Etumbelu 14 - La Bible en Otetela (Bible K'Ekila) 1991

Asi Isariyele Wambuteho Uduwa a Tilili

¹ Ku Latuyalaka akatela Mose ati:

² Uteli asi Isariyele wakadimo dia ntukutuhanga lu welelo wa Pi-Hahirote, lʼasa Mingidole lʼuduwa. Vo watukudjase lu welelo wa Bala-Zefona, lʼumamu wʼuduwa.

³ Ku Farayo ayuta diʼasi Isariyele ati: Vo wambukhungakhunga lu kete; usui wa shenga wambadinga.

⁴ Dimi layukikitsha utema a Farayo; ndi ayayela. Dimi layukundja lutumbu lu dikambu dia Farayo la ului andi tshe wʼalimbi. Ku asi Edjibitu wayeya vati: Dimi keli Latuyalaka. Ku vo wakatshi osoku.

⁵ Lamʼakawatutela khumʼekanga ka Edjibitu vati: Wudja one wambulawo, ku tukanyi ta Farayo la ekambi andi takakadimo le asi Isariyele; wakambwana vati: Okoko wana wakatetawo dia asi Isariyele ntsho, ku vo mumo lu ntukambelaka?

⁶ Ku ndi akalongosola pusupusu kandi, akatshu, ndi la ului andi wʼalimbi.

⁷ Ndi akatshu la pusupusu kama shamalu yuleki ololo, ndu la pusupusu tshe yʼasi Edjibitu, kame la alimbi la elombodi awo.

⁸ Latuyalaka akakikitsha utema a Farayo, khumʼekanga ka Edjibitu, ku ndi akayeli asi Isariyele, ne dia asi Isariyele wakatumbi uku la osemo.

⁹ Asi Edjibitu, falasa tshe la pusupusu, ambahemi andi wa falasa, ului andi wʼalimbi, wakayelana la wo, ku wakatuwanda wuhangi lʼumamu wʼuduwa, lasuki la Pi-Hahirote, lu welelo wa Bala-Zefona.

¹⁰ Lamʼakasukana Farayo, asi Isariyele wakedia ashu, wenyi ku asi Edjibitu ane wayayeli lʼokongo. Asi Isariyele wakadidima la woma, wakaleli le Latuyalaka.

¹¹ Vo wakambula Mose vati: Paka ne dia waumbu kema lʼEdjibitu, mbakayatela dia shu ndjuvo lʼusui one wa shenga? Ngandi akayatutshela okone, dia we ntutundja uma lʼEdjibitu?

¹² Aha dikambu ne mbakatakutela lʼEdjibitu shati: Utete, tukambeli asi Edjibitu? Akaleki ololo shu nkambela asi Edjibitu, uleki shu ndjuvo lu usui one wa shenga!

¹³ Mose akakaluya wudja diui ati: Tanyukaki woma. Nyutshikali ki lane, nyendi panda ka Latuyalaka kayangandi nyutshela elo. Ne dia asi Edjibitu aku wenanyu elo, hanyuwaena ntu pundju.

¹⁴ Latuyalaka ayunyolwela ta, keli dieli la nyu, ku dia ntshikala ki.

¹⁵ Latuyalaka akambula Mose ati: Okoko wana wandelelanyu? Uteli asi Isariyele watshu utsha la ntundu.

¹⁶ Edia danga diaye, usimbuli lunya laye ladiku diʼuduwa, uwatanya, diʼasi Isariyele ntenanya uduwa lu lokongo la wumu.

¹⁷ Enda, dimi layukikitsha etema wʼasi Edjibitu, dia vo mbayela loko lʼokongo, ku dimi layukundja lutumbu lu dikambu dia Farayo la ului andi tshe wʼalimbi, ndu dia pusupusu yandi la ambahemi andi wa falasa.

¹⁸ Asi Edjibitu wayeya vati: Dimi keli Latuyalaka lamʼayumukundja lutumbu lu dikambu dia Farayo, dia pusupusu yandi la ambahemi andi wa falasa.

¹⁹ Ku ondjelo wa Unyashungu wakatatshokaka la ntundu kʼasi Isariyele, akamo, akatshu lʼokongo awo. Ndu ekoho ka dingi kaki la ntundu kawo, kakamo, kakayemala lʼokongo awo.

²⁰ To kakayuhakema lʼasa pangu kʼasi Edjibitu la kʼasi Isariyele. Ku akayala dingi la udjima tshududu wedi omotshi, keli wedi ukina, dio diakahetaka usasi lʼutshu. Ku pangu yako hyendi kunsukana lʼutshu tshe.

²¹ Ku Mose akasimbula lunya landi ladiku diʼuduwa. Latuyalaka akakaluya ashi la lopepe la wulu lʼuma lʼehutwelu ka unya utshu tshe, akete uduwa kete ya wumu, ku ashi wakatana.

²² Asi Isariyele wakatenanya uduwa lu kete yʼufumbu. Ku ashi wʼuduwa wakayala uku eheli lu lunya la pami ndu lu lunya la lomoso.

²³ Asi Edjibitu wakatayelaka; falasa tshe ya Farayo, pusupusu yandi la ambahemi andi wa falasa wakoto lʼatei wʼuduwa lʼokongo awo.

²⁴ La kokʼa ntundu, Latuyalaka akendi ului wʼalimbi wʼasi Edjibitu lʼedia lumbi la dja la dingi. Ku ndi akafutanya ului wʼalimbi wʼasi Edjibitu.

²⁵ Ndi akanya etshimbi wa pusupusu yawo, ku vo wakayisukuya paka la wulu. Okone asi Edjibitu wakatanela vati: Tulawo uma la ntundu ka Isariyele, ne dia Latuyalaka eko lu mbalwela ta la su.

²⁶ Ku Latuyalaka akatela Mose ati: Usimbuli lunya laye ladiku dia uduwa keli ashi wakaluli, wakhukhume asi Edjibitu la pusupusu yawo, ndu ambahemi wa falasa.

²⁷ Okone Mose akasimbula lunya landi ladiku dia uduwa, ku la lokese, uduwa wakakalula uku atuwuyalaka. Ku asi Edjibitu wakalawo lʼatei awo, keli Latuyalaka akakosha lʼatei wʼuduwa.

²⁸ Ku ashi wakakalula, wakakhukhume pusupusu, ambahemi wa falasa la alimbi tshe wa Farayo, wakayayelaka asi Isariyele lʼuduwa. Nduku otoi awo lakatshikala.

²⁹ Keli asi Isariyele wakatakendakendaka lu kete yʼufumbu lʼatei wʼuduwa. Ashi wakemala uku eheli lu lunya lawo la pami ndu lu lunya lawo la lomoso.

³⁰ Osoku mbakashimbela Latuyalaka Isariyele uma lʼanya wʼasi Edjibitu. Isariyele wakenyi edu wʼasi Edjibitu lʼumamu wʼuduwa.

³¹ Isariyele wakenyi ulimu a wuki wakatshi Latuyalaka le asi Edjibitu, ku vo wakawuki woma. Vo waketawo Latuyalaka, waketawo ndu ukambi andi Mose.