Etatelu 24 - La Bible en Otetela (Bible K'Ekila) 1991

Wambosonwela Isaka Wadi

¹ Abarahama akayala usumbi a lukusumbi. Latuyalaka akatshokola Abarahama lu akambu andi tshe.

² Abarahama aketi olombodi wʼekambi andi, lakalamaka diango diandi tshe. Ndi akawutela ati: Dimi lambukosengasenga nti: Ukitsha lunya laye lʼesi ehelohelo kami,

³ keli nkutshibia le Latuyalaka, Unyashungu a lʼulungu, ndu a la kete, diaha we mbosela onʼami wadi uma lʼatei ana amantu wʼasi Kanana wako wudjashimi lʼatei awo.

⁴ Keli kutshu lu wudja asu, lu kete yakamuto, dia ntosonwela onʼami Isaka wadi leko.

⁵ Ku ukambi andi akûkaluya diui ati: Ku naka umuntu halangi ndja la mi uya lu kete nye, kayumutsha na? Dieli la mi dia ntola onʼaye pulu lu kete yakayuto?

⁶ Ku Abarahama akawutela ati: Ewo, totolaki onʼami leko.

⁷ Latuyalaka, Unyashungu a lʼulungu, lakantundja uma lu luudu la papa ndu uma lu kete yakamuto, akasawula la mi. Ndi akandaki ati: Dimi layusha tukanula taye kete nye. Ndi ndame ayutuma ondjelo andi la ntundu kaye. Ku we ayutosela onʼami wadi uma leko.

⁸ Keli naka umuntu halangi ndja la ye, we ayutshungo uma lu etshibelu kene kamumukutshibia. Dikambu otoi, totolaki onʼami leko.

⁹ Ku ukambi ako akakitsha lunya landi lʼesi ehelohelo ka khumendi Abarahama. Ndi akulaki dia namaka akambu ako.

¹⁰ Ukambi andi akose kamelo dikumi uma lʼatei a limba la khumendi, ne dia diango tshe dia khumendi diaki lu anya andi. Ndi akunela, akatshu utsha la Mesopotamiya pulu ndu lʼusumba wa Nahora.

¹¹ Ndi akakhusamia kamelo lʼandja wʼusumba dia yo mumuya lasuki lʼeteko kʼashi. Etena kako kaki ushidi wa dikolo watutshokaka amantu la ntuduwula ashi.

¹² Ku ndi akati ati: Latuyalaka, Unyashungu a khumemi Abarahama, dimi lambukosengasenga nti: Uki khumemi Abarahama ketshi. Umpumuya lukulu lʼolo, dia dimi mpumana la kene kalangami elo.

¹³ Dimʼone ambemala lʼumamu wʼeteko kʼashi, ku ana amantu wʼasi sumba aso wayayi la ndjuduwula ashi.

¹⁴ Ku usekaseka a umuntu tshe layumolomba nti: Enge mbaka keli no ashi; ku ndi ayunkaluya diui ati: Noka; dimi layusha ndu kamelo yaye ashi a no. Oso kayuyala one lakayasonwela ukambi aye Isaka. Uma lu dikambu so mbayumulimbitela nti: We mbukaka khumemi ketshi.

¹⁵ Kamʼakandateketaka, enyi ku Rebeka one ayayi la mbaka kandi lu diheka. Rebeka akuto le Betuele, onʼa Milika, wadi a Nahora, onangu Abarahama.

¹⁶ Ona umuntu ako aki dimena diahangone, ndu ateyana la pami. Ndi akahulo utsha lʼeteko, akaludia mbaka kandi, akawandi uma lʼeteko.

¹⁷ Ku ukambi wʼAbarahama akalawo utsha le ndi; akalombe ati: Umbisha tema tʼashi uma lu mbaka kaye no.

¹⁸ Ku ndi akûkaluya diui ati: Khumemi, yaka, yono. Ku ndi akahuluya mbaka esadi lu lunya dia mbusha ashi wa no.

¹⁹ Lamʼakashili Rebeka mbusha ashi, ndi akati ati: Dimi layuduwela ndu kamelo yaye ashi edja ndu yo yambunduya pusa.

²⁰ Ndi akasamanya, akangula ashi lu luteti, akalawo ntu utsha lʼeteko la ntuduwula ashi wa nosha kameio yandi tshe.

²¹ Ukambi ako akawendaka amba, aha diui baku, dia mbeya kana Latuyalaka ambuhumuya lukulu lʼolo, kana kema.

