Etumbelu 12 - La Bible en Otetela (Bible K'Ekila) 1991

Dambu diʼElekanelu

¹ Latuyalaka akatela Mose la Arona lu kete ya Edjibitu ati:

² Ngondo kene kayuyala etatelu ka ngondo le nyu. To kayuyala ngondo ka ntundu lu eleku le nyu.

³ Okone nyuteli ului tshe wʼasi Isariyele nyati: Lushi la dikumi la ngondo kene, pami tshe ka lu khumbu ka washewo, ose osongo wʼokoko ne dia khumbu la khumbu.

⁴ Naka khumbu kemotshi kambuleka tshitshe, kawusangani kame la usukanyi awo, dia nde osongo wʼokoko ako. Okone uma lu yediko yukuki untu lʼuntu nde mbayunyedika efula kʼantu wayole osongo wʼokoko.

⁵ Osongo wʼokoko kawuyali umi wʼeleku otoi, keli tawuyalaki la ekomo. Nyu mbeyaka mbosa osongo wʼokoko kana osongo a mbudi.

⁶ Kanyulamaki edja ndu lushi la dikumi lʼanei la ngondo kene. Ku ului tshe wʼasi Isariyele wayudiaka esongo awo wʼekoko la dikolo.

⁷ Ku vo wayosa etenyi ka dikila diawo, wayudikita lʼeshingiti wedi ako ehendi, ndu la diku dia suku dia luudu layuwole.

⁸ Kawufumbi lufumba; kawuli lʼutshu uku la ma diaha la edya, kame la akatshi wʼululu wa tumbatumba.

⁹ Tanyolekaki uyuyu kuyanga mbukate lukate. Keli kanyufumbi lʼutundu lu dja, ote awo kame la ekulu awo, ndu mbu yʼutema yawo.

¹⁰ Tanyutshikaki nduku yetshi yawo edja ndu la pindju. Yetshi yayutshikala pulu ndu la pindju, kanyuyitshumbi lu dja.

¹¹ Wuhu one mbayunyole: eya lu kendi yanyu, tupapa lʼekulu anyu, ekalimba anyu lu anya anyu. Kanyuli shamanyashamanya. Dambu diʼelekanelu ka Latuyalaka so.

¹² Lʼutshu ako, dimi layeta lu kete ya Edjibitu. Ku layudiaka ana wa nundu tshe wa lu kete ya Edjibitu, wʼantu ndu wa nyama. Layulumbuya ditemolatemola tshe dia Edjibitu; dimi keli Latuyalaka.

¹³ Dikila diayuyala djimbitelu le nyu, ladiku dia mvudu yayunyuyala. Lamʼayumena dikila, dimi layunyulekana. Nduku sui diayuya le nyu, dia nyudiaka lamʼayumulanya kete ya Edjibitu.

¹⁴ Lushi lako, layuyala lushi lʼeuhwelu le nyu, kanyululamaki uku lushi la wuki le Latuyalaka. Kanyuluhoki, ndu nyu ndu tukanula tanyu ta lolonga la lolonga, pundju.

¹⁵ Kanyolekaki ma diaha la edya nshi esambeli. Umaka lushi la ntundu, kanyunya edya uma lu mvudu yanyu. Umaka lushi la ntundu edja ndu lushi lʼesambeli, naka untu ayole ma dieli la edya, untu ako ayunyema uma lu Isariyele.

¹⁶ Kanyuyalaki la lusanganya lʼekila lushi la ntundu, ndu lushi lʼesambeli. Tanyutshaki nduku ulimu lu nshi sho, tshikima ulimu wa nkate ma mbukuki untu ntsha.

¹⁷ Kanyuhoki lushi la wuki la ma diaha la edya, ne dia lushi lako, mbakamatundja elui anyu uma lu kete ya Edjibitu. Okone kanyuhoki lushi lako uku olembe wa pundju lu nonga la nonga.

¹⁸ Umaka dikolo dia lushi la dikumi lʼanei lu ngondo ka ntundu, kanyolekaki ma diaha la edya, edja ndu dikolo dia lushi la akumi ahendi lʼotoi.

¹⁹ Lʼatei a nshi esambeli sho, edya tatanemaki lu mvudu yanyu, ne dia untu tshe layole ma dieli la edya, kana ongendangenda kana ona luta, untu ako ayunyema uma lʼului wa Isariyele.

²⁰ Tanyolekaki engo keli la edya loko. Lu ahuli tshe wayunyutadjaseka, kanyolekaki ma diaha la edya.

²¹ Ku Mose aketi dihangamendi dia Isariyele; akawatela ati: Nyutshu, nyutose esongo wʼekoko uku yediko ya khumbu yanyu, ku nyu ndjaka osongo wʼokoko wʼelekanelu.

²² Nyose kyanda ya shinde, nyuyimbia lu dikila dieli lu donga. Nyomonge ndu la diku dia suku, ndu lʼeshingiti wedi ako ahendi. Untu uma lʼatei anyu tatumbaki uma lu luudu tshikima la pindju.

²³ Latuyalaka ayeta dia nanya Edjibitu. Ku Lamʼayena Latuyalaka dikila ladiku dia suku, ndu lu eshingiti wedi ako ehendi, Latuyalaka ayulekana suku diako. Ndi hetawo undjaki mboto lu mvudu yanyu dia nyudiaka.

