Etumbelu 7 - La Bible en Otetela (Bible K'Ekila) 1991

¹ Latuyalaka akatela Mose ati: Enda, lambukete uku Unyashungu le Farayo. Ku onanyo Arona ayuyala umvutshi aye.

² We ayutaka aui tshe wayumukutelaka, ku onanyo Arona ayoteketaka le Farayo, dia ndi nkimo asi Isariyele, dia vo ntumba uma lu kete yandi.

³ Keli dimi layukikitsha utema a Farayo, ndu layufudia tulimbitelu tami la akambu ami wa mamba lu kete ya Edjibitu.

⁴ Farayo hunyukela, ku dimi layusimbula lunya lami ladiku dia Edjibitu, layutundja elui ami wʼantu, wudja ami ana wa Isariyele, uma lu kete ya Edjibitu la dumbwelu dia waki.

⁵ Ku asi Edjibitu wayeya vati: Dimi keli Latuyalaka, lamʼayumusimbula lunya lami ndu lamʼayumutundja asi Isariyele uma lʼatei awo.

⁶ Mose la Arona wakatshi osoku. Vo wakatshi uku akawatela Latuyalaka.

⁷ Mose aki la deku akumi enanei, ku Arona akumi enanei la satu lamʼakawateketaka la Farayo.

Danga dia Arona

⁸ Latuyalaka akatela Mose la Arona ati:

⁹ Lamʼayunyutela Farayo ati: Nyutshi dikambu dimotshi dia mamba, we kuteli Arona wati: Ose danga diaye, udikadja la ntundu ka Farayo; ku dio diayuyala ului.

¹⁰ Ku Mose la Arona wakatshu le Farayo, wakatutsha uku akawatela Latuyalaka. Arona akakadja danga diandi la ntundu ka Farayo la ekambi andi, ku dio diakakadimo ului.

¹¹ Farayo aketi akanga a yimba la akanga wʼaloho wa lʼEdjibitu, ku ndu vo wakayutsha aloho awo pupu.

¹² Vo tshe untu lʼuntu akakandja danga diandi, ku vo wakakadimo elui. Keli danga dia Arona diakamene alanga awo.

¹³ Ku utema wa Farayo akakikitala. Ndi kumbukela Mose la Arona, uku akati Latuyalaka.

Sui dia Dikila

¹⁴ Ku Latuyalaka akatela Mose ati: Utema a Farayo ambukikitala. Ndi ambutuna dia nkimo wudja one dia vo ntsho.

¹⁵ Kumutsho le Farayo la pindju lamʼayundutumba utsha la lushi. Kutukungi lʼumamu wʼokedi. Kukimeli danga diatukadimoka ului lu lunya laye.

¹⁶ Kutuwuteli wati: Latuyalaka, Unyashungu wʼasi Heberu, kuntumi le ye, dia nkutela ati: Ukimo wudja ami watshu, dia ntontemola lʼusui wa shenga. Ku enda, edja ndu kakiane we atambukela.

¹⁷ Latuyalaka kata ati: Lu dikambu ne, mbayuyunimbitela wati: Dimi keli Latuyalaka. Enda, dimi lutsha nkomola danga diukimedimi lu lunya lami lu ashi wa Nile, ku ashi wayukadimo dikila.

¹⁸ Nsi yatuyalaka lu Nile yayuvo, la ashi wa Nile wayuyala sulu. Asi Edjibitu wayuka wononyi dia no ashi ako.

¹⁹ Latuyalaka akatela Mose ati: Uteli Arona wati: Osa danga diaye, usimbuli lunya laye ladiku diʼashi wʼasi Edjibitu: ekedi awo, tokoko tawo, eduwa awo, ndu nyanda yawo yʼashi, dia vo nkadimo dikila. Ku dikila diayuyala lu kete ya Edjibitu tshe: lu ehundi ndu lu mbaka.

²⁰ Mose la Arona wakatshi uku akawatela Latuyalaka. Arona akedia danga, akadikomola lu ashi wa Nile la ntundu ka Farayo la ekambi andi. Ku ashi tshe wa lu Nile wakakadimo dikila.

²¹ Okone nsi ya lu Nile yakavu. Nile akayala sulu, ku asi Edjibitu kumbeya no ashi wa lu Nile ntu. Dikila diakayala lu kete tshe ya Edjibitu.

²² Keli akanga wʼaloho wa lʼEdjibitu wakatshi aloho awo pupu, ku utema wa Farayo wakakikitala. Ndi kumbaukela, uku akati Latuyalaka.

²³ Farayo akasikiso, akatshu utsha lu luudu landi. Ndi kumbidja tukanyi tandi lu dikambu diako nduku yema.

²⁴ Asi Edjibitu tshe wakatshimi afuku lʼumamu a Nile dia ntana ashi wa no, ne dia vo kumbeya no ashi wa Nile.

Sui dia Ekole

²⁵ Nshi esambeli yaketi uma lamʼakakomola Latuyalaka ashi wa Nile.