Etatelu 4 - La Bible en Otetela (Bible K'Ekila) 1991

Kena la Abele

¹ Adama akeyana la wadendi Eva. Ku wadendi akatshu diemi, akuti Kena. Ndi akati ati: Dimi lambuta ona pami uma lu ekimanyelu ka Latuyalaka.

² Ku ndi akayuta kushendi Abele. Abele akayala ulami wʼekoko, ku Kena akayala ukambi wʼekambo.

³ Lamʼaketi nshi motshi, Kena akalambula Latuyalaka elua uma lʼekambo.

⁴ Ndu Abele akalambula Latuyalaka nundu diʼana wa nyama a wata uma lu dungalunga diandi. Latuyalaka akangenangenela Abele la ulambu andi

⁵ Keli ndi kongenangenela Kena la ulambu andi. Ku Kena akadanganela la kele.

⁶ Latuyalaka akawumbula ati: Okoko wana wadanganelaye la kele, ndu ukundi ahindjaye elundji na?

⁷ Mete, mete, utunduyala ololo mbutsheye, tshiki elundji kaye kutuyala la ongenongeno. Keli naka we hatshi ololo, keti kolo kakukungela la suku diaye la saki ka nkulela. Keli we ukiuleli.

⁸ Kena akasawula la kushendi Abele. Lʼokongo diku, lamʼakiwo lʼekambo, ndi akamamela Abele, akûdiaki.

⁹ Latuyalaka akambula Kena ati: Lendʼeli onanyo Abele? Ku Kena akûkaluya diui ati: Lendʼeyami na? Ulami wʼonalingu mbemi uka?

¹⁰ Ndi akawumbula ati: Kakayatshi na? Delu dia dikila dia onanyo diambukuma pulu ndu le mi.

¹¹ Kakiane we ayudjama mananu lu kete yakase unyo dia nungula dikila dia onanyo uma lu anya aye.

¹² Lamʼayuyukambaka kete la mune diango, yo hayuleka nkongonyia diango. We ayuyala yekeko, ndu aha la ngelu shikaa la kete.

¹³ Kena akatela Latuyalaka ati: Sui diami diambundeka wulu, wuhu wahameyi mbikike.

¹⁴ Kakiane we ambumbitshanya uma lu kete nye, la dimi layushama etali uma lʼelundji kaye. Layuyala yekeko, ndu aha la ngelu shikaa. Ku untu tshe layomena, ayundjaka.

¹⁵ Latuyalaka akawutela ati: Naka untu ayukudiaka, we Kena, untu ako ayosomboyama tena esambeli dikambu diaye. Okone Latuyalaka akadji Kena djimbitelu dia untu tshe lawena tûdiakaki.

¹⁶ Okone Kena akangana uma la ntundu ka Latuyalaka. Ndi akatudjase lu kete ya Nodo (kitshimudi ati: Kete yʼelawelu) lu leke lʼehutwelu ka unya la Edena.

¹⁷ Kena akeyana la wadendi. Ku wadendi akatshu diemi, akuti ona pami, lukumbu landi Enoke. Lʼokongo diku ndi akati usumba, akole usumba ako ati: Enoke, lukumbu la onʼandi.

¹⁸ Enoke akuti Irada; lrada akuti Mehudjaele; Mehudjaele akuti Metushaele; la Metushaele akuti Lameka.

¹⁹ Lameka akatshuki wadi ahendi. Lukumbu la omotshi Ada, la lukumbu la ukina Zila.

²⁰ Ada akuti Jabala. Jabala ako kakayala lotshetshe la akanga a dungalunga watudjaseka lu mvudu yʼapema.

²¹ Lukumbu la onangu laki Jubala. Ndi akayala lotshetshe la waku tshe wutuhumaka sese la watudaka pungi.

²² Ndu Zila ntu akuti Tubala-Kena, laki umbetsha wʼetshudi wakatshulaka wehu tshe wa ditshulatshula dia ehotela la dia mbulu. Lukumbu la kadiya Tubala-Kena laki Nama.

²³ Lameka akatela wadiendi ati: Ada la Zila li, nyulungi uku watami! Wadi wa Lameka, nyuhukami diui diami! Lakadiaki untu, ne dia ndi akampumuya; Ndu olongo omotshi, ne dia ndi akankomola.

²⁴ Naka Kena ayosombweyama tena esambeli, Mete Lameka akumi esambeli la esambeli.

²⁵ Adama akeyana la wadendi ntu. Ku wadendi akuti ona pami, akawole lukumbu ati: Seta. Ndi akati ati: Unyashungu ambumbisha ona pami ukina lu dihuli dia Abele, lakadiaki Kena.

²⁶ Ku Seta akuti ona pami, akawole lukumbu ati: Enosha. Uma laso kakatatela antu ntemola lukumbu la Latuyalaka.