²² Lamʼakashili kamelo no ashi, ukambi wʼAbarahama akatundja lohete la etenyi otoi ka hendi ka shekele ya paunyi, ekoma ehendi wʼanya la shekele dikumi ya paunyi.

²³ Ndi akawumbula ati: Onʼa na eye? Kema dihuli dia shu mbetama lu luudu la sho?

²⁴ Ndi akûkaluya diui ati: Dimi onʼa Betuele, lakuto le Milika la Nahora.

²⁵ Ndi akawutela ntu ati: Adiyu efula weko lakasu wa dungalunga nde la mbetama, ndu dihuli dia nyu mbetama dieko.

²⁶ Pami kako akakolama, akatemola Latuyalaka.

²⁷ Ndi akati ati: Unyashungu a khumemi Abarahama atumbwami! Ndi ataheko menya khumemi ketshi la kolamelu. Latuyalaka akanombola, ndu dime, lu mbuka pulu lu luudu lʼanangu khumemi.

²⁸ Usekaseka ako akalawo esadi, akatusanyia wa lu luudu la nyangu akambu ako.

²⁹ Rebeka aki la onangu la pami, lukumbu landi Labana. Ku Labana akatumbi la luwangu la ntulungula pami kako kaki lasuki lʼeteko.

³⁰ Lamʼakenyi onangu lohete la ekoma lu anya wa kadiyendi, ndu lamʼakanduki aui wa kadiyendi Rebeka ati: Osoku mbakandamvutedi, ndi akakumi le pami kako. Ndi akutani emadi lasuki lʼeteko la le kamelo yandi.

³¹ Ndi akawutela ati: Uyi, we otshokwami wa Latuyalaka. Ukundi wemalaye lʼandja na? Dimi lakakolongoswedi luudu ndu ukutu wa kamelo yaye.

³² Vo wakakumi la luudu. Ku Labana akakelekula diango diaki ladiku dia kamelo; akasha kamelo adiyu wa yo nde ndu wa yo mbetama. Ndi akela ukambi wʼAbarahama la antu wakayi la ndi ashi wa vo nsula ekulu.

³³ Wakawela ma. Keli ndi akati ati: Dimi hali la ntundu latati dikambu diakamayi. Labana akawutela ati: Uditaka.

³⁴ Ku ndi akati ati: Ukambi wʼAbarahama mbemi.

³⁵ Latuyalaka akatshokola khumemi utamanya, ku ndi akayala untu a wuki. Ndi akawusha ekoko la ngombe, fesa la paunyi, ekambi wʼapami la ekambi wʼamantu, ndu kamelo la punda.

³⁶ Sara, wadi a khumemi, akawutela ona pami lu nshi yandi yʼusumbi. Ku khumemi akasha ona ako tshe keli la ndi.

³⁷ Khumemi akantshibia ati: Toselaki onʼami wadi uma lʼatei wa ana amantu wʼasi Kanana, akanga a kete yudjashimi.

³⁸ Keli kutshu lu luudu la papa, lʼatei a khumbu kasu, dia ntosela onʼami wadi leko.

³⁹ Ku dimi lakambula khumemi nti: Naka umuntu halangi ndja la mi, ku ukundi?

⁴⁰ Ku ndi akankaluya diui ati: Latuyalaka, latumokendakendaka la ntundu kandi, ayutuma ondjelo andi kame la ye dia nkuhumuya lukulu lʼolo lu lokendo laye. Ku we ayutosela onʼami wadi uma lʼatei a khumbu kasu, uma lu luudu la papa.

⁴¹ Lamʼayuyukuma lʼatei a khumbu kasu, naka vo hawukushandi, ku we ayutshungo uma lu etshibelu kamumukutshibia.

⁴² Lamʼakamakumi elo lʼeteko, dimi lakalombi nti: Latuyalaka, Unyashungu a khumemi Abarahama, naka we ambuluwanya lokendo latamatshu lone,

⁴³ dimʼone ambemala lʼeteko kʼashi. Layolomba usekaseka a umuntu layuya dia ndjuduwula ashi nti: Umbisha tema tʼashi uma lu mbaka kaye keli no.

⁴⁴ Naka ndi ayunkaluya diui ati: Yaka, yono; dimi layutuduwela ndu kamelo yaye ashi akina, ku umuntu oso kayuyala wadi lakasonwela Latuyalaka onʼa khumemi.

⁴⁵ Kamʼakamateketaka lʼutema, menyi ku Rebeka one ambutumba la mbaka kandi lu diheka. Ndi akahulwi lʼeteko, akaduwudi ashi. Dimi lakolombi nti: Umbisha ashi wa no.

