Etatelu 30 - La Bible en Otetela (Bible K'Ekila) 1991

¹ Lamʼakenyi Ratshele ati: Dimi latutela Jakoba nduku ona, ndi akuki enundu andi kandjema. Ndi akatela Jakoba ati: Umbisha ana. Naka kema, ku dimi mvo.

² Ku Jakoba akuki Ratshele kele; akawumbula ati: Dimi kaya Unyashungu lakakushimbi mbuta uka?

³ Ku Ratshele akawutela ati: Biliha, ukambi ami a umuntu one. Uwose, ayali uku wadeye, kana ndi ayutaka, kandedia ona. Uma le ndi kayumuyala ndu dimi, la ana.

⁴ Okone ndi akawusha ukambi andi a umuntu uku wadi. Ku Jakoba akeyana la ndi.

⁵ Biliha akatshu diemi, akuti la Jakoba ona pami.

⁶ Ku Ratshele akati ati: Unyashungu akuki diui diami, ambusambula dikambu diami ololo, mbambundumbisha ona pami. Okone ndi akawole lukumbu ati: Dane (kitshimudi ati: Nsambula).

⁷ Biliha, ukambi a umuntu wa Ratshele, akatshu diemi ntu, akuti la Jakoba ona pami.

⁸ Ratshele akati ati: Dimi lakaloshanya la enundu ami, ku lakuleki wulu. Okone ndi akawole lukumbu ati: Nafetali (kitshimudi ati: Ndoshanya).

⁹ Lamʼakenyi Lea ati: Dimi lambutukuyemala, aha mbuta, ndi akose Zilipa, ukambi andi a umuntu, akawusha Jakoba uku wadi.

¹⁰ Ku Zilipa, ukambi a umuntu a Lea, akayuta la Jakoba ona pami.

¹¹ Lea akati ati: Ndi diese li! Okone ndi akawole lukumbu ati: Ngada (kitshimudi ati: Diese).

¹² Ku Zilipa, ukambi a umuntu a Lea, akuti la Jakoba ona pami la hendi.

¹³ Ku Lea akati ati: Ongenongeno wa mamba mbukami, ne dia ana amantu wayumvutaka vati: Kanga ongenongeno kendi. Okone ndi akawole lukumbu ati: Ashere (kitshimudi ati: Ongenongeno).

¹⁴ Lamʼaketetaka Rubena lʼusui lu nshi ya dinela, ndi akatushula asusu, akawaela Lea, nyangu. Ku Ratshele akasengasenga Lea ati: Umbisha asusu amotshi wʼuma le onʼaye.

¹⁵ Ku ndi akûkaluya diui ati: Undi, dikambu diku diakayampotola umemi tshitshe mbedio lu ashu aye, mbalangaye mpotolami ndu asusu wakambela onʼami? Ratshele akati ati: Kawo, Jakoba ketami la ye lʼutshu one, dia nifuta ushinga wa asusu wakakela onʼaye.

¹⁶ Lamʼakakalula Jakoba uma lʼusui la dikolo, Lea akatshu la ntuhumana la ndi. Ndi akawutela ati: Kuyetami la mi, ne dia dimi lakakusumbi la asusu wakambela onʼami. Ku ndi aketama la ndi lʼutshu ako.

¹⁷ Unyashungu akuki dombelo dia Lea. Ku ndi akatshu diemi, akuti la Jakoba ona pami la tanu.

¹⁸ Lea akati ati: Unyashungu ambumbisha difutu diami, ne dia dimi lakakimo ukambi ami a umuntu le umemi. Ku ndi akole ona lukumbu ati: Isakara (kitshimudi ati: Difutu).

¹⁹ Ku Lea akatshu diemi ntu, akuti la Jakoba ona pami la samalu.

²⁰ Lea akati ati: Unyashungu ambumbisha ushasha wʼololo. Kakiane umemi ayudjase la mi, ne dia lambuta la ndi ana apami asamalu. Ku ndi akawole lukumba ati: Zebuluna (kitshimudi ati: Mbidjase).

²¹ Lʼokongo diku ndi akuti ona umuntu; akawole lukumbu ati: Dina.

²² Ku Unyashungu akuho Ratshele. Ndi akuki dombelo diandi, akawete kanga diwutshi.

²³ Ku ndi akatshu diemi, akuti ona pami. Ndi akati ati: Unyashungu ambuminya lu sonyi.

²⁴ Okone ndi akawole lukumbu ati: Josefu (kitshimudi ati: Nkukiya), ata ati: Latuyalaka kankukiya ona pami ukina.

