Etumbelu 32 - La Bible en Otetela (Bible K'Ekila) 1991

¹ Lamʼakenyi antu vati: Mose ambutubiya, hahulo uma ladiku diʼukungu, vo wakadingi Arona; wakawutela vati: Unela, ututsheli etemolatemola kemotshi, kayokendakendaka la ntundu kasu, ne dia shu hateyi okone ambutuyala Mose kene, untu lakatutundja uma lu kete ya Edjibitu.

² Arona kakaluya diui ati: Nyunya ashingu wa paunyi weli lu atui a wadienyu, wa anʼanyu wʼapami ndu wa anʼanyu wʼamantu, nyumbelawo.

³ Ku antu tshe wakanya ashingu wa paunyi waki lu atui awo, wakawaela Arona.

⁴ Ku ndi akalungula uma lu anya awo, akalongosola etemolatemola la utshimo, akatshi yana ya ngombe ya lolelola. Ku vo wakati vati: Isariyele li, etemolatemola kanyu, kakanyutundja uma lu kete ya Edjibitu kene!

⁵ Lamʼakenyi Arona dikambu so, ndi akatshi ediakelu la ntundu kato. Ku Arona akahangohango ati: Lui, ayuyala lushi la wuki le Latuyalaka.

⁶ Ku vo waketo kʼolomo la pindju, wakalambula elambu wa lutshumba, wakela elambu wa ki. Ku antu wakadjase dia nde la no; wakemala dia no wenye.

⁷ Latuyalaka akatela Mose ati: Uhulo, ne dia wudja aye, wakayatundja uma lu kete ya Edjibitu, wambuyalanya.

⁸ Vo wambunganela esadi uma lu mbuka kakamawadjangela. Vo wambuyatshela yana ya ngombe ya lolelola; wambuyitemola, wambuyilambula ulambu, wata vati: Isariyele li! etemolatemola kanyu, kakanyutundja uma lu kete ya Edjibitu kene!

⁹ Latuyalaka akatela Mose ati: Dimi lakendi wudja one, ku lakenyi nti: Wudja wʼantu wʼete wulu mbewo.

¹⁰ Diako mbakamati nti: Untshiki dime, dia kele kami mpeta le wo, ku dimi layashila. Keli layutunga wudja a wuki uma le ye.

¹¹ Mose akasengasenga Latuyalaka, Unyashungu andi, ati: Latuyalaka li! ukundi amboheta kele kaye le wudja aye, wakayatundja la wulu wa mamba ndu la lunya la wulu uma lu kete ya Edjibitu?

¹² Ukundi ukuki asi Edjibitu mvuta vati: La kanyi ya mbatshela kolo mbakandatundja, dia mbadiaka lu ekungu, la mbashila ushiki ladiku dia kete? Ukadimo uma lʼududu wa kele kaye, olembe utema uma lu kolo kene, tutshelaki wudja aye kolo.

¹³ Uho uku akayalaki ekambi aye Abarahama, Isaka la Isariyele, weme wati: Dimi layufudia tukanula tanyu uku toto ta lʼulungu; layusha tukanula tanyu kete tshe yakamakutela, ku vo wayuyikita pundju.

¹⁴ Latuyalaka akalembe utema uma lu kolo kakandakani dia ntshela wudja andi.

¹⁵ Ku Mose akasikiso, akabulo uma lʼukungu ukimedi pasi pendi diʼomenyi lu anya, pasi diakafundami wedi ako ehendi. Ehasi lʼehasi kakafundama wedi ako ehendi.

¹⁶ Pasi diaki ulimu wa Unyashungu; ndu efundelu kakafundama loko, kaki efundelu ka Unyashungu, kakatshimama la utshimo ladiku dia pasi.

¹⁷ Lamʼakuki Jashua lundju lʼantu wakahangohangoka, ndi akatela Mose ati: Lundju la ta loso leli la pangu.

¹⁸ Mose akûkaluya diui ati: Lundju loso kema lʼanembishi, kuyanga lʼanembiami: keli lundju lʼembilu kʼesambu mbukami.

¹⁹ Lamʼakandasukana la pangu, ndi akenyi yana ya ngombe, lʼantu wano wenye. Ku Mose akandunganela la kele, akakadja pasi diaki lu anya andi, akadiuli la tshina diʼukungu.

²⁰ Ku ndi akose yana ya ngombe yakawatshi; akayitshumbi lu dja; akayete efushi etu. Ndi akadianganya efushi ako ladiku diʼashi; akenosha asi Isariyele.

²¹ Mose akambula Arona ati: Kakona kakakutshela wudja one, kakayawahela kolo kene ka wuki lʼete?

²² Arona akûkaluya diui ati: Khumemi, tumvudanganelaki la kele; we mbeyaka antu ane wati: Vo mbelelaka utsha lu kolo.

²³ Vo wakamvutela vati: Ututsheli etemolatemola kemotshi, kayokendakendaka la ntundu kasu, ne dia Mose kene, untu lakatutundja uma lu kete ya Edjibitu, hateyi okone ambunduyala.

²⁴ Okone dimi lakawatela nti: Wane weli la paunyi, wayela, ku vo wakambishayo. Dimi lakayidji lu dja, ku yana ya ngombe nye yakatumbi.

²⁵ Lamʼakenyi Mose ati: Wudja wakatoloko (ne dia Arona akakimo dia vo ntoloko dia mbutshama sonyi le atunyi awo),

²⁶ ku Mose akemala la suku dia pangu. Ndi akati ati: Akona eli lu leke la Latuyalaka? Ndi ayi le mi. Ku ana apami tshe wa Lewi wakamote la le ndi.

²⁷ Ku ndi akawatela ati: Unyashungu wa Isariyele kata ati: Nyu tshe, untu lʼuntu asome yombo yandi lu lukendi, eteti lu suku la suku, akinduli lu pangu, ndu untu lʼuntu adiaki onangu, untu lʼuntu unyandi, untu lʼuntu usukanyi andi.

²⁸ Ku ana wa Lewi wakatshi uku akawatela Mose. Ku lasuki lʼapami nunu satu wʼasi Isariyele wakavu lushi lako.

²⁹ Mose akawatela ati: Elo, nyu nyakayakidisha ne dia ulimu wa Latuyalaka, untu lʼuntu lʼushinga a lumu la onʼandi kana la onangu, dia ndi nyutshulwela etshoko lushi lʼelo.

³⁰ La wedi a pindju, Mose akatela antu ati: Nyu nyakatshi kolo ka wuki. Kakiane dimi luyanga mumbela utsha le Latuyalaka; undu dimi mbeyaka ntutunga ekesanelu ne dia kolo kanyu.

³¹ Okone Mose akakalula le Latuyalaka; akati ati: Yee! wudja one wakatshi kolo ka wuki; wakayatshela etemolatemola ka paunyi.

³² Keli kakiane, naka we ayulanga nyimanyia kolo kawo; ndu naka kema, dimi lambukosengasenga nti: Unyimuli uma lu buku diaye diakayafundi.

³³ Ku Latuyalaka akakaluya Mose diui ati: Untu tshe lakantshela kolo, ndi kayumudimula uma lu buku diami.

³⁴ Keli utshu kakiane, olombole wudja one utsha lene akamakutela. Enda, ondjelo ami ayokendakendaka la ntundu kaye. Keli lushi layumasomboya, dimi layasomboya ne dia kolo kawo.

³⁵ Ku Latuyalaka akatumela wudja sui, ne dia vo wakatshi yana ya ngombe yakatshi Arona.