Etumbelu 29 - La Bible en Otetela (Bible K'Ekila) 1991

Ekidiamelu ka Arona la Anʼandi wʼApami

¹ Kutshi okone dia mbakidia, dia vo nkambelami ulimu wʼolombedi. Kose osongo a ngombe otoi wʼumi la waumi wʼekoko ahendi waha la ekomo.

² Kose shima kʼepunga ka pudipudi, kutshi ekama wa ma diaha la edya, ekati waha la edya wosohanyimi la iso, la tukamakama ta ma taha la edya toloyami la iso.

³ Kudidji lu kisaka otoi, kudiela lu kisaka, kela ndu ngombe kʼumi la waumi ahendi wʼekoko.

⁴ Kusukanya Arona la anʼandi wʼapami uya lʼeotwelo ka luudu lʼesanganelu la dipema, kuwaotsha lʼashi.

⁵ Kose eloto, kolotsha Arona sumishi, ukutu wʼukutu wa nemo, ukutu wa nemo la opema. Kolotsha ndu uya wa ukutu wa nemo wakatshama la lononga.

⁶ Kuwahe lufule lʼolombedi lʼote; kudji dembo dia kusu diʼekila ladiku dia lufule.

⁷ Kose iso ka lukita, kuwuteleto lʼote, kukiti.

⁸ Kusukanya anʼandi wʼapami, kuwalotsha sumishi yʼasangu.

⁹ Kolotsha Arona la anʼandi wʼapami eya. Kukeleki tufulefule lʼete wa anʼandi. Vo mbayuyala akanga wʼulimu wʼolombedi uma lʼolembe wa pundju. Osoku mbayuyukidia Arona la anʼandi wʼapami.

¹⁰ Ku kela ngombe kʼumi la ntundu ka luudu lʼesanganelu la dipema. Arona la anʼandi wʼapami kawahe anya awo lu ote wa ngombe kʼumi.

¹¹ Kudiaki ngombe kʼumi la ntundu ka Latuyalaka, lʼeotwelo ka luudu lʼesanganelu la dipema.

¹² Kose etenyi ka dikila dia ngombe kʼumi, kudikiti la luhita laye lu seki yʼediakelu. Lʼokongo diku, kutshululi dikila tshe diutshikadi la tshina diʼediakelu.

¹³ Kose wata tshe wudingami lʼesohi, ehuhi wudingi uvo, ashu wʼokongo ahendi, la wata wadingi; kuwatshumbi lʼediakelu.

¹⁴ Keli kututshumbi emunyi wa ngombe kʼumi, ekuhu kawo, ndu tumi tawo lʼandja a ngelu. Oso eli ulambu wa kolo.

¹⁵ Ku kose okoko omotshi wʼumi. Arona la anʼandi wʼapami kawahe anya awo lʼote.

¹⁶ Kudiaki okoko wʼumi. Kose dikila diawo, kudimonge lʼutshimba tshe wʼediakelu.

¹⁷ Kosese okoko wʼumi, kusuli mbu yʼutema la dimba diako nei. Kudikitsha laʼdiku dia funda ndu ladiku diʼote awo.

¹⁸ Kutshumbi okoko wʼumi tshe lʼediakelu. Vo weli ulambu wa lutshumba le Latuyalaka. Vo weli diowo dia ngenyangenya, ulambu wa nambula lu dja le Latuyalaka.

¹⁹ Kose okoko ukina wʼumi, Arona la anʼandi wʼapami kawahe anya awo lʼote wʼokoko wʼumi.

²⁰ Kudiaki okoko wʼumi; kose etenyi ka dikila diawo, kukiti lu sodi ka tui dia lupami dia Arona ndu lu sodi yʼatui wa anʼandi wa lupami, ndu lu pita yawo ya waumi ya lu anya wa lupami, ndu lu pita yawo ya waumi ya lu ekulu wa lupami. Komonge dikila diutshikadi lʼutshimba tshe wʼediakelu.

²¹ Ku kose etenyi ka dikila dieli lʼediakelu, la iso ka lukita, kukiti Arona la eloto andi, ndu anʼandi wʼapami weli la ndi la eloto awo. Ku ndi la eloto andi wayuyala ekila, ndu anʼandi wʼapami la eloto awo kame la ndi.

²² Kose ndu wata wʼokoko wʼumi, wela weli la wata, wata wudingi esohi, ehuhi wudingi uvo, ashu ahendi wʼokongo la wata wadingi ndu elemba ka lukulu la lupami (ne dia okoko wʼumi wʼekidielu mbewo),

²³ la ukama otoi wa ma, ukati otoi woloyami la iso, la kyama otoi, uma lu kisaka ka ma diaha la edya, keli la ntundu ka Latuyalaka.

