Etumbelu 31 - La Bible en Otetela (Bible K'Ekila) 1991Leta la Bezalele la Oholiyabe ( Etum. 35:30—36:1 ) 1 Latuyalaka akatela Mose ati: 2 Enda, dimi lambeta Bezalele, onʼa Uri, onʼa Hura, uma lu diuhu dia Juda lukumbu. 3 Dimi lambuludia la Nyuma ka Unyashungu, la komba, la yimba, ndu la ewu ka mbeya wehu tshe wʼelimu, 4 dia ndi ntatela sangweyu diʼelimu wa komba, wa ntsha la paunyi, la fesa, ndu lʼehotela, 5 ndu dia mpimbula ave wa ntsha dikitshelu, la wa nsela abaya, ne dia ntsha elimu tshe. 6 Enda, dimi lambosonola ndu Oholiyabe, ona pami a Ahisamaka, uma lu diuhu dia Dane, dia ndi ndjala kame la ndi. Dimi lambusha akanga a tumba komba dia vo ntsha diango tshe diakamakutela: 7 luudu lʼesanganelu, oshete wa sheki wʼomenyi, ufudi weli ladiku diawo, la diango tshe diʼulimu, dia lu luudu lʼesanganelu la dipema, 8 mesa la diango diawo, ekitshelu ka tala ka paunyi la diango diato tshe, ediakelu ka malashi, 9 ediakelu kʼulambu wa lutshumba la diango diato tshe, donga la ekitshelu kadio, 10 eloto wakatelama dimena, eloto wʼekila wʼolombedi Arona, la eloto wa anʼandi, wa nkambaka ulimu awo wʼolombedi, 11 iso ka lukita, malashi wʼupumu wʼololo ne dia dihuli diʼekila. Kawutshi tshe uku akamakutela. Lushi la Mumuya Ambuyala Djimbitelu 12 Latuyalaka akatela Mose ati: 13 Kuteli asi Isariyele ntu wati: Kanyulamaki nshi yami ya mumuya, ne dia etshelu kako kayuyala djimbitelu lʼasami la nyu, lu lolonga la lolonga, dia nyu mbeya nyati: Dimi keli Latuyalaka, latunyukidiaka. 14 Kanyulamaki lushi la mumuya, ne dia lo leli ekila le nyu. Untu tshe layululanya, ayudiakema; one tshe layutsha ulimu lushi lako, ayunyema uma lʼatei a wudja awo. 15 Kawutshaki ulimu nshi shamalu, keli lushi lʼesambeli, leli lushi la mumuya, la mumuya ka lukumu, lʼekila le Latuyalaka. Untu tshe layutsha ulimu lushi la mumuya, ayudiakema. 16 Okone asi Isariyele kawulamaki lushi la mumuya, kawulolemiaki lu nonga la nonga, uku daka dia pundju. 17 Lo leli djimbitelu ya pundju lʼasami lʼasi Isariyele, ati: Latuyalaka akatungi ulungu la kete lu nshi shamalu, ku ndi akakimo ulimu andi, akumuya lushi lʼesambeli. Yana ya Ngombe ya Paunyi ( Euh. 9:6-29 ) 18 Lamʼakashidiya Latuyalaka nsawula la Mose ladiku diʼUkungu a Sinai, ndi akawusha pasi pendi diʼomenyi, pasi diʼave, diakafundama la luhita la Unyashungu. |
La Bible en Otetela © Allianee Biblique de la Republique Democratique du Congo, 1991
Bible Society of the Democratic Republic of Congo