Etumbelu 34 - La Bible en Otetela (Bible K'Ekila) 1991

Pasi diʼAve Dikina

¹ Latuyalaka akatela Mose ati: Osele pasi pendi diʼave uku dia ntundu. Ku dimi layufunda aui waki lu pasi dia ntundu, diakayuli, loko.

² Kuyalongosole la pindju, kumbeli lʼUkungu a Sinai la pindju. Kutuyaenya leko le mi lʼote wʼukungu.

³ Untu tambelaki kame la ye lʼukungu; untu tenamaki lʼutundu wʼukungu tshe. Ekoko kuyanga ngombe, tayoleki adiyu lu welelo wʼukungu.

⁴ Ku Mose akasele pasi pendi diʼave uku dia ntundu. Ku ndi akunela kʼolomo la pindju, akambela lʼUkungu a Sinai atembe pasi diako pendi, uku akawutela Latuyalaka.

⁵ Ku Latuyalaka akahulo lu dingi, akayemala la le ndi, aketi lukumbu la Latuyalaka.

⁶ Latuyalaka aketi la ntundu kandi, akahangohango ati: Latuyalaka, Unyashungu a ketshi ndu ngandji ka mamba, lahuki kele esadi, luludi too la ngandji ka shikaa la kolamelu;

⁷ latukaka antu nunu nunu ngandji ka shikaa, latudimanyiaka wengiya, uhedia, la kolo. Keli ndi huyindja kanga unungu nduku yema, ndi atosomboyaka wengiya a washi le anʼawo, ndu le ekana awo, edja ndu lolonga la satu kana lolonga la nei.

⁸ Mose akakole ote andi esadi utsha la kete, akatemola.

⁹ Ndi akati ati: Khumemi li! Naka dimi lakahumo lukulu lʼolo lu ashu aye, lambukosengasenga nti: We Khumemi, utshu lʼatei asu, kuyanga mbeli wudja one la ete wulu. Utudimanyia wengiya asu la kolo yasu. Utose dia shu ndjala wudja aye wʼukito.

¹⁰ Latuyalaka akûkaluya diui ati: Enda, lambukimo daka. Dimi layutshaka akambu wa mamba la ntundu ka wudja aye, wuhu wahatatshama lu kete tshe kuyanga lʼatei a wudja omotshi. Antu tshe wudjashi la ye, wayena ulimu wa Latuyalaka, ne dia dikambu diayumutsha kame la ye, diayuyala dikambu dia woma efula.

Ambewula Isariyele dia Otemwelo wa Dikishi wa Kanana

¹¹ Ulami diui diakutelami elo. Enda, dimi layukutshanyia asi Amora, asi Kanana, asi Hiti, asi Perizi, asi Hiwi ndu asi Jebuse uma la ntundu kaye.

¹² Ewo, ne dia utukutudja sheki la akanga a kete, lene ayuyutatshokaka, ne dia sheki yako yatukuyala djunga le ye.

¹³ Okone kanyuhandjuli diakelu diawo; kanyulanya pingu yawo; kanyatshatsha dikishi diawo diʼAshera

¹⁴ (totemolaki nduku etemolatemola, ne dia Latuyalaka, letawo vati: Kanga Kandjema, eli Unyashungu a kandjema),

¹⁵ ne dia utukutudja la akanga a kete sheki. Lamʼayuwotemola ditemolatemola diawo, la dilambula elambu, untu omotshi atukuyuketa dia we ntole nyama kʼulambu andi.

¹⁶ We utukuyutshukela anʼanyu wʼapami anʼawo wʼamantu. Ku lamʼayotemola anʼawo wʼamantu ditemolatemola diawo, vo watukukutula anʼanyu wʼapami dia vo ntemola ditemolatemola diawo.

¹⁷ Tuyatshelaki nduku etemolatemola ka lolelola.

