Etatelu 46 - La Bible en Otetela (Bible K'Ekila) 1991

Jakoba la Khumbu Kandi lʼEdjibitu

¹ Isariyele akunela la diango diandi tshe, akakumi la Bere-Sheba. Ndi akalambula Unyashungu a Isaka, shi, elambu.

² Unyashungu aketi Isariyele lʼutshu lu do ati: Jakoba! Jakoba! Ku Isariyele aketawo ati: Dimʼone.

³ Ndi akawutela ati: Dimi keli Unyashungu, Unyashungu a sho. Tukaki woma dia mpulo utsha lʼEdjibitu, ne dia layutukete wudja a wuki leko.

⁴ Dimi dime layuhulo kame la ye utsha lʼEdjibitu. Ndu dime layukukaluya uma leko. Josefu kayukudiha ashu lamʼayuyuvo.

⁵ Jakoba akunela uma la Bere-Sheba. Ana apami wa Isariyele wakatole shewo Jakoba la anʼawo wa tshitshe ndu wadiewo lu pusupusu yakatumi Farayo dia ntuwaemba.

⁶ Jakoba la khumbu kandi tshe wakatshu kame la dungalunga diawo ndu ekundji wakawakundja lu kete ya Kanana, wakakumi lʼEdjibitu.

⁷ Anʼandi wʼapami ndu anʼandi wʼamantu ndu ekana andi wʼapami la ekana andi wʼamantu tshe wakayi kame la ndi lʼEdjibitu.

⁸ Kumbu yʼasi Isariyele wakatshu lʼEdjibitu nye: Jakoba la anʼandi wʼapami: Rubena, onʼa Jakoba lʼenundu.

⁹ Ana apami wa Rubena ane: Hanoka, Palu, Hezerona la Karami.

¹⁰ Ana apami wa Simeyona ane: Jemuele, lamina, Ohada, lakina, Zohara, ndu Shaulu, ona pami lakanduti la umuntu usi Kanana.

¹¹ Ana apami wa Lewi ane: Ngereshona, Kohata la Merari.

¹² Ana apami wa Juda ane: Ere, Onana, Shela, Pereze la Zere (keli Ere la Onana wakatavwi lu kete ya Kanana). Ana apami wa Pereze ane: Hezerona la Hamulu.

¹³ Ana apami wa Isakara ane: Tola, Puva, Iyobe la Shimirona.

¹⁴ Ana apami wa Zebuluna ane: Serede, Elona la lalele.

¹⁵ (Aso weli ana apami wakuti Jakoba la Lea la Padana-Arama, kame la Dina onʼandi la umuntu. Anʼandi wʼapami la anʼandi wʼamantu wakatumbi lu suku dia luudu la Lea waki akumi asatu).

¹⁶ Ana apami wa Ngada ane: Zifiyona, Hangi, Shuni, Ezebona, Eri, Arodi ndu Areli.

¹⁷ Ana apami wa Ashere ane: Imina, Ishiva, Ishivi, la Beriya ndu Sera, kadiyewo. Ana apami wa Beriya ane: Hebere, la Malakiyele.

¹⁸ (Aso weli ana apami wakuti Jakoba la Zilipa lakasha Labana onʼandi la umuntu Lea. Vo tshe waki antu dikumi la asamalu).

¹⁹ Ana apami wakuti Ratshele, wadi a Jakoba ane: Josefu la Bendjamina.

²⁰ Josefu akuti la Asenate, onʼa Poti-Fera, olombedi wa One, Manase la Efarima lu kete yʼEdjibitu.

²¹ Ana apami wa Bendjamina ane: Bela, Bekere, Ashibele, Ngera, Namana, Ehi, Roshe, Mupima, Hupima la Areda.

²² (Aso weli ana apami wakuti Ratshele la Jakoba. Vo tshe waki antu dikumi la anei).

²³ Ona pami la Dane one: Hushima.

²⁴ Ana apami wa Nafetali ane: lazele, Nguni, Jezere la Shileme.

²⁵ (Aso weli ana apami wakuti Jakoba la Biliha lakasha Labana onʼandi la umuntu Ratshele. Vo tshe waki antu esambeli).

²⁶ Antu wakatshu la Jakoba lʼEdjibitu wakanduti ndame waki akumi asamalu la asamalu, aha mbala wadi wa anʼandi.

²⁷ Josefu akuti ana apami ahendi lʼEdjibitu. Okone efula kʼantu wa lu luudu la Jakoba wakatshu la ndi lʼEdjibitu, waki akumi esambeli.

Josefu Ambenana la Jakoba

²⁸ Jakoba akatumi Juda la ntundu kandi dia ntutela Josefu dia ndi ntsho utsha la Ngoshena. Ku vo wakakumi lu kete ya Ngoshena.

²⁹ Okone Josefu akalongosola pusupusu kandi, akatshu utsha la Ngoshena la ntuhumana la Isariyele, shi. Lamʼakandawenyi, ndi akukhumbatela lu kingu, akaleli edja ukhumbatedi.

³⁰ Isariyele akatela Josefu ati: Aya dimi mvo, ne dia lambena elundji kaye ntu. We eki la lumu!

³¹ Ku Josefu akatela anangu la wa lu luudu la shi ati: Dimi lambutsho le Farayo dia ntuwutela nti: Analingu la wa lu luudu la papa waki lu kete ya Kanana, wambukuma le mi.

³² Apami ako elami wa dungalunga mbewo. Ulimu awo ku nunga dungalunga. Vo wakayi la dio kame la diango diawo tshe.

³³ Okone lamʼayunyeta Farayo dia nyumbula ati: Ulimu akona watunyutshaka?

³⁴ Kanyukaluya diui nyati: Shu ekambi aye, dungalunga mbatutulungaka umaka nshi yasu ya akenda edja ndu kakiane, ndu shu ndu washesu. Uma lu dikambu so mbayunyudjase lu kete ya Ngoshena, ne dia alami wa dungalunga weko wononyi le asi Edjibitu.