Euhwelu kʼElembe 2 - La Bible en Otetela (Bible K'Ekila) 1991

LʼUsui wa Shenga

¹ Shu takatshimbi, takatshu utsha lʼusui wa shenga lu mbuka kʼutsha lʼUduwa a Tilili, uku akamvutela Latuyalaka. Shu takatshimbi Ukungu a Seire nshi kambi.

² Latuyalaka akamvutela ati:

³ Nyu nyambutshimba lu leke lʼekungu lone edja, nyaya nkadimo utsha la ngelʼa kushi.

⁴ Uteli wudja wati: Kanyeti lʼulelu wʼanengenyu, asika Esau, wudjashi la Seire; vo wayunyuka woma. Keli kanyewo,

⁵ tanyamaki la wo. Dimi halunyusha kete yawo kuyanga hyuli ya nkitsha dikaka, ne dia dimi lambukimoka Ukungu a Seire sangu le Esau.

⁶ Nyayusumba ma dia nyu nde uma le wo lusumba la falanga, nyayusumba ndu ashi wa nyu no lusumba la falanga.

⁷ Latuyalaka, Unyashungu anyu, akanyotshokola lʼulimu tshe wʼanya anyu. Ndi mbeyaka lokendo lanyu lʼusui one a wuki wa shenga. Deku akumi anei ne, Latuyalaka, Unyashungu anyu, aki la nyu; nyu kumpumba nduku engo.

⁸ Ku shu taketi etali uma le anengesu, ana wa Esau, wudjashi lu Seire, etali uma lu mbuka kʼAraba, kʼuma lu Elate ndu kʼuma la Ezedjona-Ngebere. Ku takakadimo, taketi lu mbuka kʼutsha lʼusui wa shenga wa Moaba.

⁹ Latuyalaka akamvutela ati: Tanyamaki lʼasi Moaba, tanyolokaki la wo ta, ne dia dimi halunyusha nduku engo ka nyu nkita lu kete yawo. Le ana wa Lota kakamakimo Ara sangu.

¹⁰ (Asi Emime wakadjashi loko ntundu waki antu a waki efula ndu etali uku asi Anaka.

¹¹ Vo mbeyamaka ntu uku asi Refayima, uku asi Anaka. Keli asi Moaba mbaetaka vati: Asi Emime.

¹² Ndu asi Hori mbakadjashi ntunduntundu lu Seire, keli asika Esau wakahotola kete yawo, wakadiaki, wakawanya la ntundu kawo. Vo wakadjase lu dihuli diawo, uku akatshi asi Isariyele lu kete yakawakiti, yakawasha Latuyalaka.)

¹³ Kakiane nyuneli, nyuteho kyoko ya Zerede. Okone shu takateho kyoko ya Zerede.

¹⁴ Etena kakatayi uma la Kadeshe-Baranea edja ndu lamʼakatayuteho kyoko ya Zerede, aki deku akumi asatu la enanei, edja ndu lamʼakashili lolonga lʼapami luku, lakalokaka ata uma lʼatei a pangu, uku akatshibela Latuyalaka.

¹⁵ Ndu lunya la Latuyalaka laki ladiku diawo, dia mbalanya la mbanya uma lu pangu, edja ndu lamʼakawashili.

¹⁶ Lamʼakashili andoshi wa ta tshe mvo uma lʼatei a wudja,

¹⁷ Latuyalaka akamvutela ati:

¹⁸ Keti elo lʼulelu wa Moaba utsha la Ara.

¹⁹ Lamʼayunyukuma lasuki lʼasi Amona, tanyasulaki, tanyamaki la wo, ne dia dimi halunyusha nduku engo lu kete yʼasi Amona uku sangu, ne dia dimi lambuyisha ana wa Lota sangu.

²⁰ (Kete yako mbeyamaka ntu uku kete yʼasi Refayima. Asi Refayima mbakadjashi loko ntundu, ku asi Amona wakawaetaka vati: Zamezumima,

²¹ antu a waki, efula, ndu etali, uku asi Anaka. Keli Latuyalaka akadiaki la ntundu kʼasi Amona lamʼakawahotola kete yawo. Ku vo wakatudjase lu dihuli diawo.

²² Osoku mbakatshela Latuyalaka ana wa Esau, wudjashi la Seire lamʼakandadiaki asi Hori la ntundu kawo. Vo wakawatshanya, ku wakatudjase lu dihuli diawo edja ndu elo.

²³ Asi Ave wakadjaseka lu ngelu motshi edja ndu la Ngaza, wakadiakema le asi Kafetore, wakayi uma la Kafetore, ku wakayudjase lu dihuli diawo.)

²⁴ Nyuneli, nyutshu, nyeti lʼukndi wʼAranona. Enda, lambukimo Sihona usi Amora, khumʼekanga ka Heshibona lu anya aye, ndi la kete yandi. Utateli ndjosa, olo la ndi.

²⁵ Elo, layutatela mbidja woma la lukumba lʼetema wʼantu tshe weli la tshina diʼulungu, ku lamʼayuwuka lukumu laye, vo wayusaka kumba, wayundama la sasi dikambu diaye.

Isariyele Ambolembia Sihona

²⁶ Dimi lakatumi akendji uma lʼusui wa shenga wa Kedemote, le Sihona, khumʼekanga ka Heshibona, lʼaui wa ki nti:

²⁷ Etawo dimi mbeta lu kete yaye. Dimi layeta paka lu osese, dimi haletola lu lunya la lupami kana lu lunya la lomoso.

²⁸ We ayunsundja ma dia dimi nde lusundja la falanga, ndu ayunsundja ashi wa dimi no lusundja la falanga Dimi layeta paka mbeta tshu lʼekulu.

²⁹ Osoku mbakatutshela ana wa Esau wudjashi la Seire ndu asi Moaba wudia shi la Ara. Kuntsheli osoku, edja ndu lamʼayumuteho Jorodana utsha lu kete yakatusha Latuyalaka, Unyashungu asu.

³⁰ Keli Sihona, khumʼekanga ka Heshibona, kumbetawo shu mbeta lu wudja andi, ne dia Latuyalaka, Unyashungu anyu, akete lumu landi lunyu ndu akakeketsha utema andi dia ndi mbukimo lu anya anyu, uku lu lushi lʼelo.

³¹ Latuyalaka akamvutela ati: Enda, lambutatela nkukimwela Sihona la wudja andi. Utateli mbosa kete dia we yikita.

³² Ku Sihona akatumbi dia ndjuhumana la su ndi la wudja andi tshe, dia ndjolo la su la Jahaza.

³³ Latuyalaka, Unyashungu asu, akatukimwelandi. Ku shu takolembia, ndi la anʼandi la wudja andi tshe.

³⁴ Takahotola esumba andi tshe lʼetena kako, takashili apami, amantu la ana ushiki, kuntshika nduku otoi.

³⁵ Tshikima dungalunga mbakatose uku diango dia lohotola, kame la diango dia dimbu diakatayaosela lu esumba wakatalembia, mbakatshikala.

³⁶ Uma lʼAroere, lʼumamu wʼukndi wa Aranona ndu uma lʼusumba weli lʼukndi, edja ndu la Ngiliyade, nduku usumba wakatuleki wulu. Latuyalaka, Unyashungu asu, akakimo tshe lu anya asu.

³⁷ Keli tanyusukanaki lu kete yʼasi Amona, lʼemamu tshe wʼokedi wa Jaboka, lʼesumba wa lu leke lʼakuna ndu lu ahuli tshe wakatusike Latuyalaka, Unyashungu asu.