Etatelu 35 - La Bible en Otetela (Bible K'Ekila) 1991

Unyashungti Ambotshokola Jakoba la Betele

¹ Unyashungu akatela Jakoba ati: Unela, utshu la Betele, utudjase leko. Kutuntsheli ediakelu, dimi Unyashungu, lakene le ye lamʼakayatalawoka onanyo Esau.

² Jakoba akatela wa lu luudu landi ndu wane tshe waki kame la ndi ati: Nyunya ditemolatemola diʼasi wedja dieli lʼatei anyu, nyuyaedia, nyenguli anondo,

³ keli tuneli utsha la Betele. Kantutsheli Unyashungu, lakuki dombelo diami lushi lakimi la asui ndu laki la mi lu mbuka lamʼakamatatshokaka, ediakelu leko.

⁴ Vo wakakimo ditemolatemola tshe diʼasi wedja diaki la wo, la tushingu taki lu atui awo le Jakoba. Ku ndi akadikhunde la tshina diʼulungu waki lasuki la Shekeme.

⁵ Lʼokongo diku vo wakatshu. Woma a mamba wa Unyashungu wakandi antu tshe waki lʼesumba wa lʼutshimba awo. Ku nduku untu laki la dihunga dia ndjela ana wa Jakoba.

⁶ Okone Jakoba la antu tshe waki la ndi wakakumi la Luza (letawo ntu vati: Betele), lu kete ya Kanana.

⁷ Ndi akatshi ediakelu leko. Ndi akole dihuli diako ati: Ele-Betele (kitshimudi ati: Unyashungu wa Betele), ne dia laawo kakene Unyashungu le ndi lamʼakandatalawoka onangu.

⁸ Debora, yaya ya Rebeka, akavu. Ku vo wakukhunde la Betele la tshina diʼulungu, wakawole vati: Utamba wʼalelu.

⁹ Unyashungu akene ntu le Jakoba lamʼakandayakalulaka uma la Padana-Arama, akotshokola.

¹⁰ Ku ndi akawutela ati: Jakoba keli lukumbu laye. Keli vo hawuyuketa ntu vati: Jakoba, ne dia lukumbu layc laya Isariyele. Okone ndi akawole lukumbu ati: Isariyele.

¹¹ Ndi akawutela ati: Dimi leli Unyashungu Kanga-Wulu-Tshe. Uyali la diwutshi, ufulaneli. Wudja otoi la wedja efula wayuto uma le ye, ku khumi ya dikanga yayutumba uma le ye.

¹² Dimi layukusha, we la tukanula taye, kete yakamasha Abarahama la Isaka.

¹³ Ku Unyashungu akambela uma lu dihuli diakandasawulaka la ndi.

¹⁴ Jakoba akeme dive uku ekoho lu dihuli diako diakandasawulaka la ndi. Ndi akatela iso la wanu ladiku diato.

¹⁵ Ku Jakoba akole dihuli diakandasawulaka la Unyashungu ati: Betele.

Nyoi ka Ratshele

¹⁶ Vo wakakolamela lokendo, uma la Betele utsha la Efarate. Keli lamʼakiwo etali uma la Efarate, Ratshele akatatela ntata lono. Ku lono lakuheki wulu.

¹⁷ Laso, lamʼakayala lono wulu le ndi, umbutshutshi akawutela ati: Tukaki woma, ne dia we uyanga mbuta ona pami ukina.

¹⁸ Keli lamʼakandayangi nkitshiya (ne dia ndi akavu), ndi akole ona lukumbu ati: Bene-Oni (kitshimudi ati: Onʼa sui diami). Keli shi akawole ati: Bendjamina (kitshimudi ati: Onʼa lunya lami la pami).

¹⁹ Ratshele akavu, wakukhunde lu mbuka kʼutsha la Efarate, wetawo vati: Betelehema.

²⁰ Jakoba akeme ekundji kʼave la diumbu diandi. Ekundji kako ka la diumbu dia Ratshele keko edja ndu elo.

²¹ Isariyele akakolamela lu lokendo, akatuhika luudu landi la dipema la wedi a luudu lʼetangelu ka Edere.

²² Lamʼakadjashi Isariyele lu kete sho, Rubena akunana la Biliha, usika wa shi. Ku Isariyele akeyi dikambu diako. Efula ka ana apami wa Jakoba waki dikumi la ahendi.

Ana Apami wa Jakoba

²³ Ana apami wa Lea ane: Rubena (onʼa Jakoba lʼenundu), Simeyona, Lewi, Juda, Isakara, la Zebuluna.

²⁴ Ana apami wa Ratshele ane: Josefu la Bendjamina.

²⁵ Ana apami wa Biliha, ukambi a umuntu wa Ratshele, ane: Dane, la Nafetali.

²⁶ Ana apami wa Zilipa, ukambi a umuntu a Lea, ane: Ngada la Ashere. Aso weli ana apami wa Jakoba wakandatutshi la Padana-Arama.

Nyoi ka Isaka

²⁷ Jakoba akakumi le Isaka, shi, la Mamare ka la Kiriyate-Areba, ketawo vati: Heberona, lene akaladi Abarahama la Isaka.

²⁸ Nshi ya lumu tshe ya Isaka yaki deku lukama la akumi enanei.

²⁹ Isaka akayala usumbi a lukusumbi, akunduya andja, ku ndi akavu, akayeli washi. Ku anʼandi Esau la Jakoba wakukhunde.