Etatelu 27 - La Bible en Otetela (Bible K'Ekila) 1991

Isaka Ambotshokola Jakoba

¹ Lamʼakayala Isaka usumbi, ashu andi wakayala enguli, ndi komena ololo ntu. Lushi lomotshi, ndi aketi Esau, onʼandi lʼenundu, ati: Esau li; ku ndi aketawo ati: Dimʼone.

² Shi akawutela ati: Kakiane laya usumbi. Dimi haleyi lushi lami la nyoi.

³ Dimi lambukosengasenga nti: Osa dihumo diaye, ukulu aye wa pitu la uta, utshu la winga, utunyangeli nyama.

⁴ Kuyunkateli ma dia diendje wuhu watumulangaka, kumbeladio. Kandjuli, keli kantakotshokodi ntundu dimi latavu.

⁵ Rebeka akahukamaka okone akatelaka Isaka onʼandi Esau. Ku Esau akunela utsha la winga la ntuyanga nyama ya mbela.

⁶ Rebeka akayutela onʼandi Jakoba ati: Ulungi, dimi lakuki sho atela onanyo Esau ati:

⁷ Utunyangeli nyama, kuyunkateli ma, keli kantakotshokodi la ntundu ka Latuyalaka lamʼekimi la lumu.

⁸ Onʼami, ulungi, umbukeli lu dikambu diayangami nkutela ne.

⁹ Utshu lu limba la dungalunga, utose esongo ehendi wa mbudi wʼamena, ndjukateli sho ma dia diendje wuhu watundulangaka.

¹⁰ Kotole sho, ndi katakotshokodi la ntundu ndi atavu.

¹¹ Keli Jakoba akakaluya nyangu diui ati: We henyi onalingu Esau eko la diosa dimba tshe, keli dimi kema.

¹² Undu papa ayumambamba, ku dimi layuyala kanga lukesu la ntundu kandi. Okone dimi layuyayangela mananu lu dihuli dia nungula otshoko.

¹³ Ku nyangu akawutela ati: Onʼami, mananu keso kayali lʼote ami. Dikambu otoi, etawo diui diami. Tshoka, utombosele esongo ako wa mbudi.

¹⁴ Ku Jakoba akatunda esongo a mbudi, akawela nyangu. Nyangu akayukate ma dia diendje wuhu wakalangaka Isaka.

¹⁵ Rebeka akose eloto wʼamena waki lu luudu wakalotaka Esau, onʼandi lʼenundu, akelotsha Jakoba, onʼandi la kushi.

¹⁶ Ndi akombe Jakoba dikuhu diʼesongo a mbudi lu anya la lu kingu kaki kundjala la diosa.

¹⁷ Ku Rebeka akasha onʼandi Jakoba ma la unatshi wakandakati.

¹⁸ Ndi akoto le shi, akaweti ati: Papa! Ku shi aketawo ati: Dimʼone; we onʼami akona oso?

¹⁹ Ku Jakoba akûkaluya diui ati: Dimi Esau, onʼaye lʼenundu; lambushidiya ntsha uku akayamvutedi. Eto, usungukali, uli ma la unatshi wakayayangi, keli ontshokole.

²⁰ Ku Isaka akambula onʼandi ati: Hai! onʼami; ndi esadi wambuyutukitana li! Ku Jakoba akûkaluya diui ati: Ne dia Latuyalaka, Unyashungu aye, akampumusha lukulu lʼolo.

²¹ Ku Isaka akatela Jakoba ati: Uhusukana nkamambi, we onʼami, dia dimi mbeya kana mete onʼami Esau keye, kana kema.

²² Jakoba akasukana le Isaka, shi. Ndi akawamamba; akati ati: Diui so dieli dia Jakoba, keli anya mbeli anya wa Esau.

²³ Isaka kumbulimbitela, ne dia anya andi waki diosa tu uku anya wa Esau, onangu. Okone ndi akotshokola.

²⁴ Ndi akawumbula ntu ati: Mete, onʼami Esau keye? Ku Jakoba akûkaluya diui ati: Tuku dime Esau.

²⁵ Isaka akawutela ati: Umbela ma diako, nde unatshi wʼuma lu winga, keli nkotshokole. Jakoba akawela ma, ku ndi akali. Ndi akawela ndu wanu, ku ndi akano.

