Etatelu 7 - La Bible en Otetela (Bible K'Ekila) 1991

Elula

¹ Latuyalaka akatela Noa ati: Oto lu watu a luudu, we la wa lu luudu laye tshe, ne dia lal akenyi ololo lʼatei a lolonga lone.

² Kose waumi esambeli uma lʼatei a wehu wa nyama tshe wa nyama yeli ololo nde. Keli uma lʼatei a wehu tshe yaha ololo nde, kose hyendi hyendi, wadi la umi.

³ Kose ndu waumi esambeli la wadi esambeli uma lʼatei a wehu tshe wa fudu ya lʼulungu, dia nama wuhu la wuhu ladiku dia kete tshe.

⁴ Nshi esambeli tshu mbambutshikala, dia dimi ndosha mvula la kete tanyi akumi anei la etshu akumi anei. Dimi layudiaka diango tshe dieli la lumu, diakamatungi la kete.

⁵ Ku Noa akatshi tshe uku akawutela Latuyalaka.

⁶ Noa aki la deku kama shamalu lamʼakayala elula kʼashi la kete.

⁷ Noa, wadendi, anʼandi la wadi wa anʼandi wakoto lu watu a luudu dia mpanda ashi wʼelula.

⁸ Nyama yeli ololo nde, ndu nyama yaha ololo nde, la fudu, ndu kene tshe katuyakutulaka la kete yakoto lu watu.

⁹ Uma lu wuhu la wuhu mbakayoto hyendi hyendi, wadi la umi lu watu, lasuki la Noa uku akawutela Unyashungu.

¹⁰ Lamʼaketi nshi esambeli, ashi wʼelula wakakukanela la kete.

¹¹ Lʼeleku kakayala Noa la deku kama shamalu, lu lushi la dikumi lʼesambeli lu ngondo ka hendi lʼeleku kako, teko tshe dia ehongo a wuki diakate, ndu adidishi wa lʼulungu wakadiho.

¹² Mvula akalo la kete tanyi akumi anei la etshu akumi anei.

¹³ Lushi lako Noa, wadendi, la anʼandi wʼapami: Sheme, Hama la lafeta, ndu wadi asatu wa anʼandi wakoto lu watu a luudu.

¹⁴ Vo, la nyama tshe uku wehu ayo, la dungalunga uku wehu adio, la dikendakenda tshe diatuyakutulaka la kete uku wehu adio, fudu tshe uku wehu ayo yakoto lu watu.

¹⁵ Diango pendi pendi uma lʼatei a diango tshe dieli la lumu, mbakoto la Noa lu watu.

¹⁶ Dio tshe dieli la lumu, diakoto loko, wadi la umi uku akadjangela Unyashungu Noa. Ku Latuyalaka akayûdihela lukuki.

¹⁷ Elula kakayala nshi akumi anei la kete. Ashi wakakukanela, wakunyia watu. Ku vo wakatatela nteha ladiku diʼashi.

¹⁸ Ashi wakalulanela, wakambela efula ladiku dia kete. Ku watu wakatatehaka ladiku diʼashi.

¹⁹ Ashi wakatatetemalaka ndulanela, ku wakakumbi ekungu wʼetali tshe weli lʼesi a ulungu.

²⁰ Uma lamʼakakumbama ekungu, ashi wakamumbela ntu kubita dikumi la tshanu.

²¹ Dikendakenda tshe diaki la lumu: fudu, dungalunga, nyama ya lʼukunda, la dikendakenda tshe diayakutula la kete, ndu antu tshe wakavu.

²² Engo tshe kakatumbiaka lumu lu ehembe, ndu kaki ladiku dia kete yʼufumbu, kakavu.

²³ Dikendakenda tshe diaki la kete: antu, dungalunga, diango diayakutula, ndu fudu ya lʼulungu, vo tshe wakavu. Tshikima Noa la wane waki kame la ndi lu watu a luudu mbakatshikala la lumu.

²⁴ Ashi wakatshikala la kete nshi lukama la akumi atanu.