diango dia lʼulungu, utukuyukutwama dia dikhusela adui la ditemola, diango diakakahanya Latuyalaka, Unyashungu anyu, le wedja tshe weli la tshina diʼulungu wʼutundu.

²⁰ Keli Latuyalaka akanyose, akanyutundja uma lu khuka ka mbulu, uma lʼEdjibitu, dia nyu ndjala wudja andi hita, uku wenyu elo kene.

²¹ Ku Latuyalaka akambuki kele dikambu dianyu, akatshibi diaha dimi nteho Jorodana, la aha nkuma lu kete yʼololo yambunyusha Latuyalaka, Unyashungu anyu, sangu.

²² Dimi layuvo lu kete nye, haluteho Jorodana. Keli nyu nyayuteho, nyayutukita kete yako yʼololo.

²³ Nyuyalami, ne dia nyutukuhela sheki ya Latuyalaka, Unyashungu anyu, yakandadji la nyu, ndu nyutukuyatshela efanelu lu wuhu omotshi wʼengo kakanyusike Latuyalaka, Unyashungu anyu,

²⁴ ne dia Latuyalaka, Unyashungu anyu, eli dja ya dikita, Unyashungu a kandjema.

²⁵ Lamʼayunyuyala la ana la ekana, ndu lamʼayunyuyala edja lu kete ku, naka nyu nyambutsha akambu wa ndjalanya, dia ntsha efanelu ka losela lu wuhu omotshi wʼengo, ndu dia ndjatshela kene keli kolo lu ashu wa Latuyalaka, Unyashungu anyu, dia mbutsha kele,

²⁶ dimi lambeta ulungu la kete elo dia vo ndjala emenyi anyu. Nyu nyayushila ushiki shashimuya lu kete yatanyatshu la ntukita la wedi wa Jorodana. Nyu hanyulumba edja leko, ne dia nyu tshe nyayutuvo.

²⁷ Latuyalaka ayunyuhandjula lʼatei a wedja; nyu nyayutshikala paka djui ya tshitshe lʼatei a wedja, lene ayundunyotola.

²⁸ Ku leko, nyayutotemola ditemolatemola, diʼutamba kana dia dive, ulimu wakatshi anya wʼantu, diaheyi mena, mbuka, nde, kuyanga nona.

²⁹ Leko kayunyutuyanga Latuyalaka, Unyashungu anyu, ndu kayunyututana, naka nyu nyayutuyanga lʼetema anyu tshe ndu la lumu lanyu tshe.

³⁰ Lamʼayunyuyala la asui, ndu lamʼayuya akambu ane tshe le nyu lu nshi yayayi, nyu nyayukalula le Latuyalaka, Unyashungu anyu, nyu nya-yukitanyia diui diandi.

³¹ Ne dia Latuyalaka, Unyashungu anyu, eli Unyashungu a ketshi, ndi hunyoseka, hunyudiaka, kuyanga mbuhela daka diakandalaki washenyu, diakandatshibela.

³² Nyumbuli nshi yʼedjedja yaketi la ntundu kanyu, umaka lushi lakatungi Unyashungu untu la kete, ndu umaka kuma kemotshi kʼulungu pulu ndu lu kuma kawo kekina, nyati: Dikambu dimotshi dia wuki diakiko uku dikambu ne, kana diakukema uku dikambu ne?

³³ Wudja omotshi wakuki diui dia etemolatemola ateketa lʼatei wa dja, uku akanyuki, ku vo ntshikala la lumu?

³⁴ Undi, etemolatemola kemotshi kakiko, kakahimbi ntuyaosela wudja omotshi uma lʼatei a wudja ukina lʼahimbilu, tulimbitelu, akambu a mamba la ata, la lunya la wulu ndu lʼusimbwi, la sasi, uku akatshi Latuyalaka, Unyashungu anyu, lu ashu anyu lʼEdjibitu lu dikambu dianyu?

³⁵ Dikambu ne diakenyama le nyu, dia nyu mbeya nyati: Latuyalaka keli Unyashungu, nduku ukina ladiku dia ndi.

³⁶ Ndi akanyukia diui diandi uma lʼulungu, dia ndi nyekiya; akanyenya dja yandi ya wuki la kete, ku nyu nyakuki aui andi uma lu dja yako.

³⁷ Ne dia ndi akalangi washenyu, mbakandasonola tukanula tawo lʼokongo awo. Ndi akanyutundja la eyalelu kandi uma lʼEdjibitu la wulu andi wa mamba.

³⁸ Ndi akanyutshanyia wedja wakanyuleki efula ndu wulu waki la ntundu kanyu, dia nyukumia lu kete yawo, dia nyushayo ukito uku lu lushi lʼelo.

³⁹ Nyeyi elo, nyulami dikambu ne lʼetema anyu, nyati: Latuyalaka, keli Unyashungu ladiku, lʼulungu, ndu lesi, la kete, nduku ukina leko.

⁴⁰ Okone nyulamaki elembe andi la adjangu andi wamumunyutela elo, dia nyu ndjala la ongenongeno nyu la anʼanyu, mbayufulaka nshi yanyu lu kete yambunyusha Latuyalaka, Unyashungu anyu.

Esumba wʼEshamelu wa lu Leke lʼEhutwelu ka Jorodana

⁴¹ Ku Mose akasonola esumba esatu la wedi wa Jorodana lu leke lʼehutwelu,

⁴² dia undjakanyi ndawo leko, lambudiaka unyandi lahandatungi lutunga ndu laki kundjala utunyi andi nshi kina, dia undjakanyi ndawo lʼusumba omotshi lʼatei wʼesumba ako.

⁴³ Kumbu yʼesumba ako nye: Bezere, lʼusui wa shenga, lu kete ya bamubamu, waki wʼasi Rubena; Ramota ka la Ngiliyade, waki wʼasi Ngada; la Ngola ka la Bashana, waki wʼasi Manase.

Mose Ambuhula Asi Isariyele Elembe

⁴⁴ Onʼeli elembe wakakitsha Mose la ntundu kʼasi Isariyele.

⁴⁵ Vo weli emenyi, welu la adjangu, wakatela Mose asi Isariyele lamʼakawatumbi uma lʼEdjibitu.

⁴⁶ Oso aki la wedi wa Jorodana, lʼukndi lu welelo wa Bete-Peore, lu kete ka Sihona, khumʼekanga kʼasi Amora, lakadjashi la Heshibona, ndu lakalembiama le Mose la asi Isariyele lʼokongo wʼetumbelu kawo uma lʼEdjibitu.

⁴⁷ Vo wakahotola kete yandi ndu ya Onga, khumʼekanga ka Bashana. Khumi ya dikanga yako hendi yʼasi Amora yaki la wedi wa Jorodana, lu leke lʼehutwelu ka unya.

⁴⁸ Kete yawo yakasimbemadi umaka Aroere, lu emamu wa kyoko ya Aranona, edja ndu lʼUkungu wa Siriyona (wetawo vati: Heremona),

⁴⁹ kame la Araba tshe wa la wedi wa Jorodana, lu leke lʼehutwelu pulu lʼUduwa a Araba, pulu ndu la tshina dia Pisinga.