Etumbelu 4 - La Bible en Otetela (Bible K'Ekila) 1991

¹ Keli Mose akakaluya diui ati: Keli enda, vo hawetawo aui ami, nduhawumbukela. Vo wayuta vati: Latuyalaka komene le ye.

² Latuyalaka akawumbula ati: Kakona keli lu lunya laye? Ku ndi akûkaluya diui ati: Danga.

³ Ku ndi akati ati: Kadjadlo lu kete. Ku ndi akadikadja lu kete, ku dio diakayala ului. Mose akulawo.

⁴ Keli Latuyalaka akatela Mose ati: Usimbuli lunya laye, uwundi lu wela. Okone ndi akasimbula lunya landi, akawundi, ku vo wakakadimo danga lu lunya landi —

⁵ dia vo mbetawo vati: Latuyalaka, Unyashungu a washewo, Unyashungu wʼAbarahama, Unyashungu wa Isaka, Unyashungu wa Jakoba, akene le ye.

⁶ Latuyalaka akawutela ntu ati: Udji lunya laye lu tulu. Ndi akadji lunya landi lu tulu, ku lamʼakandatundja lunya landi, endi ku lo lakayadi vu la sudi, kasaa uku pembe.

⁷ Ku Unyashungu akati ntu ati: Ukaluya lunya laye lu tulu. Osoku ndi akakaluya lunya landi lu tulu kandi. Lamʼakandalutundja, endi ku lo lakayadi dimena uku beke dikina dia dimba.

⁸ Unyashungu akati ati: Naka vo hawetawo aui aye, ndu hawudji yimba lu djimbitelu ya ntundu, vo wayetawo lu djimbitelu ya hendi.

⁹ Naka vo hawetawo uma lu tulimbitelu tuhendi tone, kana mbidja yimba lu diui diaye, kutose tema tʼashi uma lu Nile, ku we mbatshulula lu kete yʼufumbu. Ku ashi wayuyutosa uma lu Nile, wayukadimo dikila ladiku dia kete yʼufumbu.

¹⁰ Keli Mose akatela Latuyalaka ati: Ai! Khumemi, dimi untu lahatudjaka nteketa, kuyanga lu nshi ya ntundu kuyanga kamʼateketaye la ukambi aye aso; dimi kanga oteketa wʼokoke la lulimi wutshu!

¹¹ Ku Latuyalaka akawumbula ati: Akona akatungi unyo wʼuntu? Akona ateteka untu lumi, luhuki, osenyu, kana tshungu? Aha dimi Latuyalaka?

¹² Okone utshu kakiane, dimi layuyala la unyo aye, layuketsha okone ayuyoteketa.

¹³ Keli ndi akosengasenga ati: Khumemi li, utumi one lalangaye ntuma.

¹⁴ Ku Latuyalaka akuki Mose kele, akawumbula ati: Onanyo Arona, usi Lewi, kemako uka? Dimi mbeyaka nti: Ndi mbeyaka nteketa ololo. Enda, ndi uku ayayi la ndjuhumana la ye. Lamʼayundukena, ndi ayongenangena lʼutema andi.

¹⁵ We ayoteketaka la ndi, ayuwutelaka aui, ku dimi layuyalaka la unyo aye ndu la unyo andi. Dimi layunyetshaka okone ayunyutsha.

¹⁶ Ndi ayukoteketelaka la antu; ndi ayuyala unyo aye, ku we ayuyala uku Unyashungu le ndi.

¹⁷ Kukimeli danga diku lu lunya laye, ku we ayutshaka tulimbitelu la dio.

Mose Ambukalula lʼEdjibitu

¹⁸ Mose akunela, akakalula le ukilu andi Jetero; akatuwutela ati: Dimi lambukosengasenga nti: Unkimo nkaluli le wane wuto la mi lʼEdjibitu, ntuwaendi kana vo weko la lumu. Ku Jetero akakaluya Mose diui ati: Utshu la ki.

¹⁹ Latuyalaka akatela Mose la Midiyana ati: Ukaluli lʼEdjibitu; ne dia antu tshe wakayangi nkudiaka, wambuvokaka.

²⁰ Ku Mose akose wadendi la anʼandi wʼapami, akawahe ladiku dia punda, ku ndi akakalula lu kete ya Edjibitu. Mose akayakimedi danga dia Unyashungu lu lunya.

²¹ Latuyalaka akatela Mose ati: Lamʼayuyukalula lʼEdjibitu, endi, kututshi akambu wa mamba tshe wamumukusha la ntundu ka Farayo. Keli dimi layukikitsha utema andi, diaha ndi nkimo wudja one dia vo ntsho.

²² Kututeli Farayo wati: Latuyalaka kata ati: Isariyele keli onʼami a pami lʼenundu;

²³ dimi lambukutela nti: Ukimo onʼami a pami, dia ndi ntsho, atunkambeli utimu. Naka we ayutuna mbukimo, ulungi, dimi layudiaka onʼaye a pami lʼenundu.

²⁴ Latuyalaka akahumana la Mose lu dihuli dimotshi diakawatuhanga lu mbuka, ndi akayangi mbudiaka.

²⁵ Ku Zipora akose etshi ka dive, akahimbula onʼandi a pami lototo. Ndi akose etenyi ka lototo, akananda akaka wa Mose la to, ata ati: Mete, utshuki a wadi a dikila mbeye la mi!

²⁶ Ku Latuyalaka akukimo. Lu dikambu dia ahamelu kʼuhekeli, mbakati Zipora ati: Utshuki a wadi a dikila mbeye.

²⁷ Ku Latuyalaka akatela Arona ati: Utshu utsha lʼusui wa shenga, utuhumani la Mose. Ku ndi akatshu, akatuhumana la Mose lʼukungu wa Unyashungu, akukhumbatela.

²⁸ Mose akatela Arona aui tshe wa Latuyalaka wakandutumi, ndu tulimbitelu tshe takandawudjangela dia ndi ntsha.

²⁹ Ku Mose la Arona wakakimela mbuka, wakatusanganya dihangamendi tshe diʼasi Isariyele.

³⁰ Ku Arona akasanya aui tshe wakatela Latuyalaka Mose, akatshi ndu tulimbitelu tako lu ashu wʼantu.

³¹ Ku antu waketawo. Lamʼakuki asi Isariyele lukumu vati: Latuyalaka ambokendela asi Isariyele, ambena ndu asui awo, vo wakakole ete, wakotemola.