⁴⁶ Ndi akahulusha mbaka esadi uma lu diheka diandi, akamvutedi ati: Noka; dimi layutuduwela kamelo yaye ashi akina. Okone dimi lakanwe. Ndi akasha ndu kamelo ashi a no.

⁴⁷ Ku dimi lakawumbudi nti: Onʼa na eye? Ku ndi akatshi ati: Onʼa Betuele kemi, lakuti Milika la Nahora. Ku dimi lakawudji shingu lʼohembe la ekoma lʼanya.

⁴⁸ Dimi lakakolami la ntundu ka latuyalaka, lakatumbudi Latuyalaka, Unyashungu a khumemi Abarahama, lakanombola ololo dia dimi ndjosela Isaka, ona umuntu lakuti onangu khumemi, wadi.

⁴⁹ Nyumvuteli naka nyu nyayulanga ntshela khumemi la kenemo ndu la kolamelu. Naka hanyulangi, nyumvuteli, dimi kankadimo lu lunya la lomoso kana lu lunya la pami.

⁵⁰ Labana la Betuele wakûkaluya diui vati: Latuyalaka kutungi dikambu ne. Okone shu hateyi kutela diui dia kolo kana diʼololo.

⁵¹ Enda, Rebeka one eko la ntundu kaye. Uwose, utshu la ndi; katuyali wadi a khumeye, uku akati Latuyalaka.

⁵² Lamʼakuki ukambi wʼAbarahama aui awo, ndi akakhusamela Latuyalaka.

⁵³ Ku ndi akatundja dengalenga dia fesa, dengalenga dia paunyi, la ahondo, akasha Rebeka. Ndi akasha ndu onangu ndu nyangu eshasha wʼushinga a wulu.

⁵⁴ Lʼokongo diku, ndi la wane waki la ndi wakali, wakano, waketama. Lamʼakaweto la pindju, ukambi wʼAbarahama akati ati: Nyunkimo nkaluli le khumemi.

⁵⁵ Onangu Rebeka la nyangu wakati vati: Ona umuntu one atukutshikala la su nshi motshi, kuyanga nshi dikumi. Lʼokongo diku kutshu la ndi.

⁵⁶ Ndi akakaluya diui ati: Tanyuntshimbiatshimbiaki, ne dia Latuyalaka akaluwanya lokendo lami. Nyunkimo nkaluli le khumemi.

⁵⁷ Wakukaiuya diui vati: Teti ona umuntu, tuyuwumbuli.

⁵⁸ Ku vo waketi Rebeka, wakawumbula vati: We nangaka ntsho la pami kene? Ndi akakaluya diui ati: Dimi layutsho.

⁵⁹ Vo wakakimo kadiyewo Rebeka la yaya yandi, dia ndi ntsho la ukambi wa Abarahama la antu andi.

⁶⁰ Ku vo wakatshokola Rebeka; wakawutela vati: We kadiyesu, kuyali lotshetshe la nunu diʼantu diaheyama mbala. Tukanula taye kawuleli asuku wa wedja wʼantunyi awo.

⁶¹ Rebeka akunela ndi la ekambi andi wʼamantu, wakahema lu kamelo, wakayeli ukambi wʼAbarahama. Okone ukambi ako akose Rebeka, akatshu la ndi.

⁶² Laso ku Isaka akayayakaka lu mbuka kʼuma la Bere-Lahai-Roi, ne dia ndi akadjashi lu leke la diku dia kushi la kete sho.

⁶³ Dikolo dimotshi, lamʼakatshu Isaka lʼekambo la ntotemola Unyashungu, ndi akedia ashu, enyi ku kamelo nye yayayi.

⁶⁴ Ndu Rebeka akedia ashu, akenyi Isaka. Ndi akakiti uma lu kamelo kandi.

⁶⁵ Ndi akambula ukambi wʼAbarahama ati: Pami kakona keku kayayi lʼekambo la ndjuhumana la su? Ku ukambi ako akawutela ati: Khumemi uku. Rebeka akose dihondo, akayakumbi lʼote.

⁶⁶ Ku ukambi akasanyia Isaka akambu tshe wakandatshi.

⁶⁷ Isaka akatshu la Rebeka, akatoto la ndi lu luudu la dipema laki Sara nyangu. Rebeka akayala wadendi. Isaka akawukaka ngandji. Okone Isaka akasambama lʼokongo a nyoi ka nyangu.