Etumbelu 8 - La Bible en Otetela (Bible K'Ekila) 1991

¹ Ku Latuyalaka akatela Mose ati: Kutshu le Farayo. Kutuwuteli wati: Latuyalaka kata ati: Ukimo wudja ami, watshu dia ntontemola.

² Keli naka we ambutuna mbakimo, ulungi, dimi layulanya kete kaye kʼutundu la ekole.

³ Nile kayululanela too la ekole. Vo wayutumba, wayoto lu luudu laye la mbetama ndu lu tangi kaye, lu mvudu yʼekambi aye, ndu lu mvudu yʼantu aye, lu atshuka aye wa nkate ma, ndu lu diango diaye dia nsohanya.

⁴ Ekole wayukahema lu dimba, ndu lu alimba wʼantu aye ndu wa ekambi aye tshe.

⁵ Latuyalaka akatela Mose ati: Uteli Arona wati: Usimbuli lunya laye la danga diaye ladiku diʼekedi, ladiku dia tokoko ndu ladiku diʼeduwa. Utundja ekole lu kete ya Edjibitu.

⁶ Ku Arona akasimbula lunya landi ladiku diʼashi wa lu Edjibitu. Ku ekole wakatumbi, wakakumbi kete ya Edjibitu.

⁷ Keli akanga wʼaloho wakatshi aloho awo pupu. Vo wakatundja ekole lu kete ya Edjibitu.

⁸ Ku Farayo aketi Mose la Arona, akawatela ati: Nyolombe Latuyalaka dia ndi ntunyia ekole, dimi la wudja ami. Ku layetawo antu ane ntsho dia vo ntulambula Latuyalaka elambu.

⁹ Mose akakaluya Farayo diui ati: Weme, uma koi, keli la wulu wa mvutelami etena ka shikaa ka dimi nyolombela, we la ekambi aye, ndu wudja aye le Latuyalaka, dia ekole ndjakema, la mumo uma le ye la uma lu mvudu yaye, la dia vo ntshikala paka lu Nile.

¹⁰ Ku ndi akûkaluya diui ati: Lui. Mose akati ati: Kadiuyali uku wataye, dia we mbeya wati: Nduku ledimi la Latuyalaka, Unyashungu asu.

¹¹ Ekole wayumo uma le ye, uma lu mvudu yaye, uma lʼekambi aye, ndu uma le wudja aye. Vo wayutshikala paka lu ndjali.

¹² Ku Mose la Arona wakatumbi uma le Farayo. Okone Mose akalelela Latuyalaka dikambu dia ekole wakandatumela Farayo.

¹³ Ku Latuyalaka akatshi uku diui dia Mose. Ekole wakavu lu mvudu, lu aseke, ndu lʼesui.

¹⁴ Antu wakemotsha elui, ku sulu kakayala lu kete yako.

¹⁵ Keli lamʼakenyi Farayo ati: Ambuyala mumuya, ndi akakikitsha utema. Ndi kumbaukela, uku akati Latuyalaka.

Sui dia Shidi

¹⁶ Ku Latuyalaka akatela Mose ati: Uteli Arona wati: Usimbuli danga diaye, udikomole lu ditshu dia kete, dia dio nkadimo shidi lu kete tshe ya Edjibitu.

¹⁷ Ku vo wakatshi osoku. Arona akasimbula lunya landi la danga diandi, akadikomola lu ditshu dia kete, ku shidi yakayala lu alimba wʼantu ndu wa nyama. Ditshu tshe dia lu kete ya Edjibitu diakakadimo shidi.

¹⁸ Ku akanga wʼaloho wakahimbi aloho awo dia ntunga studi, keli vo kumbeya ntsha. Okone shidi yaki lu alimba wʼantu ndu wa nyama.

¹⁹ Akanga wʼaloho wakatela Farayo vati: Luhita la Unyashungu lone! Keli utema wa Farayo wakakikitala. Ndi kumbukela Mose la Arona, uku akati Latuyalaka.

Sui dia Tshingu

²⁰ Ku Latuyalaka akatela Mose ati: Keto kʼolomo la pindju, kutukungeli Farayo lamʼayundutumba dia ntsho lʼashi. Kutuwuteli wati: Latuyalaka kata ati: Ukimo wudja, watshu dia ntontemola.

²¹ Dikambu dikina, naka we hetawo wudja ami ntsho, ulungi, dimi layunyutumela moma moma dia tshingu, we la ekambi aye, ndu la wudja aye. Mvudu yʼasi Edjibitu yayulula too la moma moma dia tshingu, ndu kete yayukumbama tshe la yo.

²² Keli lushi lako dimi layatanya kete ya Ngoshena, lene udjashi wudja ami. Tshingu huyala leko; dia we mbeya wati: Dimi keli Latuyalaka la kete.

²³ Okone dimi layutshikitanya wudja ami la wudja aye. Djimbitelu yako yayenama lui.

²⁴ Ku Latuyalaka akatshi osoku. Moma moma dia tshingu diakoto lu luudu la Farayo ndu lu mvudu yʼekambi andi. Kete ya Edjibitu tshe yakalana la tshingu.

²⁵ Ku Farayo aketi Mose la Arona; akawatela ati: Nyutshu, nyutulambuli Unyashungu anyu elambu lu kete yami nye.

²⁶ Keli Mose akakaluya diui ati: Hasungana dia ntsha osoku, ne dia shu tayutulambula Latuyalaka elambu weli nyetete lu ashu wʼasi Edjibitu. Okone naka shu tayulambula elambu asu weli nyetete le asi Edjibitu lu ashu awo, vo hawutuka ave?

²⁷ Shu mpumbaka ntsho lokendo la nshi shatu lʼusui wa shenga. Tayutulambula Latuyalaka, Unyashungu asu, elambu, uku ayundututela.

²⁸ Ku Farayo akati ati: Dimi layunyukimo dia nyu ntulambula Latuyalaka, Unyashungu anyu, elambu lʼusui wa shenga. Dikambu otoi, tanyutshoki etali; onombele.

²⁹ Ku Mose akati ati: Enda, dimi luyanga mumo la le ye; layolomba Latuyalaka. Lui, tshingu yayumo uma le Farayo la ekambi andi, la uma le wudja andi. Keli Farayo tanyimbiyaki ntu, tatunaki nkimo wudja one dia vo ntulambula Latuyalaka elambu.

³⁰ Okone Mose akatumbi uma laka Farayo, akatolomba Latuyalaka.

³¹ Latuyalaka akatshi uku akblombe Mose, akanyiya Farayo, ekambi andi, ndu wudja andi moma moma dia tshingu. Nduku lutshingu otoi lakatshikala.

³² Keli Farayo akakikitsha utema ndu lu etena keso ntu. Ndi kumbetawo dia wudja ntsho.