²⁶ Ku Isaka, shi, akawutela ati: Usukani, uyunkhumbateli lu kingu.

²⁷ Ku Jakoba akasukana, akukhumbatela lu kingu. Isaka akuki enyi kʼeloto andi. Ku ndi akotshokola, ati: Enyi ka onʼami kambufana la enyi ekambo kakatshokola Latuyalaka.

²⁸ Unyashungu akusha lopopo uma lʼulungu la eteto lu kete. Dinela dia mbu ya nde la wanu kadiuyalaki efula.

²⁹ Antu wakukambelaki ulimu, wedja wakukhusamelaki. Mananu kayali le untu tshe layukudja mananu; la otshoko le untu tshe layukotshokolaka.

³⁰ Isaka akashidiya ntshokola Jakoba. Jakoba amo yema uma la le shi, ku Esau, onangu, ambukalula uma la winga.

³¹ Ndu ndi akayukate ma dia diendje, akadiela le shi. Ndi akawutela ati: Papa etoka, uli unatshi wukelami, dimi onʼaye, uma lu winga, keli ontshokole.

³² Ku Isaka, shi, akawumbula ati: Na we na? Ndi akûkaluya diui ati: Dimi Esau, onʼaye lʼenundu.

³³ Ku Isaka akakashimo, akasaki lukumba la yenyi; akawumbula ati: Na untu lakambela nyama kʼuma lu winga? Dimi lakakili tshe ntundu we atayi, ku lakatshokodi untu ako. Ndi ako kaya otshokwami.

³⁴ Lamʼakuki Esau aui wa shi, ndi akadi ekuku, akaleli wulu la okei. Ndi akatela shi ati: Papa, ontshokole ndu dimi.

³⁵ Ku shi akati ati: Onanyo akayi la lukesu, akoshi otshoko aye.

³⁶ Ku Esau akati ati: Aha Jakoba (kitshimudi ati: Ukesanyi) keli lukumbu landi? Ndi ambunkesa tena pendi ne: ndi akamputola ukito ami wa onʼenundu, ku kakiane ndi ambompotola ndu otshoko ami. Ndi akambula shi ati: We kunamemi nduku otshoko ukina?

³⁷ Isaka akûkaluya diui ati: Dimi lakawete khumeye. Dimi lakawusha anangu tshe dia vo ndjala ekambi andi. Lakawusha ndu otshoko wa ndjala la dinela la wanu. Na otshoko wukukimi nkusha we, onʼami?

³⁸ Esau akambula shi ati: We aki paka la otshoko one utu? Papa ontshokole ndu dimi! Esau akadi ekuku, akaleli.

³⁹ Isaka, shi, akawutela ati: Ulungi, edjaselu kaye kayuyala lu kete yaha la eteto ndu yaha la lopopo lʼuma lʼulungu.

⁴⁰ Uma lu wulu wa yombo yaye mbayuyutshikala la lumu. We ayukambelaka onanyo ulimu. Lamʼayuyuhindula, we ayokola lokoho landi uma lu kingu kaye.

Jakoba Ambulawo Esau

⁴¹ Esau akahetsha Jakoba fwe, ne dia otshoko wakotshokola shi. Esau akasanguya lʼutema andi ati: Nyoi ka papa aya suki. Okone lushi layuvo papa, dimi layudiaka onalingu Jakoba.

⁴² Wakatela Rebeka dia esangweyu ka Esau, onʼandi lʼenundu. Ndi aketi Jakoba, onʼandi la kushi; akawutela ati: Ewo, onanyo Esau eko lu nkanela dia nkudiaka.

⁴³ Kakiane onʼami, eiawo diui diami. Uneli, ulawo utsha la Harana le onalingu Labana.

⁴⁴ Utukutudjase le ndi nshi motshi edja ndu udukuduku wa onanyo wambushila.

⁴⁵ Ku lamʼayukitakita kele kandi le ye, ndi ayuhela dikambu diakayutshela. Ku dimi layukutumela diui dia we ndja lindu. Ukundi ukukimi nyishisha nyu ahendi lushi otoi na?

⁴⁶ Rebeka akatela Isaka ati: Dimi la wutshu efula lʼutema ami dikambu dia ana amantu wʼasi Hiti. Naka Jakoba ayutshuka wadi uma lʼatei wa ana amantu wʼasi Hiti weli lu wudja one, na waho wa dimi ntshikala la lumu ntu?