Etumbelu 2 - La Bible en Otetela (Bible K'Ekila) 1991

Eutweiu ka Mose

¹ Pami kemotshi ka lu khumbu ka Lewi akatshuki ona Lewi wadi.

² Ku umuntu ako akatshu diemi, akuti ona pami. Lamʼakandenyi ati: Onʼone dimena, ndi akawushe ngondo shatu.

³ Lamʼaki nyangu kumbeya mbushe ntu, ndi akutshela kisaka ka kombe, akakikiti elungu la tsho. Ndi akawudji loko, akatukikitsha lʼatei wʼongombe, lʼumamu a ndjali.

⁴ Kadiyendi akemala tshalula dia menda dikambu diayuyala le ndi.

⁵ Ona Farayo a umuntu akahulo dia ntoka lu ndjali. Ku ekambi andi wʼamantu wakatasimbulaka ekulu lʼumamu a ndjali. Ona Farayo akenyi kisaka lʼatei wʼongombe, ku ndi akatumi ukambi andi omotshi la ntukiosa.

⁶ Lamʼakandafula kisaka, ndi akenyi ona; ku ona ambulela. Ku ndi akawuki ketshi, akati ati: Ona asi Heberu omotshi one.

⁷ Ku kadiyendi akambula ona Farayo ati: Ntshu keli ntuketeli umuntu omotshi lʼatei wʼasi Heberu, dia ndjukolomiyaka ona?

⁸ Ku ona Farayo akawutela ati: Tshoka. Osoku ona umuntu akateta nyangu ona.

⁹ Ku ona Farayo akawutela ati: Utshu la onʼone, utonomiyakendi, keli kankufutaki. Ku umuntu akose ona, akolomiaka.

¹⁰ Ona akuli, ku nyangu akotole le ona Farayo a umuntu, ku ndi akatuyala onʼandi. Ona Farayo akawole lukumbu ati: Mose (kitshimudi ati: Mbosa uma lʼashi); ne dia ndi akati ati: Uma lʼashi mbakamawose.

Mose Ambulawo uma lʼEdjibitu

¹¹ Lamʼakuli Mose, ndi akatshu lushi lomotshi le anangu, akatenda elimu a wulu wakawatshaka. Ndi akenyi usi Edjibitu akomola usi Heberu omotshi, usikandi.

¹² Mose akewewa, keli ndi komena nduku untu. Ku ndi akadiaki usi Edjibitu, akawushe lu ditshu.

¹³ Lamʼakandatumbi la wedi a pindju, enyi ku asi Heberu ahendi ane walo ta. Ku ndi akambula one laki la munga ati: Ukundi akomolaye unyaye na?

¹⁴ Ku pami kako akûkaluya diui ati: Akakete uwandji la usambudi asu na? We nangaka ndjakami uku akayadiaki usi Edjibitu? Ku Mose akuki woma; akakani ati: Mete mete, dikambu ne diambeyama.

¹⁵ Lamʼakuki Farayo dikambu diako, ndi akayangi Mose dia mbudiaka.

¹⁶ Keli Mose akalawo Farayo, akatudjase lu kete ya Midiyana; ndi akatumuya lasuki lʼeteko kemotshi. Olombedi wa la Midiyana aki la ana amantu esambeli. Vo wakayi la ndjuduwula ashi, wakaludia ashi too lu teti dia nosha dungalunga dia shewo.

¹⁷ Elami wʼekoko wakayi, wakayuwatshanya. Keli Mose akunela, akakimanyia, akanosha dungalunga diawo.

¹⁸ Lamʼakawakalula le shewo Ruele, ndi akambula ati: Ukundi ambunyukalula esadi elo okone na?

¹⁹ Vo wakûkaluya diui vati: Usi Edjibitu omotshi kakatushimbedi uma lʼanya wʼalami wʼekoko. Dikambu dikina, ndi akatuduwedi ashi, akanoshisha dungalunga diasu.

²⁰ Ku ndi akambula anʼandi ati: Lendʼendi na? Ukundi akanyatshiki pami keso? Nyutuweti, keli ayuli ma.

²¹ Ku Mose akangenangena dia mbidjase laka Ruele. Ku ndi akasha Mose Zipora, onʼandi, wadi.

²² Ndi akuti la ndi ona pami; akawole lukumbu ati: Ngereshoma (kitshimudi ati: Ongendangenda); ne dia ndi akati ati: Dimi lakayala ongendangenda lu kete ya kana.

²³ Lamʼaketi nshi efula, khumʼekanga kʼEdjibitu akavu. Asi Isariyele wakakhumaka la tshina dia lohombo lawo, wakalelaka dia ntana ekimanyelu. Ku alelu awo wa la tshina dia lohombo wakakumi pulu le Unyashungu.

²⁴ Lamʼakuki Unyashungu akhumu awo, Unyashungu akuho daka diakandalaki Abarahama, Isaka, la Jakoba.

²⁵ Unyashungu akenyi asi Isariyele, Unyashungu akeyi uhumba awo.