²⁴ Kukitsha diango so tshe lu anya wʼArona la anʼandi. Kudietshetsha, dia dio ndjala ulambu wa letshetsha la ntundu ka Latuyalaka.

²⁵ Lʼokongo diku, kudiose uma lʼanya awo; kuditshumbi lʼediakelu ladiku dia ulambu a lutshumba, dia dio ndjala diowo dia ngenyangenya la ntundu ka Latuyalaka. Oso eli ulambu wa nambula lu dja le Latuyalaka.

²⁶ Kose tulu kʼokoko wʼumi wʼekidielu kʼArona, kukietshetsha dia to ndjala ulambu wa letshetsha la ntundu ka Latuyalaka. Tulu kako kayali etenyi kaye.

²⁷ Kûkidia tulu kʼulambu wa letshetsha la elimba ka lukulu kʼetenyi kʼolombedi, kambetshetshama ndu kambukimwama ulambu uma lʼokoko wʼumi wʼekidielu, ne dia to keli kʼArona la anʼandi wʼapami.

²⁸ Elemba kako kayuyala kʼArona la anʼandi wʼapami, uku uhiku wa punʼdju uma le asi Isariyele. To keli etenyi kʼolombedi kayulambulaka asi Isariyele uma lu elambu awo wa ki. Oso eli ulambu awo le Latuyalaka.

²⁹ Ana apami wʼArona wayukita eloto andi wʼekila. Vo wayelotaka lamʼayuwakita iso ndu lamʼayuwakidia.

³⁰ Onʼandi la pami layukita lʼulimu wʼolombedi, ayelotaka nshi esambeli lamʼayundotoka lu luudu lʼesanganelu la dipema, dia ntsha ulimu lu dihuli diʼekila.

³¹ Kose okoko wʼumi wʼekidielu, kukati emunyi awo lu dihuli diʼekila.

³² Arona la anʼandi wʼapami kawuli unatshi awo la ma dieli lu kisaka, la suku dia luudu lʼesanganelu la dipema.

³³ Kawuli diango so diakatungama ekesanelu la dio, dia vo nsonama la nkidiama. Keli, untu kʼuntu talekaki, ne dia diango diʼekila mbedio.

³⁴ Naka etenyi kʼunatshi wa nyama kʼekidielu kuyanga etenyi ka ma kambutshikala edja ndu pindju, kukitshumbi lu dja. Tawukilekaki, ne dia engo kʼekila keto.

³⁵ Kutsheli Arona la anʼandi wʼapami akambu tshe uku akamakutela. Kakidia nshi esambeli.

³⁶ Kulambulaki ngome kʼumi la lushi la lushi ulambu wa kole ne dia ekesanelu. Kulambuli ndu ulambu wa kolo dikambu dia ediakelu lamʼakitu ngelaye ekesanelu. Kukikiti iso, nkuki kidia.

³⁷ Kutungeli ediakelu ekesaneli nshi esambeli, kukikidia. Ku to kayuyali ediakelu kuleki ekila. Okone untu tshi layukinanda, ayuyala ekila.

Elambu wa la Lushi la Lushi

³⁸ Kulambulaki elambu ene lʼedia kelu: esongo ehendi wʼekoko wʼeleku otoi la lushi la lushi pundju.

³⁹ Kula mbulaki osongo omotshi la pindju ku ukina la dikolo.

⁴⁰ Kulambuli shima ka pudipudi yediko ya etenyi otoi ka dikun ka hina, kosohanyemi la iso ka mbe yediko ya etenyi otoi ka nei ka hina, la wanu etenyi otoi ka nei ka hina, ne di ulambu wa lutela.

⁴¹ Kulambuli osongo wa hendi la dikolo; kulambuli kame la ulambu wa shima ndu la ulambu ako wa lutela uku la pindju, dia ndjala diowo dia ngenyangenya, ulambu wa nambula la dja le Latuyalaka.

⁴² Vo wayuyalaka ulambu wa lutshumba tena tshe lu li longa la lolonga, lʼeotwelo ka luudu lʼesanganelu la dipema, la ntundu ka Latuyalaka. Lu dihuli diako, kayumi sanganaka la ye, dia nsawulaka la ye

⁴³ Leko kayumusanganaka la asi Isariyele. Dihuli diako diayukidiama uma lutumbu lami.

⁴⁴ Dimi layukidia luudu lʼesanganelu la dipema, ndu ediakelu. Layukidia ndu Arona la anʼandi wʼapami dia vo nkambelami ulimu wʼolombet

⁴⁵ Dimi layudjaseka lʼatei wʼasi Isariyele, ndu layuyala Unyashungu awo.

⁴⁶ Ku vo wayeya vati: Dimi keli Latuyalak Unyashungu awo, lakatundja uma kete ya Edjibitu, dia dimi mbidjase lʼatei awo. Dimi keli Latuyalaka, Unyashungu awo.