Etatelu 37 - La Bible en Otetela (Bible K'Ekila) 1991

Josefu Ambusundjama Utsha lʼEdjibitu

¹ Jakoba akadjase lu kete ya Kanana lene akadjashi shi.

² Ane weli tukanula ta Jakoba. Lamʼaki Josefu la deku dikumi la esambeli, ndi akaleshaka dungalunga kame la anangu. Ndi akengolaka kame la ana apami wa Biliha ndu ana apami wa Zilipa, wadi wa shi. Ku Josefu akelaka kumu yawo ya kolo le shi.

³ Isariyele akaleki mbuka Josefu ngandji uleki anʼandi tshe, ne dia ndi akayuwuta lu nshi yandi yʼusumbi. Ndi akotelela ukutu wʼawadi awadi.

⁴ Lamʼakenyi anangu vati: Shesu ambuleka mbuka Josefu ngandji ntuleka shu tshe, vo wakuhetsha. Vo kumbeya nsawula la ndi ntu la memakana.

⁵ Josefu akenyi do. Ndi akadisakwela anangu, ku vo wakatamanya mbuhetsha ndu lu dikambu so.

⁶ Ndi akawatela ati: Nyulungi nyusakweli do diakamenyi.

⁷ Shu takakelekaki dikanda dia nengese lu dikambo, menyi ku ekanda kami kambunela, kambemala too. Ku dikanda dianyu diakakidingi, ku diakakikhusamedi.

⁸ Ku anangu wakûkaluya diui vati: Ya! we kayuyala uwandji asu? We kayutulela uka? Okone anangu wakaleki mbuhetsha ne dia alo andi la aui andi.

⁹ Ndi akenyi do dikina ntu, akadisakwela anangu. Ndi akawatela ati: Dimi lakenyi do dikina ntu, menyi ku unya, ngondo la toto dikumi la otoi wakhusama la ntundu kami.

¹⁰ Ndi akadisakwela shi la anangu. Ku shi akuhangwela ati: Wuhu akona wa do oso wenyiye? Dimi la nyo la ananyo mbayukukhusamela uka?

¹¹ Anangu wakawuki kandjema, keli shi akalamaka aui ako lʼutema.

¹² Anangu Josefu wakatshu la Shekeme la ntulesha dungalunga dia shewo.

¹³ Ku Isariyele akambula Josefu ati: Aha ananyo dungalunga mbaleshawo la Shekeme? Yaka, ndjukutumi le wo; ku ndi ati: Kawo.

¹⁴ Ndi akawutela ati: Tshoka, kutendi kana ananyo la dungalunga weko la wulu. Kuyumvuteli khumu uma le wo. Okone shi akutumi uma lʼukidi a Heberona, ku ndi akakumi la Shekeme.

¹⁵ Pami kemotshi akahumana la ndi ateteta lʼusui; akawumbula ati: Kayangaye na?

¹⁶ Ku Josefu akûkaluya diui ati: Analingu mbatamayangi. Dimi lambukosengasenga nti: Umvuteli lene alesh iwo dungalunga.

¹⁷ Ku pami kako akûkaluya diui ati: Vo wakamo lane. Lakawauki wata vati: Tutshu la Dotina. Ku Josefu akayeli anangu, akatatana la Dotana.

¹⁸ Vo wakawenyi tshalula ntundu ndi atakumi la le wo. Ku vo wakawudjela sheki dia mbudiaka.

¹⁹ Vo wakatanela vati: Nyendi omenyi wʼalo uku ayayi.

²⁰ Nyeso katudiaki, katukadja udu andi lu difuku dimotshi. Katuti shati: Nyama ka ngala kemotshi kakawundji. Keli katendi okone wayuyala alo andi.

²¹ Rubena akuki sheki yawo, akuhandja uma lʼanya awo Ndi akawatela ati: Tatudiakaki ludiaka.

²² Rubena akawatela ati: Tanyutundjaki dikila, nyuwukadja lu difuku ne dieli lʼusui wa shenga. Keli tanyuwaheki lunya. Ndi akati osoku ne dia ndi aki la esangweyu ka mbushimbela uma lʼanya awo, la mbukaluya utsha le shi.

²³ Lamʼakakumi Josefu la le anangu, vo wakûkulula ukutu ako wʼawadi awadi wakandalote.

²⁴ Vo wakawembe, wakatuwudja lu difuku. Difuku diako diaki hwe, ashi kundjala loko.

²⁵ Lʼokongo diku wakayudjase lu nde ma. Wakedia ashu, wenyi ku ului wʼasi Ishamele one wayayi uma la Ngiliyade. Kamelo yawo yakayembaka diango diʼupumu, uku biso diʼushinga a wulu la mura, wateti la dio utsha lʼEdjibitu.

²⁶ Juda akambula anangu ati: Waho akona wayutukundja dia ndjaka onengesu, la mbishe dikila diandi?

²⁷ Nyeso tusundja le asi Ishamele, tatuwaheki lunya, ne dia onengesu kendi, dimba diasu mbendi. Okone anangu wakawukela.

²⁸ Lamʼakatetaka ambetshetshi wʼukanda wʼasi Midiyana, anangu Josefu wakutundja uma lu difuku, wakusundja lʼushinga wa tenyi dia fesa akumi ahendi le asi Ishamele. Ku vo wakatshu la Josefu utsha lʼEdjibitu.

²⁹ Rubena akakalula la difuku, keli ndi kuntana Josefu leko. Okone ndi akatshatsha ahondo andi.

³⁰ Ndi akakalula le anangu, akawatela ati: Ona kema lu difuku ntu. Ku laso, atshami na?

³¹ Ku vo wakadiaki mbudi, wakose ukutu wa Josefu, wakutambiya lu dikila.

³² Ku vo wakose ukutu wa Josefu wʼawadi awadi, wakatole le shewo; wakawutela vati: Shu takatongonyi ukutu one. Uhenda kana wa onʼaye mbewo, kana kema.

³³ Jakoba akulimbitela; akati ati: Ukutu wa onʼami mbewo. Nyama ka ngala akawundji mete. Josefu akoto lʼunyo a nyama.

³⁴ Jakoba akatshatsha ahondo andi, akalote dihondo diʼutanda, akaleli onʼandi.

³⁵ Ku anʼandi wʼapami la anʼandi wʼamantu tshe wakayi la ndjûsamba. Keli ndi akatuni esambelu kawo ata ati: Dimi layutsho lʼudimu a pengandu la delu dia onʼami. Ku ndi akaleli onʼandi wulu.

³⁶ Asi Midiyana wakatusundja Josefu lu Edjibitu le Potifara, olombodi wʼelui wʼalimbi wa Farayo.