Lushi la Wuki la Ma Diaha la Edya

¹⁸ Kulamaki lushi la wuki la ma diaha la edya. Kolekaki ma diaha la edya nshi esambeli, lu etena kakamashikike, lu ngondo ka Abiba, uku akamakudjangela, ne dia lu ngondo kako kʼAbiba kakayatumbi uma lʼEdjibitu.

¹⁹ Tata kundu tshe teli tami, waumi tshe wa dungalunga dianyu, tata kundu ta ngombe ndu tʼekoko.

²⁰ Keli kukimo ona okoko dia ntshungula yata kundu ya punda. Naka we halangi yitshungula, kuyokole kingu. Kutshunguli tata kundu tshe tʼanʼaye wʼapami. Untu tenamaki la ntundu kami anya atu.

Lushi la Mumuya, la Nshi ya Waki Yakawashikike

²¹ Kukambaki ulimu nshi shamalu, keli kumuyaki lushi lʼesambeli. Lu nshi ya mune ndu lu nshi ya dinela, kumuyaki.

²² Kulamaki lushi la wuki la olonga wʼepunga, ndu lushi la wuki la dinela tshe diʼekumelu kʼeleku.

²³ Apami tshe kawenamaki la ntundu ka Khumadiondjo, Latuyalaka, Unyashungu wa Isariyele, tena satu lʼeleku.

²⁴ Dimi layutshanya wedja uma la ntundu kaye; layokokola elelu aye. Nduku untu layukumbula kete yaye lamʼayuyutshokaka dia ntenama la ntundu ka Latuyalaka, Unyashungu, tena satu lʼeleku.

Mose Ambufunda Elembe Dikumi

²⁵ Tulambulaki dikila diʼulambu ami kame la ma dieli la edya. Ulambu wa lushi la wuki lʼelekanelu tawutshikalaki umaka dikolo edja ndu pindju.

²⁶ Kelaki elonga wa dinela diʼuma lu dikambo uya lu luudu la Latuyalaka, Unyashungu aye. Tukateki yana ya mbudi lu awele wa nyangu.

²⁷ Ku Latuyalaka akatela Mose ati: Ufundi aui ane; ne dia dimi layuyela aui ane lu daka diamumudja la ye, ndu lʼasi Isariyele.

²⁸ Mose akatshikala leko ndi la Latuyalaka tanyi akumi anei la etshu akumi anei. Ndi konde ma, kuyanga no ashi. Ku ndi akafundi aui wa daka lu pasi diʼave. Aui ako mbeli elembe dikumi.

Elundji ka Mose Kakahete

²⁹ Lamʼakayahuloka Mose uma lʼUkungu a Sinai ayakimedi pasi diʼave pendi diʼomenyi lu anya, Mose kumbeya ati: Elundji kandi kakahete lamʼakandasawulaka la Latuyalaka.

³⁰ Lamʼakenyi Arona lʼasi Isariyele elundji ka Mose kayahete, vo wakuki woma dia nsukana la le ndi.

³¹ Keli Mose akawaeti. Ku Arona la dihangamendi dia wudja wakakalula uya le ndi, ku Mose akateketa la wo.

³² Lʼokongo diku, asi Isariyele tshe wakayusukana la le ndi, ku ndi akawatela adjangu tshe wakandalungula uma le Latuyalaka, lʼUkungu a Sinai.

³³ Lamʼakashili Mose nteketa la wo, ndi akakumbi dihondo lʼelundji kandi.

³⁴ Keli tena tshe diakatshokaka Mose la ntundu ka Latuyalaka dia ntusawula la ndi, ndi akanyaka dihondo, edja ndu ndi ambutumba. Ku lamʼakandatumbaka, ndi akatelaka asi Isariyele aui tshe wakawawutelaka.

³⁵ Lamʼakendaka asi Isariyele Mose, vo wakenaka elundji kandi kaheta ngaingai. Diako mbakayukumbaka Mose dihondo lʼelundji kandi, edja ndu lamʼakandakalulaka dia ntusawula la Latuyalaka.