Etumbelu 15 - La Bible en Otetela (Bible K'Ekila) 1991

Usambu wa Mose la Miriyama

¹ Ku Mose la asi Isariyele wakimbela Latuyalaka usambu one, vati: Layimbela Latuyalaka usambu one, ne dia ndi ambolembia la lutumbu. Ndi akaditsha falasa ndu ambahami ato lʼuduwa.

² Latuyalaka keli wulu ami ndu usambuami. Ndi kakayala panda kami. Ndi keli Unyashungu ami, dimi layutumbuiaka. Ndi keli Unyashungu a papa, dimi layuwandulaka. Unyashungu a papa, dimi layutumbulaka.

³ Latuyalaka eli ondoshi wa ta. Latuyalaka keli lukumbu landi.

⁴ Ndi akaditsha pusupusu ya Farayo la ului andi wʼalimbi lʼuduwa. Elombodi andi wʼalimbi wakaditi lʼUduwa a Tilili.

⁵ Asukhu wakakhukhume. Vo wakaditi lu dingunda uku dive.

⁶ Latuyalaka li, lunya laye la pami leko la wulu wa mamba! Latuyaiaka li, lunya laye la pami mpandjulaka atunyi!

⁷ Uma lu wuki wa lutumbu laye, Mbatuyambaka wane watukehetshaka. We ntumaka ududu aye, Ku vo mbatshumbaka uku adiyu.

⁸ Lu efufelu ka luwi lʼuma lʼehembe aye, ashi wakamotshama, Asukhu wakemala lukingi uku eheli. Ashi wa dingunda wakakami lʼatei wʼuduwa.

⁹ Utunyi akati ati: Mbayeli, layutuwanda. Dimi layukahanya diango dia dimbu. Somboya kami kayukuka le wo. Layosomola yombo, ku lunya lami layadiaka.

¹⁰ We akapepia lopepe la luwi laye, Ku uduwa wakakhukhume. Vo wakaditi uku luwulu lu ashi a wulu.

¹¹ Latuyalaka li, lʼatei a ditemolatemola, kakona kedimi la ye? Akona edimi la ye, lu lutumbu lʼekila? Akona eli woma uku we, lu etsha wa lutumbu, lu ntsha akambu wa mamba?

¹² We akasimbula lunya laye la pami, Ku kete yakamene.

¹³ We akalombola wudja one, wakayatshungula, la ngandji ka shikaa. We akalombola la wulu aye utsha lʼedjaselu kaye kʼekila.

¹⁴ Wedja wambuka lukumu lone, wambudidima. Okei wa mamba wambuyala le wane wudjashi la Filistiya.

¹⁵ Ewandji wa Edome wambukasana. Elombodi wʼasi Moaba wambundama la woma. Wane tshe wudjashi la Kanana wambusuwo.

¹⁶ Sasi la woma wambuwanda; Ne dia wuki wa lunya laye, vo wambuyala nyumi uku dive, Edja ndu wudja aye wambeta, We, Latuyalaka, edja ndu wudja aye wakayakundji wambeta.

¹⁷ We ayalombola pulu, ayutashikike ladiku diʼukungu wakayasonwela, Lu dihuli diakayatshi edjaselu kaye, we Latuyalaka! Lu etemwelo kakayabiki la anya aye, we Latuyalaka!

¹⁸ Latuyalaka ayulelaka pundju, pundju.

¹⁹ Lamʼakoto falasa ya Farayo, pusupusu yandi la ambahemi andi wa falasa lʼuduwa, Latuyalaka akakaluya ashi wʼuduwa la diku diawo. Keli asi Isariyeie wakatakendakendaka lu lokongo la wumu lʼatei wʼuduwa.

²⁰ Miriyama, umvutshi a umuntu, kadiya Arona, akakimela losese lu lunya landi. Ku amantu tshe wakuyeli la sese watano wenye.

²¹ Miriyama akakaluya Isariyele diui ati: Nyimbeli Latuyalaka usambu, ne dia ndi akalembia la lutumbu. Ndi akaditsha falasa la umbahemi ato lʼuduwa.

Ashi wʼUlulu wa Mara

²² Ku Mose akalombola Isariyele uma lʼUduwa a Tilili. Vo wakatshu utsha lʼusui wa shenga wa Shura; wakakendakenda nshi shatu lʼusui ako, ku vo kuntana ashi.

²³ Lamʼakawakumi la Mara, vo kumbeya no ashi wa la Mara, ne dia ashi ako waki ululu. Diako mbakawole dihuli diako vati: Mara (kitshimudi ati: Ululu).

²⁴ Ku antu wakangunangunela Mose vati: Kayutono na?

²⁵ Mose akaleli le Latuyalaka, ku Latuyalaka akawenya utamba omotshi. Mose akawukandja lu ashi, ku ashi wakayala ololo. Lu dihuli diako, Latuyalaka akasha antu elembe la adjangu; leko kakandawaedika.

²⁶ Ndi akawatela ati: Naka nyu nyayulungaka diui dia Latuyalaka, Unyashungu anyu, naka nyayutshaka akambu wʼololo lu ashu andi, naka nyayuhukeka atui lu elembe andi, ndu naka nyayukitanyiaka adjangu andi, dimi halunyutumela asui wakamatumela asi Edjibitu; ne dia dimi keli Latuyalaka, latunyokonoyaka.

²⁷ Ku vo wakakumi la Elime, lene aki teko dikumi la pendi diʼashi la atuku akumi esambeli. Ku vo wakahangi leko lasuki lʼashi.