Etumbelu 40 - La Bible en Otetela (Bible K'Ekila) 1991

Wambeme Etemwelo ka Dipema

¹ Latuyalaka akatela Mose ati:

² Keme etemwelo ka dipema ka luudu lʼesanganelu la dipema lu ngondo ka ntundu, lushi lʼetatelu.

³ Kukitsha oshete wa sheki wʼomenyi loko, kukumbi oshete wa sheki la dihondo diʼatanyelu.

⁴ Kotshiya mesa, kolongosole diango dieli ladiku diawo. Kotshiya ndu ekitshelu ka tala, kolongosole atala ato.

⁵ Kukitsha ediakelu ka paunyi kʼulambu wa malashi la ntundu kʼoshete wa sheki wʼomenyi; kuhane dihondo dia ndjihaka suku dia etemwelo ka dipema.

⁶ Kukitsha ediakelu kʼulambu wa lutshumba la ntundu ka suku dia etemwelo ka dipema ka luudu lʼesanganelu la dipema.

⁷ Kukitsha donga lʼasa luudu lʼesanganelu la dipema la ediakelu, kudji ashi loko.

⁸ Kuhiki lukumbu la seke lʼutshimba; kuhane dihondo la suku dia lukumbu la seke.

⁹ Kose iso ka lukita, kukiti lu etemwelo ka dipema ndu lu diango tshe dieli loko. Kulukidia, lo la diango dialo tshe diʼulimu, ku lo layuyala ekila.

¹⁰ Kukiti ndu ediakelu kʼulambu wa lutshumba iso ndu diango diato tshe diʼulimu, kukidia ediakelu. Ku ediakelu kayuyala ekila kuleki.

¹¹ Kukiti ndu donga la ekitshelu kadio iso, kudikidia.

¹² Kuyi la Arona la anʼandi wʼapami uya la suku dia luudu lʼesanganelu la dipema, kuwaotsha lʼashi.

¹³ Kolotsha Arona eloto wʼekila, kukiti iso, ndu kukidia, dia ndi ntsha ulimu ami wʼolombedi.

¹⁴ Kusukanya anʼandi wʼapami, kuwalotsha sumishi yʼasangu,

¹⁵ kuwakiti iso uku akayakiti shewo, dia vo ntsha ulimu ami wʼolombedi. Ekitelu kawo kene, kayuwashikike lʼulimu wʼolombedi pundju pundju, edja ndu lu nonga la nonga.

¹⁶ Ku Mose akatshi; akambu tshe wakawutela Latuyalaka, mbakandatshi.

¹⁷ Okone vo wakahiki etemwelo ka dipema lu lushi lʼetatelu la ngondo ka ntundu, lu eleku ka hendi kʼetumbelu kawo uma lʼEdjibitu.

¹⁸ Mose akeme etemwelo ka dipema; akadji dikitshelu, akakitsha abaya la esimbi, akeme dikoho diato.

¹⁹ Ku ndi akahatanya ukumbo ladiku dia dipema, uku akawutela Latuyalaka.

²⁰ Ndi akose omenyi, akawudji lʼoshete wa sheki. Ndi akasome esimbi lu ashingu wʼoshete wa sheki, ku akafule ufudi ladiku diʼoshete.

²¹ Ndi akotshiya oshete wa sheki lu etemwelo ka dipema. Ndi akahane dihondo diʼatanyelu, akadikumbi oshete wa sheki, uku akawutela Latuyalaka.

²² Ndi akakitsha mesa lu luudu lʼesanganelu la dipema, lu leke lʼutsha la ngelʼa kushi lʼetemwelo ka dipema, lʼandja wa dihondo diʼatanyelu.

²³ Ndi akalongosola ma, akadilonge lu mesa la ntundu ka Latuyalaka, uku akandawutela.

²⁴ Ndi akakitsha ekitshelu ka tala lu luudu lʼesanganelu la dipema, lu leke la diku dia kushi lʼetemwelo ka dipema, kelanedi la mesa.

²⁵ Ndi akalongosola atala la ntundu ka Latuyalaka, uku akawutela Latuyalaka.

²⁶ Ndi akakitsha ediakelu ka paunyi lu luudu lʼesanganelu la dipema la ntundu ka dihondo diʼatanyelu.

²⁷ Ndi akatshumbi ulambu wa malashi wʼupumu ladiku diato, uku akatela Latuyalaka Mose.

²⁸ Ndi akahane dihondo la suku dia etemwelo ka dipema.

²⁹ Ndi akakitsha ediakelu kʼulambu wa lutshumba lasuki la suku dia etemwelo ka dipema ka luudu lʼesanganelu la dipema. Ndi akatshumbi ulambu wa lutshumba ndu ulambu wa shima ladiku diato, uku akatela Latuyalaka Mose.

³⁰ Ndi akakitsha donga lʼasa luudu lʼesanganelu la ediakelu, akadji ashi wa ndjaotsha loko.

³¹ Mose, Arona la anʼandi wʼapami, wakotshaka anya la ekulu loko.

³² Vo wakayaotshaka tena tshe lamʼakawotoka lu luudu lʼesanganelu la dipema ndu lamʼakawasukanaka la ediakelu, uku akatela Latuyalaka Mose.

³³ Ndi akahiki lukumbu la seke lʼutshimba tshe wa etemwelo ka dipema la ediakelu. Ndi akahane dihondo la suku dia lukumbu la seke. Osoku mbakashidiya Mose ulimu.

Dingi Diambukumba Luudu lʼEsanganelu la Dipema

³⁴ Dingi diakakumbi luudu lʼesanganelu la dipema, ku lutumbu la Latuyalaka lakaluli lu etemwelo ka dipema.

³⁵ Mose kumbeya mboto lu luudu lʼesanganelu la dipema, ne dia dingi diakalukumbi, ndu ne dia lutumbu la Latuyalaka lakaluli lu etemwelo ka dipema.

³⁶ Asi Isariyele wakunelaka lu kendo yawo tena tshe lamʼakamoka dingi uma ladiku dia etemwelo ka dipema.

³⁷ Keli vo kumunelaka naka dingi diatamo. Tshikima lu lushi lumwedio, ku vo munela.

³⁸ Dingi dia Latuyalaka diakatshikalaka ladiku dia etemwelo ka dipema, ku lʼutshu, dio diakayalaka lumbi la dja. Osoku mbakadiatayalaka la ntundu ka asi Isariyele lu kendo yawo tshe.