Jakoba la Labana Wambukesana

²⁵ Lamʼakuti Ratshele Josefu, Jakoba akatela Labana ati: Unkimo keli ntshu lakasu, lu kete yasu.

²⁶ Umbisha wadiemi la anʼami wakamakukambela ulimu dikambu diawo, keli ntshu, ne dia we mbeyaka ulimu wakamakukambelaka.

²⁷ Ku Labana akawutela ati: Naka dimi lambuhumo lukulu lʼolo lu ashu aye, utshikali la mi, ne dia dimi lambena nti: Latuyalaka akantshokola lu dikambu diaye.

²⁸ Labana akawutela ati: Umvuteli yediko ya difutu shikaa, keli nkushadio.

²⁹ Jakoba akûkaluya diui ati: Weme mbeyaka uku akamakukambela ulimu ndu uku akayala dungalunga diaye lamʼakamadilamaka.

³⁰ Etenyi ka tshitshe kakamakutani la to kambufulanela, aya efula kaheyama mbala. Latuyalaka akakotshokola lu dihuli tshe diakamakamela. Keli kakiane, etena kakona kayumukambela luudu lami ulimu?

³¹ Ku Labana akawumbula ati: Kalangaye dimi nkusha na? Jakoba akakaluya diui ati: Tumbishaki nduku engo. Keli naka we ayetawo dikambu diayangami nkutela ne, dimi layulamaka, ndu layuleshaka dungalunga diaye ntu.

³² Elo, dimi layukindula lʼatei a dungalunga diaye tshe. Ku dimi layosonola uma lʼatei wʼekoko, ene tshe weli awadi awadi la awungu awungu, ndu ene tshe weli edima tshududu. Ku dimi layosonola uma lʼatei a mbudi, nye yeli awungu awungu la awadi awadi. Sho mbayuyala difutu diami.

³³ Akambu ami wʼusimbwi wayukumanya lumu lami fundu lamʼayuyuya etena kemotshi la ndjenda difutu diami. Naka mbudi kaha awadi awadi la awungu awungu kana okoko waha tshududu wayutanema lu leke lami, keti kanga uvi kemi.

³⁴ Labana akûkaluya diui ati: Kawo! Diayali uku diui diaye.

³⁵ Okone lushi lako Labana akanya weumbi wa mbudi tshe waki eshidi eshidi la awungu awungu, ndu esamalu tshe waki awadi awadi la awungu awungu, ndu nye tshe yaki la awadi a wema. Ndi akanya ndu uma lʼatei wʼekoko ene tshe waki tshududu. Ndi akayikimo tshe lʼanya wa anʼandi.

³⁶ Ku ndi akamamitwana la Jakoba etali uku yediko ya lokendo la nshi shatu. Ku Jakoba akaleshaka limba la dungalunga dia Labana lakatshikala.

³⁷ Jakoba akakote tahi yʼeyuyu yʼusumba, ya dipenge, la ya lokonga. Ndi akayiuwula pusu eshidi eshidi, dia eshidi wa wema wʼutamba menamaka.

³⁸ Ndi akakitsha tahi tshe yakanduwula lu teti yakanokaka dungalunga ashi. Wadi wa dungalunga wakakhukulaka lamʼakawatshokaka la ntono ashi.

³⁹ Ku dungalunga dia wadi diakatshokaka waemi lasuki la tenyi diʼetamba diako. Dio diakutaka ana wʼeshidi eshidi, wʼawadi awadi, ndu wʼawungu awungu.

⁴⁰ Ku Jakoba akatanya ana wʼekoko. Ndi akakitsha tshe wʼeshidi eshidi ndu ene tshe wʼedima dihuli dikina. Ku ndi akediya dundji dia dungalunga dia Labana utsha le wo. Keli ndi akayakitshiya dungalunga diandi amʼakina, ne dia dio diatukosohana la dia Laana.

⁴¹ Tena tshe diakakhukulaka ekoko a wadi waki la wulu, Jakoba akakitshaka tenyi diʼetamba lu teti la ntundu kawo, dia vo ntsho waemi lamʼakiwo lasuki la tenyi diako diʼetamba.

⁴² Keli lamʼakayakaka wadi wa dungalunga diʼetshidu la wodu, ndi kumbidjaka tenyi diʼetamba loko. Okone dungalunga diʼetshidu la wodu diakayalaka le Labana, keli dungalunga dia waki la wulu diakayalaka le Jakoba.

⁴³ Ku Jakoba akatangonanelaka otekoya. Ndi akayala la nyimba ya waki ya dungalunga, ekambi wʼamantu la ekambi wʼapami, kamelo la punda.