Etumbelu 20 - La Bible en Otetela (Bible K'Ekila) 1991

Elembe Dikumi (Euh. 5:1-21)

¹ Unyashungu akati aui ane tshe ati:

² Dimi keli Latuyalaka, Unyashungu aye, lakakutundja uma lu kete ya Edjibitu, uma lu luudu la lohombo.

³ Tuyalaki la ditemolatemola la ntundu kami.

⁴ Tuyaselelaki nduku ekishi, kuyanga efanelu kʼengo kemotshi keli lʼulungu, kana keli la kete, kana keli lʼashi.

⁵ Tudikhuselaki adui kuyanga ditemola, ne dia dimi Latuyalaka, Unyashungu aye, leko Unyashungu wa kandjema, latosomboyaka kolo ka washi le anʼawo, edja ndu lolonga la satu ndu la nei, ya waku watumpetshaka.

⁶ Keli dimi latenyaka wane watumbukaka ngandji ndu watulamaka elembe ami ngandji ka shikaa, edja ndu nonga nunu la nunu.

⁷ Tudimulaki lukumbu la Latuyalaka, Unyashungu aye, udimuladimula, ne dia Latuyalaka huyindja one latudimulaka lukumbu landi udimuladimula.

⁸ Uhoki lushi la mumuya, ulukili.

⁹ Utshaki elimu nshi shamalu, kutshaki ulimu aye tshe.

¹⁰ Keli lushi lʼesambeli, eli lushi la mumuya ka Latuyalaka, Unyashungu aye. Tutshaki ulimu lushi lako, we, onʼaye la pami kana la umuntu, ukambi aye a pami kana a umuntu, elungalunga kaye, kuyanga ongendangenda wudjashi lu luudu laye.

¹¹ Ne dia Latuyalaka akatungi ulungu la kete la ashi ndu diango tshe dieli loko nshi shamalu, ku ndi akumuya lushi lʼesambeli. Diako mbakatshokola Latuyalaka lushi la mumuya, mbakandalukidia.

¹² Olemiaki sho la nyo, dia nshi yaye, yambukusha Latuyalaka, Unyashungu aye, ndjala efula la kete.

¹³ Tudiakaki.

¹⁴ Tunanaki luseka.

¹⁵ Tuvaki.

¹⁶ Tumamanyiaki unyaye unungu.

¹⁷ Tokomiyaki luudu la unyaye. Tokomiyaki wadi a unyaye, kuyanga usi ulimu andi la pami kana la umuntu, kuyanga ngombe kandi kana punda kandi, kuyanga engo kekina ka unyaye.

Antu Wambuka Woma (Euh. 5:22-33)

¹⁸ Lamʼakuki antu tshe akhungula la lundju la dimama, ndu lamʼakawenyi angadimu la ukungu watumba dinga, vo wakasaki kumba, wakatemala tshalula.

¹⁹ Vo wakatela Mose vati: We oteketaki la su, ku shu tayukaka. Keli Unyashungu tateketaki la su, tutukuvo.

²⁰ Ku Mose akakaluya diui ati: Tanyukaki woma; ne dia Unyashungu ambuhulo dia ndjunyedika, ndu dia woma andi menama lu ashu anyu, diaha nyu ntsha kolo.

²¹ Antu wakemala tshalula, keli Mose akasukana lasuki la dingi dia hito, lene aki Unyashungu.

²² Latuyalaka akatela Mose ati: Uteli asi Isanyele wati: Nyu nyame nyakenyi uku akamateketaka la nyu uma lʼulungu.

²³ Tanyuyatshelaki ditemolatemola dia fesa, dia dio ndjala kame la mi, kuyanga ndjatshela ditemolatemola dia paunyi.

²⁴ Kuntsheli ediakelu ka kete. Kunambulaki elambu aye wa lutshumba, elambu aye wa ki, ekoko aye la ngombe yaye ladiku diato. Lu ahuli tshe, lene ayumukuhulaka lukumbu lami, dimi layuyakaka le ye, ndu layukotshokolaka.

²⁵ Naka we ayuntshela ediakelu kʼave, tukihikaki lʼave wa losela, ne dia kamʼediaye ehumo dia nsela dive, ku we ambudiete anyanya.

²⁶ Tudelaki lu bandelu utsha lʼediakelu kami, ne dia utakataka aye atukenama.