²⁴ Kanyuhoki dikambu ne uku olembe wa pundju le nyu ndu le anʼanyu.

²⁵ Kanyuhoki etshelu kene ndu lamʼayunyukuma lu kete yayunyusha Latuyalaka uku daka diandi.

²⁶ Ku lamʼayunyumbula anʼanyu vati: Okoko wana watunyutshaka etshelu kene?

²⁷ Ku nyu mbakaluya diui nyati: Ulambu wʼelekanelu ka Latuyalaka, lakalekana mvudu yʼasi Isariyele lu Edjibitu one. Lamʼakandadiaki asi Edjibitu, ndi akashimbela khumbu yasu. Ku wudja wakakole ete awo, wakatemola.

²⁸ Ku asi Isariyele wakatshu, wakatutsha pupu; uku akadjangela Latuyalaka Mose la Arona mbakawatshi.

Nyoi kʼAna wa Nundu

²⁹ Lʼasa ndeki, Latuyalaka akadiaki ana wa nundu tshe wa lu kete ya Edjibitu, uma le ona enundu a Farayo lakadjashi lu kiti ka diulelu, pulu ndu le ona enundu a fumbi kaki lu shasa. Ndu ana wa nundu tshe wa dungalunga mbakandadiaki.

³⁰ Farayo aketo lʼatei wʼutshu, ndi la ekambi andi, ndu asi Edjibitu tshe. Tukuku tʼalelu takayala wulu lu Edjibitu, ne dia nduku luudu lakiko, laki kundjala la udu omotshi.

³¹ Lʼutshu ako, Farayo aketi Mose la Arona; akawatela ati: Nyuneli, nyu la asi Isariyele, uma lʼatei a wudja ami. Nyutshu, nyutotemole Latuyalaka, uku akanyati.

³² Nyutshu la ekoko anyu ndu la ngombe yanyu uku akanyati, keli nyutantshokodi.

³³ Asi Edjibitu wakatshutshiya asi Isariyele dia vo ntumba esadi uma lu kete yawo. Vo wakati vati: Shu tshe ane wambuvo.

³⁴ Ku asi Isariyele wakatole mbu yawo ya nde, yakawasohanya, ntundu yo yatadi. Vo wakombe kinga ya nsohanya mbu ya nde lu ahondo awo, wakayembe lʼaheka.

³⁵ Asi Isariyele wakatshi uku akawatela Mose. Vo wakalombe asi Edjibitu dengalenga dia fesa, dengalenga dia paunyi ndu ahondo.

³⁶ Latuyalaka akahumuya wudja ako lukulu lʼolo le asi Edjibitu. Okone vo wakawasha diango tshe diakawalombe. Ku vo wakatamanedi asi Edjibitu diango.

Asi Isariyele Wambutumba Uma lʼEdjibitu

³⁷ Efula kʼasi Isariyele wakunela uma la Ramase utsha la Sukota waki apami lasuki la nunu kama shamalu wakatakendakendaka lʼekulu, aha mbala ana.

³⁸ Ului a wuki wʼantu wa wehu la wehu wakatshu kame la wo, ndu la dungalunga efula, nyimba yʼekoko ndu ya ngombe.

³⁹ Vo wakakati ekati waha la edya la diango diako diakawatasohanyisha lʼEdjibitu. Dio tadiaki la edya, ne dia vo wakatshanyema uma lʼEdjibitu esadi, kumbeya ntshimbatshimba kana nongosola pamba ya lokendo.

⁴⁰ Edjaselu kʼasi Isariyele lu Edjibitu kaki deku kama nyei la akumi asatu.

⁴¹ Lushi lakakuki deku kama nyei la akumi asatu, mbakatumbi elui tshe wa wudja wa Latuyalaka uma lu kete ya Edjibitu.

⁴² Kawuhoki utshu ako dia nemia Latuyalaka, ne dia ndi akatundja uma lu kete ya Edjibitu. Asi Isariyele wa lolonga la lolonga wayuhoka utshu ako dia nemia Latuyalaka.

⁴³ Latuyalaka akatela Mose la Arona ati: Didjangu diami dia dambu diʼelekanelu ne: usi wudja ukina tadilekaki.

⁴⁴ Fumbi tshe kakasumbama la falanga mbeyaka dile, naka akawahemia uhekeli.

⁴⁵ Usi wudja ukina, kuyanga umundji wʼulimu, tadilekaki.

⁴⁶ Kanyolekaki dambu ne lu luudu otoi. Tanyutudjaki nduku umunyi uma lu luudu, ndu tanyokolaki nduku weka.

⁴⁷ Ului tshe wa Isariyele kawutshaki dambu ne.

⁴⁸ Naka usi wudja ukina, ludjashi lʼatei anyu, ayulanga nde dambu diʼelekanelu ne le Latuyalaka, dieli la pami tshe ka lu luudu landi mbahema uhekeli, ku ndi nsukana dia ditsha. Laso, ku ndi aya uku onʼa luta a lu wudja anyu. Keli untu lahatahema uhekeli, tadilekaki.

⁴⁹ Olembe ako otoi mbayuyala le onʼa luta ndu le ongendangenda wudjashi lʼatei anyu.

⁵⁰ Asi Isariyele tshe wakatshi pupu; uku akadjangela Latuyalaka Mose la Arona mbakawatshi.

⁵¹ Lushi lako mbakatundja Latuyalaka asi Isariyele uku elui awo uma lu kete ya Edjibitu.