Etumbelu 21 - La Bible en Otetela (Bible K'Ekila) 1991

Elembe Dikambu dia Fumbi

¹ Elembe ene mbayuyukumia la ntundu kawo.

² Lamʼasumbaye fumbi kʼusi Heberu, ndi ayukukambelaka ulimu deku samalu. Ku lʼeleku kʼesambeli, ndi ayutshungo, ayuyala la ndjadjasela, aha nkufuta nduku engo.

³ Naka ndi akayi ndame, ndi ayutshungo ndame. Keli naka ndi aki la wadi, wadendi ayutshungo kame la ndi.

⁴ Naka khumendi ambuwusha wadi, la ndi ambuta la ndi ana apami kana ana amantu, wadi la anʼandi wayuyala wa khumendi, ku pami ayutshungo ndame.

⁵ Keli naka fumbi ambuta ati: Dimi mbukaka khumemi la wademi ndu anʼami ngandji, dimi haletawo ntshungo dia ndjala la ndjadjasela,

⁶ ku khumendi ayuwela la ntundu ka Unyashungu, ayusukanya la suku kana lasuki la ekoho, ayutundula wushu lu tui diandi la wuulu, ku ndi ayukambelaka ulimu pundju.

⁷ Lamʼasundja pami kemotshi onʼandi a umuntu uku fumbi, ona ako heyi ntshungo uku atutshungoka fumbi yʼapami.

⁸ Naka ndi hangenyangenya khumendi, lakasanguya mbosa wadi, ku khumendi ayetawo ndi ntshungwama. Ndi kema la wulu wa mbusundja le asi wedja, ne dia ndi akukesi.

⁹ Keli naka ndi ambutshukamia le onʼandi a pami, ndi kutshelaki uku atuwutshelaka ona umuntu.

¹⁰ Naka ndi ambutshuka umuntu ukina, ndi takitshikitshiyaki wadendi la ntundu ma, ahondo, kana akambu wʼasa wadi la umi.

¹¹ Naka ndi hutshela akambu aso asatu, umuntu ako mbeyaka ntshungo anyanya, aha nfuta nduku engo.

Elembe lu Akambu wa Ntshanela Kolo

¹² One lakomola untu, ku untu ako mvo, ayudiakema.

¹³ Keli naka ndi hasangusha mbudika, keli Unyashungu ambukimo lʼanya andi, dimi layukenya dihuli diukukindi ndawo utsha leko.

¹⁴ Keli naka untu ambutsha lukesu dia ndjaka unyandi la ukunda, kuwunyiya kuyanga uma lʼediakelu kami, dia mbudiaka.

¹⁵ One lakomola shi kana nyangu, ayudiakema.

¹⁶ One lava untu, ayudiakema, kuyanga ndi ambushila nsundja one lakandavi kuyanga eki lʼanya andi.

¹⁷ One ladja shi kana nyangu mananu, ayudiakema.

¹⁸ Lamʼasana antu, ku omotshi ambokomola unyandi dive kana ekhukhu, ndi hasuyama naka untu ako havwi, paka mbetama baka lu tangi.

¹⁹ Ndi hasuyama naka untu ambutatela nkalangana, ambokendakenda lʼutamba. Keli dieli la ndi dia mbufuta nshi yakindi kunkamba ulimu, la memba wutshu andi edja ndu ndi ambokono.

²⁰ Lamʼakomola untu fumbi kandi ka pami kana ka umuntu la danga, ku fumbi kako mvo kamʼendi lu mbokomola, ndi ayusuyama.

²¹ Keli naka fumbi ayutshikala la lumu lushi otoi kana nshi hyendi, khumendi hasuyama, ne dia fumbi kako keko ukundji andi.

²² Lamʼasana antu, naka omotshi ambusakanya kanga diemi, ndi ayuyala la unungu. Naka diemi diambutumba, ku umuntu ndame hukadi wali, ndi ayufuta uku ayuwudjela kanga wadi, ndu uku ayuhimbwela embadi.

²³ Keli naka umuntu ambukala wali, ku we nsomboya lumu lu lumu,

²⁴ su lu su, nu lu nu, lunya lu lunya, dikaka lu dikaka,

²⁵ etshumbelu lu etshumbelu, puta lu puta, ndu wimbo lu wimbo.

Elembe lʼAsa Antu la Fumbi Yawo

²⁶ Lamʼakomola untu fumbi kandi ka pami kana ka umuntu lu su, ku su diako mbule, ndi kutshunguli lu dikambu dia su diandi.

²⁷ Lamʼakomolandi fumbi kandi ka pami kana ka umuntu lu nu, ku nu diako mungo, ndi kutshunguli lu dikambu dia nu diandi.

²⁸ Lamʼaka ngombe pami kana umuntu seki, ku untu ako mvo, kawukidiaki lʼave, tawolekaki unatshi ato. Ku kanga ngombe hayala la unungu.

²⁹ Keli naka ngombe keli la etshelu ka ndo la antu, ambudiaka pami kana umuntu, kawukidiaki lʼave. Ntu naka wakatelaka kanga ngombe dia etshelu kato, keli ndi kunkilama ololo, kawudiaki ndu ndi.

³⁰ Keli naka vo wambetawo ndi nfuta mata lu dihuli dia ndi mvo, ndi kafuti etshungwelu ka lumu landi uku ayuwuhimbwela.

³¹ Naka ngombe ambuka ona pami kana ona umuntu a untu omotshi seki, ku nyu ndjela elembe ako.

³² Keli naka ngombe ambuka fumbi ka pami kana ka umuntu seki, kanga to kafuti kanga fumbi toshekele akumi asatu ta fesa. Kawudiaki ngombe kako lʼave.

³³ Lamʼatambela ngombe kana punda lu difuku diakafula untu, kana diakandatshimi, keli ndi kudife,

³⁴ ndi ayufuta ushinga a nyama kuvwi le kanga to. Ku nyama kuvwi kayuyala kandi.

³⁵ Lamʼaka ngombe ka untu omotshi ngombe ka untu ukina seki, ku to mvo, kawusundja ngombe kʼosenyu, kawukahani ushinga ato, kawukahani ndu udu a nyama kuvwi.

³⁶ Lamʼeya antu vati: Ngombe kene la etshelu ka mbikana seki, keli kanga to hakilami ololo, ndi kafuti ngombe lu ngombe. Ku kene kuvwi, kayuyala kandi.