Etumbelu 11 - La Bible en Otetela (Bible K'Ekila) 1991

Ambuwatela dia Nyoi ka Ana wa Nundu

¹ Latuyalaka akatela Mose ati: Sui otoi mbambutshikala dia dimi ntumela Farayo la asi Edjibitu. Lʼokongo diku, ndi ayunyukimo dia nyu ntsho. Lamʼayundunyukimo uma lindu, ndi ayunyutshanya nyu tshe.

² Kakiane, usawuli lʼasi Isariyele dia untu lʼuntu, pami kana umuntu, nomba usukanyi andi dengalenga dia fesa ndu dia paunyi.

³ Latuyalaka akahumuya asi Isariyele lukulu lʼolo le asi Edjibitu. Dikambu dikina, pami kako Mose akalemiama lu kete ya Edjibitu, lu ashu wʼekambi wa Farayo, ndu wʼasi Edjibitu tshe.

⁴ Mose akati ati: Latuyalaka kata ati: Dimi layeta lu kete ya Edjibitu lʼasa ndeki.

⁵ Ku ana wa nundu tshe wa lu kete ya Edjibitu wayuvo, uma le ona lʼenundu la Farayo kudjashi lu kiti ka diulelu pulu ndu le ona enundu a ukambi andi a umuntu latudjaseka lʼokongo a luudu lʼetwelo ka diango, ndu ana wa nundu tshe wa dungalunga.

⁶ Tukuku tʼalelu tayuyala lu kete tshe ya Edjibitu wuhu wahatayala ndu wahayalaki ntu.

⁷ Keli lʼatei asi Isariyele tshe, uma le antu pulu ndu le nyama, dikambu so hadiuyala osoku, kuyanga fo hokendjakendja lulimi lato. Osoku mbayunyeya nyati: Latuyalaka ambutshikitanya Edjibitu la Isariyele.

⁸ Ku ekambi aye ene tshe wayuya le mi, wayuyunkhusamela wata vati: Nyutumbi, we la wudja aye tshe watukuyelaka. Lʼokongo diku, layutumba uma lu kete yanyu. Ku ndi akatumbi la kele ka mamba uma laka Farayo.

⁹ Ku Latuyalaka akatela Mose ati: Farayo hukukela. Uma lu dikambu diako mbayumufudia akambu ami wa mamba lu kete ya Edjibitu.

¹⁰ Mose la Arona wakatshi akambu ane wa mamba tshe la ntundu ka Farayo. Ku Latuyalaka akakikitsha utema wa Farayo. Ndi kunkimo asi Isariyele dia vo ntumba uma lu kete yandi.