Etumbelu 23 - La Bible en Otetela (Bible K'Ekila) 1991

¹ Tudianganyaki diui dia kashi. Tuyalaki la untu a kolo kame dia ndjala omenyi a kashi.

² Tuyelaki ului wʼantu dia ntsha kolo. Tukadimoki lu leke lʼului a wuki wʼantu dia mpimbula dikambu uhimbulahimbula.

³ Tuhumuyaki usi wula lukulu lʼolo uhumuyahumuya lʼelumbwelu ne dia wula andi.

⁴ Naka we ambuhumana la elungalunga ka utunyi aye katalawo, kukikaluya le kanga to.

⁵ Naka we ambena punda ka utunyi aye, kambokomo la wutshu, tukitshikaki la wutshu ato; keli ukikimanyia dia nkiahula wutshu.

⁶ Tuhumuyaki usi wula lukulu lʼengeno uhumuyahumuya lʼelumbwelu, ne dia wula andi.

⁷ Tutaki nduku diui dia kashi. Tudiakaki untu laha la unungu ndu untu lʼololo, ne dia dimi haluyindja untu a kolo.

⁸ Tulungulaki mbu yʼutshu, ne dia yo yatulaka wane wasena washu, ndu yateteka aui wʼakanga a mete anyanya.

⁹ Tusuyaki ongendangenda. Nyu mbeyaka lumu lʼongendangenda, ne dia ndu nyu mbaki angendangenda lu kete ya Edjibitu.

¹⁰ Kuneki wuhu lu kete deku samalu, ku we ayuyala la dinela uma loko.

¹¹ Keli lu eleku kʼesambeli, kuyitshiki djasha, tuyikambaki. Osoku asi wula wa lu wudja ami wayole diango uma loko. Ku nyama ya lʼukunda yayole diango diayutshikala loko. Osoku mbayunyutsha lʼekambo ka vinyo ndu kʼetamba wʼeweli.

¹² Ukambaki ulimu aye nshi shamalu; kumuyaki lushi lʼesambeli, dia ngombe kaye ndu punda kaye mumuya, dia ona pami a fumbi kaye ka umuntu ndu ona ongendangenda ndjala la mumuya.

¹³ Ulamaki akambu tshe wakamakutela. Ndu tudimulaki nduku lukumbu la etemolatemola. Untu talukaki uma lʼunyo aye.

Nshi Shatu ya Waki Yakasonwama

¹⁴ Kuyalaki la lushi la wuki tena satu lu eleku lʼeleku dia nemiami.

¹⁵ Kuyalaki la lushi la wuki la ma diaha la edya. Kanyolekaki ma diaha la edya nshi esambeli lu etena kakasonwama, lu ngondo ka Abiba uku akamakudjangela; ne dia lʼetena kako, kakanyatumbi uma lʼEdjibitu. Untu tenamaki anya atu la ntundu kami.

¹⁶ Kuyalaki la lushi la wuki la dinela diʼoionga wa ulimu aye uma lu diango diayuyuneka lu dikambo. Kuyalaki la lushi la wuki la dinela lʼekumelu kʼeleku lamʼayuyushidiyaka mbotshiya dinela dia ulimu aye wa dikambo lu dihuli diʼeumbelu.

¹⁷ Apami aye tshe kawemalaki tena satu la ntundu ka Khumesu Latuyalaka, lu eleku lʼeleku.

¹⁸ Tulambulaki dikila dia nyama kʼulambu ami kame la ma dieli la edya kuyanga mbetawo wata wa dambu diami ntshikala edja ndu la pindju.

¹⁹ Kelaki olonga wa diango diʼuma lʼekambo lu luudu la Latuyalaka, Unyashungu aye. Tukateki osongo a mbudi lu awele wa nyangu.

Ondjelo wa Latuyalaka Ambutumama dia Nombola Isariyele

²⁰ Enda, dimi lambutuma ondjelo la ntundu kaye, dia ntakulamaka lu mbuka ndu dia nkotola utsha lu dihuli diakamalongosola.

²¹ Kuyalamaki la ntundu kandi, kukitanyiaki diui diandi, tuhendwelaki, ne dia ndi hukudimanyia kolo yaye. Lukumbu lami leko le ndi.

²² Keli naka we ayuhukama diui diandi, la ayutsha tshe kayumukutela, dimi layuyala utunyi wʼatunyi aye, la umpetshi a wane watukuhetshaka.

²³ Lamʼatakendakenda ondjelo ami la ntundu kaye, ndu lamʼatandakolombola lʼatei wʼasi Amora, asi Hiti, asi Perizi, asi Kanana, asi Hiwi ndu asi Jebuse, dimi layuwashila ushiki.

²⁴ Tukhuselaki ditemolatemola diawo adui, tuditemolaki. Tukuyaki wedja ene lu ditshelu diawo. Keli kulanya, ndu katshatsha pingu yawo.

²⁵ Kanyukambelaki Latuyalaka, Unyashungu anyu, ulimu, ku dimi layotshokolaka ma dianyu la ashi anyu. Dimi layunya elandu uma lʼatei anyu.

²⁶ Nduku umuntu, kana nyama kayutumba diemi, kana ntshikala ekumba lu kete yanyu tshe. Dimi layukutsha efula ka nshi yanyu.

²⁷ Dimi layutuma sasi diami la ntundu kanyu, layufutanya wedja tshe wayunyukuma. Layunyenya ekongo wʼatunyi anyu tshe.

²⁸ Dimi layutuma ahuma a waki la ntundu kanyu, dia vo mbitshanya asi Hiwi, asi Kanana ndu asi Hiti uma la ntundu kanyu.

²⁹ Dimi haluwatshanya la ntundu kanyu lʼeleku otoi, ne dia kete yatukuyala hwe; nyama ya lʼukunda yatukufulanela, ku yo nyolosha.

³⁰ Dimi layutawatshanyaka yema, yema, uma la ntundu kanyu edja ndu lamʼayunyufulanela, ku nyu nkita kete.

³¹ Layushikike elelu anyu uma lʼUduwa a Tilili pulu ndu lʼuduwa wʼasi Filistiya, ndu uma lʼusui wa shenga edja ndu lu ndjali kʼEyufarate. Dimi layukimo akanga a kete lʼanya anyu, ku nyu nyayuwatshanya uma la ntundu kanyu.

³² Tanyudjaki la wo sheki, kuyanga la ditemolatemola diawo.

³³ Vo tawudjaseki lu kete yanyu, ne dia vo watukunyolombola dia nyu ntshelami kolo. Naka nyu nyayotemola ditemolatemola diawo, mete dikambu so diayuyala djunga la ntundu kanyu.