Etumbelu 6 - La Bible en Otetela (Bible K'Ekila) 1991

¹ Keli Latuyalakaakakaluya Mose diui ati: Kakiane we ayena uku ayumutshela Farayo. La lunya la wulu mbayunduwaunyia, ee, la lunya la wulu mbayunduwatshanya uma lu kete yandi.

² Unyashungu akatela Mose ati: Dimi keli Latuyalaka.

³ Dimi lakene le Abarahama, le Isaka ndu le Jakoba, uku Unyashungu, Kanga-Wulu-Tshe. Keli uma lu lukumbu lami Latuyalaka, dimi kundjaenya dime le wo.

⁴ Dimi lakashikike daka diami le wo, dia mbasha kete ya Kanana, lu kete yakawadjashi uku angendangenda.

⁵ Dikambu dikina, dimi lakuki akhumu wʼasi Isariyele, wako weli asi Edjibitu lu nkimela lu fumbi, ku dimi lakuho daka diami.

⁶ Okone ututeli asi Isariyele wati: Dimi keli Latuyalaka, layunyutundja uma lʼelimu wʼasi Edjibitu; dimi layunyutshungula uma lu lohombo lawo; dimi layunyushimbela la lunya la wulu lʼusimbwi, ndu la dumbwelu dia waki.

⁷ Dimi layunyosa dia nyu ndjala wudja ami. Dimi layuyala Unyashungu anyu, la nyu nyayeya nyati: Latuyalaka, Unyashungu asu, kakatutshungula uma lʼelimu a wulu wʼasi Edjibitu.

⁸ Dimi layunyolombola utsha lu kete yakamatshibi dia mbisha Abarahama, Isaka, la Jakoba. Dimi layunyushayo, dia yo ndjala kete yanyu hita. Dimi keli Latuyalaka.

⁹ Mose akateketa osoku le asi Isariyele, keli vo kumbukela Mose, ne dia okei awo la lohombo lawo la wulu.

¹⁰ Latuyalaka akatela Mose ati:

¹¹ Tshoka, ututeli Farayo, khumʼekanga ka Edjibitu, akimo asi Isariyele dia vo ntumba uma lu kete yandi.

¹² Keli Mose akatela Latuyalaka ati: We henyi, asi Isariyele kumbukelami. Ukundi ayumbukela Farayo, dimi untu kanga elomo wa mindu?

¹³ Ku Latuyalaka akateketa le Mose la Arona, akawasha okende le asi Isariyele, ndu le Farayo, khumʼekanga ka Edjibitu, dia ntundja asi Isariyele uma lu kete ya Edjibitu.

¹⁴ Ete wa khumbu ya Isariyele ene: Ana apami wa Rubena, onʼa Isariyele lʼenundu, ane: Hanoka, Palu, Hezerona la Karami. Aso weli khumbu ya Rubena.

¹⁵ Ana apami wa Simeyona ane: Jemuele, Jamina, Ohada, Jakina, Zohara, la Shaulu, ona pami lakanduti la umuntu usi Kanana. Aso weli khumbu ya Simeyona.

¹⁶ Kumbu yʼana apami wa Lewi uku nonga yawo nye: Ngereshona, Kohata, la Merari. Lewi akalumbi deku lukama la akumi asatu la esambeli.

¹⁷ Ana apami wa Ngereshona ane: Libini, la Shimei, uku khumbu yawo.

¹⁸ Ana apami wa Kohata ane: Amurama, Izehara, Heberona la Uziyele. Kohata akalumbi deku lukama akumi asatu la satu.

¹⁹ Ana apami wa Merari ane: Mali, la Mushi. Aso weli khumbu ya Lewi uku nonga yawo.

²⁰ Amurama akatshuki Jokebede, kadiya shi. Ku ndi akuti la ndi Arona la Mose. Amurama akalumbi deku lukama akumi asatu la esambeli.

²¹ Ana apami wa Izehara ane: Kora, Nefenge, la Zikiri.

²² Ana apami wa Uziyele ane: Mishaele, Elezafana, la Sitiri.

²³ Arona akatshuki Elisheba, onʼa Aminadaba, kadiya Nashona. Ku ndi akuti la ndi Nadaba, Abihu, Eleazara, la Itamara.

²⁴ Ana apami wa Kora ane: Asiri, Elekana, la Abiyasafu. Aso weli khumbu yʼasi Kora.

²⁵ Eleazara, onʼa Arona la pami, akatshuki ona omotshi uma lʼatei wʼana amantu wa Putiele. Ku ndi akuti la ndi Finehasi. Aso weli ete wa khumbu yʼasi Lewi, uku khumbu yawo.

²⁶ Le Arona la Mose ako kakateketa Latuyalaka ati: Nyutundja asi Isariyele uma lu kete ya Edjibitu, uku eli elui awo.

²⁷ Mose la Arona ako mbakateketaka le khumʼekanga ka Edjibitu dia ntundja asi Isariyele uma lʼEdjibitu.

²⁸ Lu lushi lomotshi, lamʼakateketaka Latuyalaka la Mose lu kete ya Edjibitu,

²⁹ Latuyalaka akatela Mose ati: Dimi keli Latuyalaka. Ututeli Farayo, khumʼekanga ka Edjibitu, aui tshe wakutelami.

³⁰ Keli Mose akakaluya Latuyalaka diui ati: We henyi, dimi leko kanga elomo wa mindu. Ukundi ayumbukela Farayo?